Footer

Mapadisi ngata iti akem ni Chief Justice Maria Lourdes Sereno? (Maudi a paset)

Iti agdama, nakabakasion wenno nagipila iti leave ni Sereno kas Chief Justice. Nadutokan met nga Officer-In-Charge ni Senior Supreme Court Justice Antonio Carpio. Sakbay ti panag-leave ni Sereno, naipadamag a kiniddaw dagiti kaaduan a justice ti panagbakasionna, ngem naglibakan dayta dagiti abogadona ken impettengda a nagbakasion ni Sereno tapno masaganaanna ti Impeachment trial no mayulinto iti Senado. Makumikom ita ni Sereno nga agpasiar ken agsarita kadagiti naindaklan a pasken a pangipekpeksaanna ti karirikna ken kapanunotanna mainaig iti Impeachment complaint kontra kenkuana.

Iti pannakaipila ti Impeachment complaint ken quo warranto petition ken ni Sereno ket pagsisinaena ti kapanunotan ken pagtaktakderan dagiti umili. Adda dagiti kumanunong iti reklamo ta patienda a kas Chief Justice, nasken a ni Sereno ket agbalin a paganninawan ti kinalinteg ken modelo iti nasayaat a panangimaton iti Korte Suprema ken dagiti amin a korte iti Pilipinas.

Adu met dagiti mamati a naidarum iti Impeachment ti Chief Justice kas wagas ti panangpadisi kenkuana gapu kadagiti panangsupiatna kadagiti addang ti agdama nga administrasion a mailabsing iti linteg. Namin-adun a nangited ti opinion ken desision ni Sereno kadagiti gannuat ni Presidente Rodrigo Duterte kas ti mapaspasamak a pammapatay iti gerra kontra illegal a droga iti pagilian. Idardarirag ni Sereno ti naan-anay a pannakasurot ti hustisia ken pannakaraem ti human rights dagiti umili iti pannakaipakat ti linteg.

Adda dagiti mamati a ti pannakaipila ti Impeachment complaint kontra ken ni Sereno ken ti posible a pannakaikkatna iti akemna ket wagas tapno nawayanton ti administrasion a mangipakat kadagiti gannuatda no kasapulan ti maudi a desision ti Korte Suprema.

Manamnama a mayuli ti Impeachment Case ta kontrolado ti administrasion ti House of Representatives iti panangidaulo ni Speaker Pantaleon Alvarez a napinget a kritiko ni Sereno. Agpeggad pay ti Chief Justice it Senado nga idauluan ni Senate President Aquilino Pimentel III, malaksid no kaaduanto kadagiti senador ket usarenda ti panunot ken konsensiada iti panangamirisda kadagiti maidatag nga ebidensia ken panangiyetnagda iti pangngeddengda no maikkat wenno agtalinaed ti Chief Justice.

Maipadanto ngata ni Sereno iti daydi Chief Justice Renato Corona? Idi Disiembre 2011, ti Impeachment complaint kontra ken ni Corona iti House of Representative ket pinaboran dagiti 188 a kongresista, ken nakedngan a maikkat iti akem uray no saan nga “Impeachable Offense” ti saanna a panangiraman iti SALN dagiti dadduma nga assets-na.

Narurod idi ni Presidente Benigno Aquino III ken ni Corona gapu ta imbilangna a midnight appointee ni Presidente Gloria Arroyo sakbay a naggibus ti terminona. Napagam-amkam a lapped ni Corona iti kampania ti administasionna kontra iti kurapsion. Kalpasan ti pannakapadisi ni Corona, rimmuar ti kontrobersia maipapan ti pannakaruk-at dagiti dakkel a pondo ti Development Acceleration Program kadagiti senador a kimmanunong iti pannakaikkat ni Corona.

Naipalaon iti 1987 Constitution a maikkat iti akem babaen ti Impeachment and Conviction ti Presidente, Bise Presidente, dagiti kameng ti Korte Suprema, Miembro dagiti Constitutional Commission, ken Ombudsman gapu iti culpable violation of the Constitution, treason, bribery, graft and corruption, other high crimes or betrayal of public trust. Napateg ti Impeachment tapno maikkat iti posision dagiti impeachable officials, ngem maab-abusaren daytoy tapno maiwalin dagiti lapped kadagiti plano ken gannuat ti administrasion.