Footer

SINURSURAN: Ikawestayo koma ti kinapakumbaba

KINAPAKUMBABA. Adda ngata pay daytoy? masaludsod laeng gapu iti kasla nagbaliwen a naminpinsan nga aglawlaw. Kasla saanen a marikna ti nairut a kinnayammet dagiti agkakalugaran, uray pay dagiti agkakaarruba.

No adda man, nalabit a kadagiti laeng sulsulinek a paset ti pagilian. Iti lugar a saan a pinagsisina ida ti social media, iti lugar nga im-imasenda laengen ti agsasarita para iti pagimbaganda ngem ti kasla di agaammo gapu ta adda bukodna nga as-asikasuen iti social media.

Ngem no iti patad a makuna, daytoy kinapakumbaba, narigaten a marikna.

Pinnatayok ti isbo, kasta ti agar-ari. Awan mayat a paabak. Kasla ketdin pannakaidadanes ti kinatao ti saan a pannakilaban, ti di panangipakita a kabaelan met gayam.

Naulimek a dati ti Purok Amianan. Nasapa a mairikep dagiti pagtaengan no nagtangepen ti sipnget. Awan no kuan ti malmaltiing iti aglawlaw. Natalna ti panunot nga aginana.

Ngem iti panaglabas ti panawen, in-inut a nagbaliw ti Purok Amianan. Adda dagiti naikamang a nagtaud iti sabali pay a probinsia. Rimmang-ay ti teknolohia isu a nastrek metten ti social media dagiti pataengan. Nakagatang ti kaaduan ti paglinglingayan kas koma iti telebision ken karaoke.

Nagangayanna, napukawen daydi panagsasarita dagiti agkakaarruba iti kantina ti purok no kasta a malpas ti agmalem a panagtrabaho. Addan bukod a lubong ti tunggal pagtaengan. Agbuyada kabayatan ti panagpalpada.

Ngem ti nakadidillaw, dagiti dua a nga agkaarruba. Kasla kanayon nga adda paskenda. No linuktan ti maysa ti pagtokaranna, tuladen ti maikadua. Agkinnapigsadan iti panagpatokar. Awan mayat a paabak.

Idi gimmatang iti dakkel nga ispiker ken amplifier ti maysa, gimmatang met ti maikadua.

Awan ti mayat a paabak. Awan ti mayat nga agpakumbaba. Agpinnatayokda latta iti isbo!

Saanda a mapanunot ti pannakaistorbo dagiti kapurokanda. Kasta man met laengen dagiti managduyos iti videoke. Uray pay nabayagen nga ordinansa ti barangay ti pannakaipawil ti panagbideoke iti nalablabes ngem alas dies ti rabii, awan latta ti papananna. Wantusawa, kasta ti mapaspasamak.

Saan a maikaskaso dagiti ordinansa ti barangay!

Isu a nasayaat no mapatuloy daytoy baro ita a gakat a linteg—ti pannakaipawil iti sibubukel a pagilian ti panagbideoke iti nalablabes ngem alas dies ti rabii. Patient met ngatan dagiti taga-Purok Amianan. Ken uray pay iti sabsabali a paset ti pagilian.

Sabagay, nabayag payen daytoy nga ordinansa kadagiti dadduma a siudad iti pagilian. Ngem maitutop laeng nga agingga kadagiti sulsulinek ti pakaipatungpalanna.

Kinapakumbaba, dayta ti makitatayo a kawes ni Hesukristo. Maitugotan dayta no anagen ti nagdalananna a nangyeg ita iti maaw-awagan iti Kuaresma.

Anak ti Dios, ngem saan man laeng a nagkitakit iti pannakadusana tapno maispalna ti lubong.

Anaknak ti Dios, saanak a rumbeng a madusa!” mabalin a kinunana koma idi.

Ngem saan! Sipapakumbaba a nangaklon iti pannakaidatonna para iti pannakasaka ti sangalubongan iti basol.

Dayta ti saan a mapataran a panagayat iti pakasaritaan ti lubong!

Sinagrap ni Hesukristo amin a panangumsi, panangublag, pannakaparparigat, panangtallikud dagiti nakadkaduana a nangasaba kadagiti tattao, ken dagiti mismo a natulonganna.

Saan a mailadawan dayta a sakit a naipalay Kenkuana idi addan nga agngangabit ken Patay iti krus sadiay Bantay Kalbario. Nasasaem pay ngem kadagiti di mabilang a saplit a nalak-amna.

Ngem sipapakumbaba latta. Awan ti nangngeg a panagbabawi iti panangawatna a mangispal kadatayo kadagiti basbasoltayo.

Anian a panagayat!

Ita a Kuaresma, napateg ngarud a kitaentayo ti kinataotayo. Arisiten ti isip ken puso. Maibilangtay kad’ pay nga anak ti Namarsua?

Wenno agtultuloy latta ti panagaramid ti tumunggal maysa iti babak a mangpabantot latta iti bakbaklayen a krus ni Hesukristo?

