Footer

BANNER NEWS: Pannakaraem ken pannakapukaw ti deskriminasion kadagiti babbai, natratar iti media forum

PANNAKARAEM ken pannakapukaw ti deskriminasion kadagiti babbai iti amin a benneg ti kagimongan tapno masaluadanda iti pannakaabusar ken pannakagundaway, ken maaddaanda iti kapada a gundaway dagiti lallaki.

Daytoy ti tema a nagwerrekan ti naangay a Dap-ayan Ilocos Sur media forum sadiay Provincial Capitol, Vigan City idi malem ti Marso 15, 2017. Ti forum ken inlungalong ti Philippine Information Agency, ken dinar-ayan dagiti pannakabagi dagiti nagduduma a media institution iti Ilocos Sur.

Nasangaili iti media forum ni Atty. Rhodora Arrocena, Provincial Officer ti Commission on Elections; Police Chief Inspector Winnie De Vera, Chief ti Police Civil Relations ti Police Provincial Office ken Dr. Alegria Oandasan ti Gender and Equality Development Department ti University of Northern Philippines.

Naisayangkat ti edition ti dayta forum mainaig iti pannakarambak ti Bulan para kadagiti Babbai wenno Women’s Month ita a Marso. Natratar iti forum dagiti naduduma a kalintegan dagiti babbai kadagiti media coverage, agraman ti karbengan dagiti ubbing ken menor de edad iti news reporting a nasken a masaluadan ti privacy and confidentiality dagiti impormasion kas sagudayen ti Republic Act 9262.

Nasaludsod kadagiti sangaili a babbai nga agpapada nga agserserbi iti gobierno dagiti kapanunotanda maipapan kadagiti nakasanayan ni Presidente Rodrigo Duterte nga agangaw wenno agsarita kadagiti saan a rumbeng a balikas a makaapektar iti panagraem kadagiti babbai kas ti naisawangna idi panawen ti kampania maipapan ti Australiana a misionera a hinostage ken rinames dagiti balud a hostage takers; ti inyawisna kadagiti foreigners kabayatan ti APEC Summit nga agnegosioda iti Pilipinas ken addan 50 a birhen nga agur-uray kadakuada; ken ti mandarna kadagiti militar a paltoganda dagiti rebelde a babbai kadagiti mabagbagida tapno agbalindan nga awan-mamaayna.

Inlawlawag ni Atty. Arrocena a panawen pay ti kampania ket impakitan ti Presidente ti galadna nga agsarsarita ngem binutosan met latta dagiti adu a botante a nangabakanna. Impaganetgetna a saanna a kanunongan ti wagas ti panagsarsarita ti Presidente ta saan a nasayaat a denggen ken pagwadan dagiti umili nangruna dagiti ubbing.

Impakaammo ni Arrocena nga iti politika ket ad-adu pay laeng nga amang dagiti agkankandidato ken mangab-abak a lallaki no maikompara kadagiti babbai. Impalagipna nga iti Pilipinas ket umad-adun dagiti mayat nga agkandidato a babbai. Inyawisna nga iti masungad nga eleksion iti barangay ken Sangguniang Kabataan inton Mayo 14, 2018 ket ad-adu koma dagiti mayat nga agkandidato a babbai. Inlawlawagna nga ikkaten koman dagiti Pilipino ti daan a pammati ken kultura a dagiti lallaki ket ad-addada a makabael nga agserbi ngem dagiti babbai. Impalagipna a naminduan a naaddaan ti Pilipinas iti dua a babbai a presidente, ken addan dagiti napili kadagiti posision iti lokal a gobierno a mangipaneknek a dagiti babbai ket kapadada met laeng iti kabaelan dagiti lallaki nga agserbi kadagiti mabotosan a posision iti gobierno.

Impakaammo met ni Chief Insp. De Vera nga agtultuloy ti kaadda dagiti biktima iti kaso ti “Violence Against Women and Children” kadagiti masakupan dagiti nagduduma a police stations iti Ilocos Sur gapu kadagiti nagduduma a rason kangrunaanna ti kinakurang ti respeto dagiti lallaki kadagiti babbai. Impakaammona a maibasar iti data ti ISPPO, ti kadagupan dagiti babbai a nagbalin a biktima ti kinaranggas: 177 (Tawen 2017); 130 (2016) ken 331 (2015). Inrakurakna pay nga iti kadagupan dagiti kaso ti panangranggas kadagiti ubbing: 213 (2017); 172 (2016), ken 133 (2015).

Impalgak ni De Vera nga adda la ketdi dagiti kaso ti kinaranggas kadagiti babbai ken lallaki a saanen a nai-report iti PNP nangruna no dagiti maseknan a partido ket naurnosda a dagus ti kaso iti mismo pagtaengan wenno iti barangayda. Inrakurakna pay a mapukpukawen ti deskriminasion dagiti babbai iti PNP ta adun dagiti nakadanon iti rangko a heneral. Inaklonna nga iti kadagupan dagiti recruit a sumrek iti PNP ket 10% laeng dagiti babbai, ken ti 90% ket quota dagiti lallaki, ken dagiti kaadduana a policewoman ket isuda dagiti agserbi kadagiti Womens/Children’s desk kadagiti police station. Inyawisna pay iti media a tumulongda a mangireport kadagiti kameng ti PNP a mangab-abusar iti posisionda tapno makatulongda iti internal cleansing ti PNP.

Inlawlawag ni Dr. Oandasan ti kapanunotanna maipapan iti ugali ti Presidente iti panagsarsaritana. Impaganetgetna a nakasanayanen wenno indakdakkelen ti Presidente dayta a panagsarsarita ket narigatnan a maidian. Impaganetgetna a saan a maiparbeng ti kasdiay a panagsasao ti Presidente nangruna ket isuna ti kangatuan ti saad iti pagilian.

Naidanon pay ken ni Oandasan ti paliiw ti media maipapan kadagiti ar-aramiden nga indecent acts dagiti addaan iti relasion iti langlangalang ken dadduma pay a publiko a lugar dagiti foreign students iti UNP a mangpataud iti dakes nga imahe ti unibersidad. Impalgakna nga awan pay ti pormal a report a naipadanon iti opisinada. Inkarina nga idanonna dayta nga insidente iti maseknan a departamento ti UNP tapno maaksionan.

Natratar pay iti media forum ti annayas ti pannakabista dagiti biktima ti panagrames iti husgado a dagiti laeng asideg a kabagian dagiti maseknan a partido ti mapalubosan a sumrek iti sala ti korte. Naigunamgunam pay ti saan a panagbalin a sensational dagiti kaso pakainaigan dagiti babbai ken ubbing ta adu dagiti kalinteganda a nasken a maraem.

Inyawis ni Atty. Arrocena ti pannakipaset dagiti agpapaay iti media iti One Billion Rising Dance Revolution Challenge para ti pannakaitandudo ti panagkaykaysa para ti pannakaraem ken pannakapukaw ti deskrimasion kadagiti babbai. Indauluan ti Comelec iti Ilocos Sur daytoy a Dance Challenge iti probinsia tapno magibusanen ti kinaranggas kadagiti babbai. (Eden A. Alviar)