Footer

“Saannak Nga Am-ammo?”

SIR Teody! Sir Teody!” Nalag-an a tuktok iti ridaw ti kuartok ditoy dormitorio ti nangsinga iti panagsuksukatko iti dayta nga agsapa. Naitimkak ni Ma’am Beth, ti kaduak ken kinagiddanak a simrek iti Zertie High School. Iniddepko ti bassit a telebision a pagbuybuyaak iti damag nga isu latta nga isu—dagiti agkaraiwalang a biktima ti pammapatay a maatap nga adda pakainaiganna iti maiparit nga agas.

Apay, ma’am?” sinaludosdko apaman a naluktak ti ridaw.

Adda makasapul kenka iti salas, sir,” kasla madandanagan ni Ma’am Beth a nagkuna.

Asino?”

Nagannak kano ni Darlex nga ubingmo.”

Sige, ma’am, ta sumarunoakon.”

Immunan ni Ma’am Beth. Pinidutko dagiti ramitko iti rabaw ti lamisetak. Naminsan pay a sinirigko ti pakabuklak iti sarming.

Nagannak ni Darlex? Apay ngata?

Iti lagipko, awan ti ammok a naaramidak a babak iti ubing. Adbayserak ni Darlex iti 9-Alexandrite. Ti la nadlawak itoy uppat a bulanko pay laeng kadakuada, managuyaw ni Darlex ken sutil.

Sika ti titser ti anakmi iti Science?” sinabetnak a dagus ti atapek nga ama ni Marlex idi sumungsungadakon iti salas. Binayabay ti asawana. Damok la ida a makita.

Iti panagkawkawes madlaw nga adda kayada. Sabagay, ditoy Zertie, bin-ig nga adda ibagbaga ti pamilia dagiti ubbingmi. Pribado ti pagadalan ket dakkel ti pagbaybayadda iti binulan.

Wen, sir,” kinunak. “Apay kadi? Agtugawtayo koma.”

Inabaynak ni Ma’am Beth. Kapatpatangna itay dagiti agassawa sakbay a dimtengak.

Nagkaro met laengen ti namnamay-am iti anakmi!” nagurdo ti panagsaad ti timek ni Mr. Aluigar.

Saankayo a maawatan, sir,” sipapakumbabaak a nagkuna. Awan ti ammok a basolko. Pulos a diak pinagsawan ken nadissuan ti anakda.

Permi met ti namnamay-am iti gradona!”

Ania ti problema, sir? Pimmasa, saan kadi?”

Wen, pimmasa! Ngem awanen ti namnamana pay a sumrek iti honor roll!”

Dayta ti rimmuar iti computation-ko, sir,” inkalintegak.

Saan a mabalin? Ania laengen ti inar-aramidmo?’ ni Mrs. Aluigar metten ti nagsao. “Dati iti honor roll ‘ta anakmi itay napalabas a tawen. Ita ta addakan, saanen nga ag-honor? Kabarbaroka laeng, kastan ti inaramidmo!”

Napangangaak.

Kunam no asinoka?” ni manen Mr. Aluigar. “Kattiliwka pay laeng no ar-arigen ngem kastakan! Saannak kadi nga am-ammo? Siak ni Mr. Bernard Aluigar! Maysa laeng met Civil Engineer. Ken nakaasawa iti maysa a CPA!”

Urayak la naalimpayeng. Diak nakatimek a dagus. “Sir, awan ammok iti sasawenyo. No maipanggep iti grado ti anakyo, maymaysa laeng ti maipasiguradok. Saanko a pulos a dinoktor no dayta ti pangipagarupanyo.”

Intayo iti opisina ti prinsipal!” kinuna ni Mrs. Aluigar ket inyunadan ti nagna. “Awan pay serserbi dagiti adu a maipapaay kadaytoy a pagadalan!”

Agkinkinnitakami lattan ken ni Ma’am Beth a nangipus kadagiti agassawa.

Simrekkami iti opisina ni Mrs. Lianne Dabbao a prinsipalmi. Naimbag ta addan a nadanonanmi. Sabagay, saanna nga ugali ti maladladaw.

