Footer

Panagusar kadagiti alternative fuels ken energy technologies, ikamkampania ti DOE

PANAGUSAR kadagiti nagduduma a kabaruanan nga alternative fuels ken energy technologies tapno masaluadan ti natalged nga angin ken makasalimetmet pay iti enerhia.

Dayta ti nayadadal kadagiti dimmar-ay iti naangay a panagtataripnong maipapan iti “Alternative Fuels and Energy Technologies” dagiti pannakabagi ti transportasion, academe, edukasion, salun-at, lokal a gobierno, media ken dadduma pay a maseknan a sector iti Ilocos Sur. Naangay ti taripnong sadiay Ilocos Sur Provincial Capitol, Vigan City idi Marso 21, 2018.

Ti pasken ket insayangkat ti Department of Energy Region I Field Office babaen ti panangidaulo ni Engr. Reynaldo Riganor, Officer-In-Charge, ken ti Philippine Information Agency nga impanguluan ni Mr. Freddie Lazaro, Deputy Regional Director, ken April Bravo, Information Center Officer iti Vigan City. Nasangaili pay iti pasken dagiti Provincial Officials a da Vice Gov. Jeremias Singson ken Board Member Efren Rafanan. Nagpaay a kangrunaan a resource speakers dagiti agpapaay a senior research specialist ti DOE a da Luzviminda Leonido ken Mr. Loreto Moncada.

Iti panagsarita ni Vice Gov. Singson, pinagyamananna ti DOE ti panangidanonda kadagiti impormasion ken kampaniada para iti alternative fuels ken energy technologies, ket impasingkedna ti panangikagumaan ti Provincial Government nga agtungpal kadagiti pagallagadan ken pannakapamoderno dagiti makina ken fuel nga aramaten dagiti taga-Ilocos Sur.

Inlawlawag met ni Engr. Liganor dagiti akem ti departamentoda iti panangmanehar kadagiti pakaseknan ti enerhia. Impasingkedna a madadaanda a sumungbat ken tumulong a mangrisut kadagiti parikut maipapan iti enerhia no la ketdi maipadanon kadakuada iti opisinada sadiay Region I field office, Urdaneta City, Pangasinan.

Kabayatan iti taripnong, nailawlawag ti kinapateg ti panagaramat dagiti kabaruanan a klase ti makina ken alternatibo a fuel a pangpaandar kadagiti lugan kas ti elektrisidad ken liquefied petroleum gas ken dadduma a mainayon kadagiti tradisional wenno nakaikadawyanen nga engine fuel. Naipaganetget a dagiti alternatives fuels ken kabaruanan nga energy technology ket makatulong iti pannakakontrol ti ad-adu a maipugso a sabidong iti angin tapno natalged daytoy nga angsen. Naipasagepsep met nga iti panagaramat kadagiti kabaruanan nga energy technologies ket nanginngina iti damo, ngem dakkel ti masalimetmetan iti naunday a panawen gapu ta ad-adda a natipid dagiti kabaruanan nga engine ken teknolohia ngem dagiti kadaanan a makina.

Mairaman kadagiti nagatendar iti taripnong dagiti opisial ken pannakabagi dagiti gunglo iti transportasion nangruna dagiti tricycles’ operators and drivers association ken dadduma pay a transport group nga intresado iti transportation modernization. Indanon dagiti grupo dagiti pakaseknanda para iti nataltalged ken nain-inut nga enerhia nga usarenda tapno makasalimetmetda iti para dagiti pamiliada.

Impalgak pay dagiti dadduma a nagatender dagiti pakaseknan ken parikutda a saanda kabaelan ti kellaat a modernization dagiti luganda no man pay kayatda met daytoy tapno makatulongda iti pannakamantiner iti nadalus nga angin ken tapno makasalimetmetda iti maintenance expenses. (Eden A. Alviar)