Iti inaldaw a panagbiagtayo, adu dagiti pannubok a masagang. No saantayo nga agridam, mabalin a pakaipasuliantayo.

Aglalo ta mapalpaliiw a nabara itan ti panagpampanunottayo. Awan la bassit, inningar. Ginnura. Inton kuan, ringgoren. Naladawton no mautobtayo nga awan gayam ti maipaayna a pagimbagan ti panagpudpudot ti ulotayo.

Ngem napasamaken ti di rumbeng. Mabalin a naisagmaktayon.

No nagpakumbabatayo koma, di kad’ awan ti problema?

Kinapakumbaba. Nagrigat payen a maanninawan kadagiti ubbing iti agdama a henerasion. Iti laengen pagadalan, naglalakada nga agaapa nupay awan kaes-eskanna ti makaigapu. Adda dita a gapu laeng iti durog dagiti kaklaseda. Wenno nagkinnursonada gapu iti panagsinnabat laeng ti panagkitada. Ken dadduma pay.

Ti saan koma a rumbeng a mapasamak, ti kinangato payen ti isbo dagiti ubbing. Umingardan kadagiti mannursuroda. Aglalo no kasta a madillaw ti madi nga inaramidda. Saanen nga ipirpirit dagiti dadduma dagiti titserda aglalo no ammoda a ganggannaet daytoy iti lugarda.

A kasla ketdin nalakada a pakkoken dagiti mannursuroda aglalo no al-alaen ida dagiti nagannakda. Makisinnungbatda. Bagi lattan ni mannursuro ti agpasensia. Saanna a mabalin nga iburuang ti riknana ta amangan no makaisao iti dakes wenno makadisso. Pakaik-ikkatanna pay.

Child Protection Policy, dayta ti sangkaduldol itan dagiti annak. Ken nagannak.

Paglugaran ni ma’am wenno sir ti panagpakumbaba!

Maipasa koma ngaruden ti para kadakuada a Teacher Protection Act a madama ita a maipagpagna tapno agbalin a linteg.

Makita ngarud iti ania man nga aspeto ti panagbiagtayo ti kinapateg ti panagpakumbaba. Saan laeng nga ilikliknatayo iti pakaisagmakan. Kangrunaanna, ti pannakayasidegtayo iti Dios. Babaen ti panagpakumbaba, mapatibker ti langenlangentayo Kenkuana.

No adda kadatayo ti Namarsua, kunada ngarud, asino ti pagbutngantayo?

Kuaresma. Malaksid iti pananglagiptayo kadagiti sakripisio, panagrigrigat ken ipapatay ni Hesukristo, napateg met a rugian ti panangabaruanan.

Rugian kadagiti simple a bambanag. Tunggal maitukit, uray bassit, nga ayat iti inaldaw, dakkel daytan no maurnong bayat ti panagbiagtayo.

Sapay ta itoy a panawen, saan koma a dayta bakasion ken panagliwliwa ti ipangpangruna. Kitaen ketdi no kasano a maikawes kadatayo ti kinapakumbaba iti inaldaw.

Ngem no saan a maliklikan ti agbakasion, kitaen koma dagiti aramiden. Ipangruna latta ti panamagbalin ti tunggal kanito nga addang a yaasideg iti puso ti Dios.

Palagip laeng, kadagiti papanan nga aplaya a pagbakasionan, saantayo koman a mangibati kadagiti basura. Ammuentayo dagiti akemtayo a kas umili ken pinarsua ti Dios.

Mapalpaliiw a mapmapno dagiti aplaya no kasta a Sabado Gloria. Arig awan itiitan iti kinaadu ti tao. Agraragsak ti tunggal maysa kabayatan ti panagurayda iti panagungar ni Hesus a mangipamatmat a saan nga eppes ken awan kaes-eskanna ti nariingan a pammati.

Ti makadakes, kalpasan dayta nga aldaw, basura amin a disso a nagpanawan. Kadagiti ili iti probinsia, kaaduanna nga awan ti para dalus kadagiti aplaya. Mayang-anginto lattan dagiti papel ken plastik; mayanud, magaburan dagiti bettak ti bote ken no ania ditan a pinanawan a basura.

Pagaammotayo met ngarud a dagitoy a basura ti mangpatpatay, saan laeng a kadagiti taraon nga ipapaay ti aplaya, iti sibubukel nga aplaya.

Kasanonto ngaruden ti sumarsaruno kadatayo?

Agpakumbaba. Saan a kunaen iti bagi: no kabaelanda nga ibati dagiti basurada, kabaelak met. Awan met ngata ti maksayan kadatayo no datayo laeng ti mangpidut, mangyawid kadagiti basurana tapno sadiay, maipempenda a naimbag.

Saan la koma ngarud nga ita a Kuaresma ti panangikawestayo iti kinapakumbaba.

Inaldaw-aldaw koma— iti amin nga aspeto ti panagbiagtayo!

Comments are closed.