Nakapasiarkayo man, kakabsat,” kinuna ti prinsipalmi a sumagsagpaten nga uppat a pulo a kalgawna. Inisemanna dagiti bisita. “Agtugawkayo…”

Kayatmi nga ireklamo daytoy baro a titser dagiti ubbing, ma’am,” kinuna ni Mrs. Aluigar a di man laeng nga immisem.

Apay kadi, kabsat?”

Nakaro unay ti pananggradona iti ubingmi, ma’am!” ni Mr. Aluigar. “Agasem dayta 84.6!”

No dayta ti nabaelan ti ubingtayo, kakabsat, ket aklonentayo koma, a,” naalumamay laeng a timek ti prinsipalmi.

Di pay saanen nga ag-honor ti anakmi, ma’am?” inkiraud ni Mrs. Aluigar. Natadem ti panangkitana kaniak. “Nalawag iti pagalagadan ti eskuela a masapul nga awan ti nababbaba ngem 85 a grado ti ubing iti ania man a subject tapno makastrek iti honor roll. Ken saan a masapul nga i-round-off dagiti grado… up to two decimal places!”

Saanyo kadi a makitkita ti maal-ala ti anaktayo kadagiti eksam ken activity-na?” sinaludsod ni Ma’am Dabbao.

Nagkinnitada nga agassawa. “Amman, ma’am.”

Sir Teody,” kinitanak ti prinsipalmi. “Alaem iti kuartoyo ti portfolio ti anakda,” ti yan amin nga output ti tunggal ubing ti kayatna a sawen.

Nagtungpalak a dagus. Bitbitkon ti portfolio ni Darlex idi agsubliak.

Inruar a dagus ti prinsipalmi ti linaon ti portfolio. “Pakilukat ti laptop-mo, Sir Teody. Ipakitam kadakuada ti class record-mo.”

Nagtungpalak a dagus.

Ita, kakabsat,” ni manen Ma’am Dabbao, “kitaentayo no dagitoy pinirmaantayo nga output ti anaktayo ket isu met laeng ti adda iti record ni sir-na.”

Pudno ti kuna ti prinsipalmi. Amin a quizzes, performances ken activities dagiti ubbingmi, yawidda apaman a matsek. Ipapirmada kadagiti nagannakda sa isublida met laeng iti kabigatanna tapno mayurnos daytoy iti portfolio-da.

Gapu ta naurnos dagiti output, nalaka laeng nga indasigmi iti class record-ko iti laptop. Napaneknekan dagiti agassawa nga awan ti nabaliwan. Nakitada met a talaga a di immabot iti 85 ti grado ti ti anakda.

Awan la kadin ti konsiderasion?” kaskasdi latta a nagubsang ti panagtimtimek ni Mr. Aluigar. “Amangan no nababa met unay ti panaggrado ‘toy kattiliw a titsertayo, ma’am?”

Ta pasagidannak latta. Sungbatak la koma ta itay pay nga agburburek ti darak ngem nariknak ti gemgem ni Ma’am Beth a nangigawid kaniak.

We all knew the rules!” natangken ti boses ti prinsipalmi.

Agsublikaminto la ngaruden iti sabali nga aldaw, ma’am!” kinuna ni Mrs. Aluigar. Ket inyunanan ti rimmuar. Sinaruno ti asawana. Ngem sakbay a rimmuarda, insagudda pay laeng ti natadem a kusilapda kaniak.

Saanmo a baliwan ti grado ti anakda,” kinuna ni Ma’am Dabbao idi makalikud dagiti agassawa.

AGSAPA. Manarimaanak nga agsuksukat idi maimuttal iti buybuyaek ti natiliw dagiti pannakabagi ti linteg a drug lord kano iti ili pay met a pagisuruak.

Da Mr. ken Mrs Aluigar!

Lima kilo a shabu ti natiliw ti napagtipon a puersa dagiti polis, taga-PDEA ken NBI iti mismo a panaderia dagiti agassawa! Naipakete gayam dagitoy iti uneg dagiti arina nga us-usarenda nga agaramid iti tinapay.

Napangilangilak laengen. Ita, am-amokon no asino dagiti agassawa! —-#30.