Footer

SINURSURAN: Ti Pammadayaw

AGWALWALA ni Krisna, sir!

Impasabat kenkuana dagiti ubbingda idi rummuar iti backstage. Manarimaan ti Recognition Day.

Apay? masmasdaaw.

Saan a naawagan ni ma’am-mi. Nalibtawan.

Kaduana nga adbayser iti Grade 7 ti ibagbagada a ma’am-da. Kayaw-awagda a dua dagiti napadayawan kadagiti dua a section iti year level nga iggemda. Manarimaanen ti Grade 8.

Iti sango ti kuarto ti section ti kaduana, naimatanganna, permi nga ugaog ni Krisna. Nagsubli iti backstage a yan ti kaduana.

Imbagana ti naidanon kenkuana.

Adda met listaam, ma’am, apay a nalipatan ‘diay maysa nga ubingmo? inamadna.

Alla, wen, nga agpayso. Nalibtawak metten ti naganna, panangamin ti kaduana. Nagyamyaman ta kadagupan dagiti  napadayawan iti seksionna, awan ti pulos a nalibtawanna uray pay kadagiti special awards.

Dayta ita ti rigatna no agpapadan ti awards dagiti ubbing: With Honors no 90% ti average-da ngem di nangatngato ngem 95%. Dagiti nangatngato ngem 95%, With High Honors. Awanen ti makuna a First, Second, Third… Alphabetical payen ti pannakayawag dagiti mapadayawan. Saanen nga umuna ti kangatoan ti grado.

Di kad saan a nadlawan ti kaduana nga adda nalibtawanna. Uray pay dagiti agbuybuya. No koma kas idi pay laeng a First, Second, Third… ay, ket adda koma dagus rimsua a reaksion no Second ta kayaw-awag ket Fourth metten ‘ta simmaruno. Maikoreher a dagus.

Dagus a napan ti kaduana nga adbaysert iti ubingna. Pinagkalmana daytoy.

Nakitana, permi a pungtot ti ina ti ubing. Inayaban ti kaduana dagiti agina ket nagturongda iti office tapno saan a maeskandalo ti programa a maysa laeng a room ti baetda iti mini-gym a pakaang-angayan daytoy.

Naasian iti kaduana. Nalabit iti panagdardarasna itay a basaen ti listaanna– ta aldawen a narugian ti programa gapu iti dida tengngel a pasamak.

Naidawatna laengen a maurnos koma ti amin. Pakasarsaritaanto la ketdi manen ti pagadalanda dayta nga isyu.

Aglalo ket ar-aramaten ita dagiti dadduma a nagannak ti social media tapno ibandoda ti dida kayat iti pagadalan wenno pangipeksaanda ti sakit ti nakemda nupay saanda pay a napaneknekan ti ilawlawatda.

Iti seksionna, siniguradona itay nga awan ti malibtawanna.  Uray kadayta la a Fourth Grading ti panagpaayna nga adbayser (nai-transfer ngamin ti dati nga adbayserda), impaayna ti aminna. Kinutuanna amin a grado ken kinitana dagiti rumbeng a maikkan iti pammadayaw. Kinapudnona, inmitingna kadagiti ubbing nga addanto mabalbaliwan kadagiti gradoda iti Umuna agingga iti Maikatlo a Grading Period. Addada naduktalanna a biddut. Nalabit, iti panagdardaras ti dati nga adbayserda a makaipasa gapu iti yaakarna. Naimbag ta temporary card pay laeng ti nayisyuda iti kallabes gapu ta awan pay ti baro a format a simmangpet kadakuada.

Nakaanges iti nalukay idi asitgan ti kaduana kalpasan ti sumagmamano a minuto.  Naurnos kano met laeng ti parikut. Immanamong ti ubing ken ti inana a mai-award met laeng ti pammadayaw.

Kalpasan ngarud ti pannakapadayaw dagiti Grade 10, sakbay ti Grado 11, naisingit ti nalibtawan nga ubing iti Grade 7.

Itoy a pasamak, adda adal nga impaayna kenkuana.

Umuna: panagpakumbaba. Inaklon iti publiko ti kaduana ti biddutna ket nagkiddaw daytoy iti pammakawan kadagiti maseknan. Naimpusuan a panagkiddawna iti pammakawan iti sango ti tallaong. No sabali, maaramidda ngata ti kasta?

Nasakit man, ngem adda kinapudno nga iti propesionda, addada dagiti sobra ti kinangato ti timidda. Saanda a maaklon ti biddutda. Isuda pay ti adda masaona no madillawda. Wenno makoriher dagitoy.

Babaen ti panagpakumbaba, saan a rimmaba ti sakit a narikna dagiti maseknan. Iti naimpasnekan a panagdawat ti dispensar ti kaduana, nadepdep ti apuy nga agramaram koma.

