Footer

The touch pad swimming pool at President Quirino Stadium

BANNER NEWS: Nakasaganan ti Vigan City iti Palarong Pambansa – Mayor Medina

PHOTO: The touch pad swimming pool at President Quirino Stadium which will be used for the Palarong Pambansa 2018. (Imelda C Rivero/PIA1 Ilocos Sur)

NAKASAGANAN ti Vigan City a mangsangaili kadagiti rinibu a bisita kabayatan iti pannakaangay ti Palarong Pambansa iti Ilocos Sur inton Abril 15 – 22, 2018.

Dayta ti pinasingkedan ni Vigan City Mayor Juan Carlo Medina kabayatan ti naangay a First Quarter Press Conference iti City Hall idi malem ti Abril 24, 2018 a dinar-ayan dagiti pannakabagi dagiti nagduduma a media institutions iti Ilocos Sur.

Impakaammo ni Mayor Medina a nakasaganan ti City Government, Department of Education, Philippine National Police ken dadduma pay nga ahensia ti gobierno para iti naannayas, naurnos ken natalna a panangsangaili kadagiti agarup 15,000 a delegado manipud kadagiti amin a rehion iti Pilipinas.

Naammuan nga uray iti Quirino Stadium, Bantay, Ilocos Sur ti sentro ti Palarong Pambansa, ngem kaaduan kadagiti atleta ken delegado a naggapu iti innem a rehion dagiti mai-billet kadagiti nagduduma a public schools iti las-ud ti Vigan City, ken adu nga sporting events dagiti maisayangkat kadagiti nagduduma a lugar iti siudad.

Impakaammo ti Mayor a nangisaganan ti Philippine National Police iti contingency plan tapno masaluadan ti seguridad dagiti tattao kabayatan ti makalawas a Palarong Pambansa. Mamanamnama ti nakaronto a trapiko kadagiti kalsada iti sentro ti siudad, ken addanto dagiti polis, traffic aides, barangay tanod ken kameng ti NGO kadagiti strategic a paset dagiti kalsada tapno naurnos ti trapiko. Impakaammona nga inton aglukat ti Palarong Pambansa nga adda maisayangkat a traffic re-routing para kadagiti lugan a sumrek ken rummuar iti siudad. Impakaammona pay dagiti lugar a pagparkingan kadagiti lugan dagiti delegado iti nagduduma a paset ti siudad iti San Julian Sur ken Solid West. Inrakurakna a dagiti atleta a nai-billet iti sentro ti siudad ket mabagaan a magmagnadan nga agturong kadagiti pagay-ayamanda no asideg laeng tapno saan a mapakaro pay ti trapiko.

Kiniddaw met ti Mayor kadagiti amin a trycicle drivers ken dagiti aglaklako kadagiti kangrunaan a kasapulan a saanda a gundawayan dagiti bisita iti siudad babaen ti sobra a singir ti plete ken agsobsobra a bayad dagiti tagilakoda nangruna kadagiti mainum ken taraon ken dadduma pay a kasapulan tapno saan a dakes a padas ti iyawidto a pakalaglagipan dagiti delegado ken bisita kabayatan ti iyuumayda iti siudad. Nagballaag kadagiti matiliwan a tricycle drivers nga agpaspasada nga ag-over charged iti plete a sigud a makanselar dagiti prangkisada. Impalgakna met a dagiti pannakabagi ti Department of Trade and Industry ti nakaipaakeman ti pannaka-regulate ti presio dagiti mailaklako a kangrunaan a produkto iti siudad.

Impakaammo pay ti Mayor a nakasaritadan ti contractor ti boardwalk project iti abay ti Govantes River iti asideg ti Quirino Stadium nga ikamakamda nga ileppas ti paset ti kalsada tapno adda mainayon a temporario a pagparadaan dagiti nalag-an a lugan. Impalgakna pay a madaman ti negosasion ti gobierno iti akinkukua ti pribado a lote a madalanan ti boardwalk tapno maideretson daytoy iti Quirino Boulevard. Inrakurakna nga addan commitment ti contractor ti Central Park iti Xentro Mall tapno masimpa ti sumrekan ken ruaran ti parking area ken natalged a pagparadaan dagiti lugan.

Pinatalgedan pay ti Mayor ti agtultuloyto a panagdalus ken pannakakolekta dagiti basura kadagiti publiko a lugar iti sentro ti siudad kabayatan ti Palarong Pambansa tapno agtalinaed ti kinadalus ti aglawlaw. Impakaammona met ti direktibana iti DepEd a mangaramidda iti house rules iti panagaramat dagiti delegado kadagiti billeting schools nangruna kadagiti panagisaksak kadagiti electrical outlets tapno maliklilan ti overload a pagtaudan ti uram.

Impalgak pay ti Mayor nga iti agdaman ket fully-booked dagiti hotel a Vigan City gapu iti kinaadunto dagiti delegado iti Palarong Pambansa, ket mapilitan a dagiti mayat nga ag-hotel ket mapandan kadagiti hotel iti ruar ti siudad.  Kiniddaw ti Mayor ti pannakikaysa dagiti agindeg, agtatrabaho ken dagiti maisar-ong iti Vigan City kabayatan ti Palarong Pambansa iti panagan-anus ken panagpasensiada iti kinaginadto ti trapiko ken kaadayo dagiti pagparkingan. Impaganetgetna a naindaklan ti pasken a Palarong Pambansa a maminsan laeng a mapasamak iti Ilocos Sur iti las-ud dagiti gasut a tawen, ken napateg daytoy a mangpadur-as ti sports, turismo ken komersio iti intero a probinsia.