Footer

Gapu iti arak, 2 barangay tanod nagtinnagbat

SAN ILDEFONSO, Ilocos Sur – Gapu iti arak, nagtinnagbat ti dua a barangay tanod gapu laeng iti dida panagkinnaawatan iti maysa a banag.

Iti inisial nga inbestigasion, naammuan a nagiinom da Raymund Torres y dela Cruz, 26, awanan asawa, barangay tanod, Jay Sonido y Pisco, 33, awanan asawa, barangay tanod, agpada a residente iti Brgy Iboy, ditoy nga ili, ken sumagmamano a kaarrubada iti igid ti karayan iti Brgy. Sagsagat, ditoy met laeng nga ili.

Napasamak ti nabara nga argumento dagiti dua ket naganawa dagiti kainomanda. Nagawid ni Torres ngem idi agsubli, adda iggemna a kayo ket kinaritna ni Sonido a mangala iti buneng. Tinagbat ni Sonido ni Torres idi gandaten daytoy a pang-oren.

Natagbat iti kanigid nga abagana ni Torres ket intaray dagiti kainumanda iti San Ildefonso Rural Health Center para iti pannakaagasna.

Insuko dagiti opisial ti Brgy. Iboy ni Sonido kadagiti nagresponde a polis ket addan a nakakustodia iti ikot ti San Ildefonso Police Station para iti umisu a disposision.

Saan a narekobre ti nausar iti pannagbat. (Tawid News Team)

Comments are closed.