Maikadua: napateg latta ti pammadayaw kadagiti ubbing ditoy nakaipalladawanna. Iti ngamin kallabes, ken uray pay kadagita kalkalpas a Recognition, addada dagiti ubbing a dida agparang a mangawat kadagiti nabulibolda. Sumangkautro met dagiti nagannak kadakuada. Awan man laeng ti panangiduron kadagitoy tapno ipategda ti bunga ti panagrigrigatda.

Pagangayanna, agbalinton a natamnay ti ubing iti sumuno a tawen.

Awanto met laeng ti serbina kada nanang ken tatang, mabalin nga ipempenna iti puso ken isipna.

Dayta la unay ti saanna koma kayat a mapasamak. Malagipna nga idi adda iti elementaria, nakaragragsak a nakaawat iti pammadayaw uray Most laeng. Ta pudno man met a nagrigatanna ken mayannatup a para kenkuana dayta.

Most Thrifty. Pinaneknekanna pay dayta babaen ti panangbalonna iti pagadalanda ti tallo lawas a kawayan a nagtubonganna iti sagsasalapi ken sagbibinting. Kakaasi a nangiyawid iti linaonna gapu iti kinabassit ti bagina.

Maikatlo: uray kasano ti panagsagana iti maysa a banag, dina kayat a sawen nga awanen ti pagkabsiwan. Ta ammona la unay, permi ti panagsagana ti kaduana. Insuratna pay ngarud dagiti ubbing a mapadayawan tapno addanto kodigona. Ngem no apay a dina naibasa ti maysa!

Napateg kadagitoy a situasion ti panagtalinaed a kalmado ti mannursuro. Ti ginubuay nga isyu, masolusionan latta babaen ti panagpakumbaba, kas nasaon.

ITI nabayag metten a panagisurona, agnanayon latta ti pannakaimatangna no kasano ti ragsak dagiti nagannak iti tunggal pammadayaw a maragpat dagiti annak. Aglalo la unayen kadagiti nagannak a di man laeng nakapadas a napadayawan idi agbasbasada pay laeng.

Ngem adda latta met dagiti nagannak a sabali ti paniriganna. Adu la amin dayta a pampammadayaw, kunkunada. Ti napateg, makalpaska. Saan a dita ti pakarukodan ti balligi.

Iti sabali a bangir, mabalin a hustoda. No aniakanto iti masakbayan, dayta ti pudno a pakarukodan no nagballigika wenno saan. Uray pay agkubkubbokan iti dagsen dagiti medalia a nayukkor kenka no saanmonto a matungpal ti arapaapmo, awan met laeng ti mamaayna.

Adda nabasana. Dagita kano pammadayaw, negatibo nga impluensia kadagiti ubbing. Isursurona kano dagiti ubbing nga amin laengen nga aspeto ti biag, masapul a makibalubal kasukat ti pammadayaw.

Mangrugi iti nursery, mano a salip ti mapaspasamak iti tinawen? Malaksid kadagiti sala ken ay-ayam, adda dita ti  salip iti kinnalaingan iti English, Math, Science kdpy.

Amin laengen, mapagsasalipan! Ti dayaw/pammadayaw, kadagiti ubing, iramanen dita ti coach ken ti sibubukel a pagadalan. No dadduma, iti laengen ubing a maikontes ti pakaitalimudokan ti atension ni mam wenno sir. Gapu kadayta pannakabigbig no maipangabakna ti ubingna.

Kasanon dagiti mabati nga ubbing iti eskuela? Kasano ti panagbasada?

Nupay kasta, saan a matallikudan ti kinapudno a gapu kadagiti maipapaay a pammadayaw kadagiti maikari nga ubing, agbalbalinda a pagsarmingan dagiti dadduma. Ken tapno agagawa ti tunggal maysa para iti arapaapna. No kasta la unayen ti ragsak ti umawat ti pammadayaw, anianto laengen no matun-oyna ti arapaapna?

Makuna ngarud a dagitoy a pammadayaw, positibo a banag a mangmuli iti panirigan ti maysa nga ubing.

Laeng, saan koma a malalaokan iti kinaganggandiong ti pannakaipaay ti pammadayaw. Arisiten a naimbag no asino dagiti pudpudno a pakaipaayanna. Ibasar iti no ania a talaga ti impakita ti tunggal agad-adal. Saan nga iti no ania la ditan a banag.

Tapno dida kunaen nga isu nga adda iti honor roll ta nag-donor roll!

Ket dayta ti sangkakitana. Saanna nga ipalubos a maimpluensiaan iti sabali a banag ti pangipaayanna iti pammadayaw. No asino ti maikari, isu ti pangipaayanna. Dina ipalubos a mamulitan ti naganna iti nagan ti pammadayaw nga ipapaayna kadagiti ubbing a naitalek kadakuada!