Footer

Pannakalapped dagiti aksidente ti pampasahero a lugan

MAYSA MANEN a nakaal-alingaget a trahedia ti napasamak nga aksidente ti pampasahero a bus sadiay Sablayan, Occidental Mindoro idi Marso 20, 2018 a nakatayan dagiti 19 a pasahero ken ti drayber, ken nakasugatan dagiti 21 a dadduma pay a naglugan.

Natnag iti rangkis a 15 a metro ti kaunegna ti Dimple Star Transport kabayatan ti panagdaliasatna nga agturong koma iti Manila. Maibasar iti pakauna nga imbestigasion, saan a nakontrol ti drayber ti manmanehuenna a bus a mabalin a gapu iti mechanical malfunction wenno nakaridep isuna gapu iti bannog ken puyatna kabayatan ti panagmanehona.

Sinuspenderen ti Land Transportation Franchising and Regulatory Board ti operasion ti Dimple Star Transport. Nagpalawag metten dagiti agassawa nga akinkukua ti kompania a da Hilbert ken Nilda Napat ken ni Philippine National Police Criminal Investigation and Detection Group Director Roel Obusan kalpasan ti panangimandar ni Presidente Rodrigo Duterte ti pannakaarestoda. Inkari dagiti agassawa ti kooperasionda iti imbestigasion ken panangitedda iti umno a danios kadagiti biktima ti aksidente.

Nangipaayen ti gobierno ti pakauna a tulong kadagiti pamilia dagiti natay a biktima ken dagiti nakalasat a nasugatan kabayatan ti isasarungkar ni Duterte iti pannakaimassayag dagiti pimmusay iti aksidente. Immandar pay ni Duterte ti pannakakansela ti prangkisa ti Dimple Star Transport nga addaan iti 118 units a bus nga agtartaray kadagiti nagduduma a ruta iti Southern Luzon. Intudingen ti LTFRB ti pannakabista wenno hearing ti kaso ti kompania ti bus kas proseso sakbay ti pannakakansela ti prangkisada.

Nakalkaldaang dagitoy a trahedia a nakaibuisan dagiti adu a biag ta naliklikan koma no masursurot dagiti paglintegan iti saanen a pannakaipalubos nga agtaray kadagiti kalsada dagiti daan unayen a pampasahero a lugan nga addaanen iti kabayag a 15 a tawen. Naduktalan iti pakauna nga imbestigasion iti kaso ti naaksidente a Dimple Star Transport bus ket naasemblea laeng kadagiti napagkakapet a surplus a makina, chassis ken kaha a ti engine model ket nasuroken a 30 a tawen.

Nakalkaldaang dagiti kanayonen a nadara a pannakaaksidente dagiti pampasahero a lugan a nakaibuisan dagiti adu a biag ta no koma nasayaat ti pannakamantinerda ken kanayon a napintas ti kondision dagiti drayber ket nalisian koma dagiti aksidente.

Itay napalabas a tawen ket nagadu dagiti napasamak nga aksidente dagiti pampasahero a lugan a ti nakaigapu ket ti saan a nasayaat a pannakamantinerda ken saan a nasayaat a kondision ti bagi ken salun-at dagiti drayber a nagkurangda iti turog gapu iti napaut a panagmanehoda.

Tunggal adda dagiti mapasamak a nadara nga aksidente ket nakaturong ti imatang ti media ken publiko kadagitoy a trahedia ket agbalinda a kontrobersia. Ngem iti panagbaaw ti isyu ket in-inutton a maitanem iti lipat dagiti aksidente iti pampasahero a lugan, agingga nga addanto manen sabali a trahedia.

Idi sardam ti Pebrero 20, 2017, napasamak ti nadara a pannakaaksidente ti Panda Coach Tours sadiay Tanay, Rizal a nakatayan ti drayber ken 14 a pasahero (13 nga estudiante ken maysa a maestro), ken nakasugatan pay dagiti 40 a naglugan nga agad-adal sadiay Bestlink College, Quezon City. Naibasar iti imbestigasion, saan a nagkorre ti preno ti bus a nakaigapuan ti pannakaidungparna iti poste ti koriente kabayatan ti panagdaliasatna nga agturong iti camping site a papanan dagiti estudiante.

Sadiay Brgy. Capintalan, Carranglan, Nueva Ecija, idi rabii ti Abril 18, 2017, naaksidente ti napekpek a Leomarick Trans nga agdaldaliasat manipud Isabela nga agturong iti Ilocos Sur. Natnag ti bus iti derraas nga aguneg iti 30 a metro sadiay asideg ti Dalton Pass. Natay dagiti 36 a naglugan ken nasugatan met dagiti 46 pay a pasahero. Naibasar iti imbestigasion, napukawan iti preno ti napekpek wenno overloaded bus a manmanehuen ti nabannogen a drayber a gapu ti pannakatnag ti lugan iti derraas.

Nakalkaldaang met ti napasamak nga aksidente iti National Highway sadiay San Jose Sur, Agoo, La Union idi parbangon ti Paskua, Disiembre 25, 2017 iti panagdinnungpar ti naarkila a pampasahero a jeep ken Partas Trans. Natay dagiti 20 a naglugan iti jeep ken 25 dagiti nasugatan. Mairaman kadagiti natay a biktima ti maysa a maladaga ken innem a menor de edad. Dagiti agkakabagian a naglugan ti pampasahero a jeep a taga Bauang, La Union ket agturongda koma iti Minor Basilica ti Our Lady of the Rosary sadiay Manaoag, Pangasinan a makimisa idi umagaw ti linia ti drayberda ket bimmanggada iti nasabatda nga agpa-Amianan a Partas Trans. Naibasar iti imbestigasion, saan a nasayaat ti kondision ti drayber ken ti minanehona a jeep a nakaigapu iti aksidente.

Sakbay dagitoy a nadara nga aksidente ket adun dagiti napaspasamak a trahedia iti kalsada a nakaibuisan dagiti adu nga inosente a biag a nalisian koma no nainget a naipakat dagiti pagallagadan iti panagrehisto ken panagala ti prangkisa ti lugan, ken naan-anay a pannakasagat dagiti agala ti lisensia; ken kaadda ti naan-anay a kabaelan ken disiplina dagiti drayber dagiti public utility vehicles.

Gapu iti nakaro a panaginteres iti ganansia, mabaybay-an ti pannakamantiner dagiti lugan, mapekpekda kadagiti pasahero, ken maymaysa dagiti nakurang ti inana nga agmaneho. No inannong koma dagiti opisial ken agserserbi iti gobierno nangruna iti LTFRB, Land Transportation Office ken dadduma pay a maseknan nga ahensia, nalapdan koma ti pannakaaksidente dagiti pampasahero a lugan.

Panawenen nga ipawil ti panagtaray kadagiti kalsada dagiti nakadadaanen a lugan a maibilang a magmagna a lungon gapu iti pangta ti peggad nga itdenna kadagiti pasahero ken kadagiti publiko.#

Comments are closed.