Footer

Imahe ni Apo Jesus Nazareno iti Quiapo, maipasiar sadiay Tagudin

RINIWRIW a deboto dagiti agdaydayaw iti imahe ni Apo Jesus Nazareno iti simbaan ti Quiapo, Manila. Gundaway met dagiti Katoliko iti Ilocos Sur ken kabangibangna a probinsia a makapagdaydayaw iti imahe ni Apo Jesus Nazareno iti Quiapo ta iti umuna a gundaway ket maipasiar daytoy iti Amianan a Luzon iti Parokia ti Kombersion ni San Agustin, Tagudin, Ilocos Sur inton Abril 28 agingga iti Mayo 6, 2018.

Naammuan ken ni Rev. Fr. Bernardo Gonzales, Kura Paroko iti Tagudin, ken Presidente ti Nueva Segovia Clergy, impakaammona a sabatendanto ti convoy a mangisangpet ti imahe ti Nangisit a Nazareno sadiay Bio, Tagudin, ti ka-Abagatanan a barangay ti Ilocos Sur, inton alas-2 iti malem ti Abril 28, 2018, ken maiprusisionto daytoy iti Karayan Amburayan sakbay a maitarus iti simbaan ti Parokia ti Kombersion ni San Agustin.

Maawagan ti pasken kas Daliasat Poong Nazareno a pakaiprusisionan ti imahe ni Apo Jesus Nazareno kadagiti innem a ragup wenno cluster ti barangay. Manipud alas-dos y media ti malem, maipan ti imahe iti ragup-barangay a pakaisayangkatan ti prusision ken maigibus iti Nasantuan a Misa iti alas siete iti rabii. Maisarunonto met ti salosalo wenno panagririnnanud iti taraon dagiti nakipaset iti Daliasat.

Maipaumian ti imahe ni Apo Jesus Nazareno iti simbaan ti parokia. Manipud alas singko y media iti bigat agingga iti alas dos iti malem ket mabalin dagiti deboto ti mapan agdaydayaw iti imahe iti simbaan ti parokia.

Ti Daliasat Poong Nazareno ket paset ti pannakarambak ti piesta ni San Agustin inton Mayo 5, 2018 tapno babaen ti pannakaipasiar ti imahena iti Tagudin ket ad-adda pay a mapauneg ti pammati dagiti pumarokia ken dagiti deboto a taga-Ilocos Sur ken dagiti agnaed kadagiti kabangibangna a lugar.

Naammuan pay ti panagtimpuyog ti parokia ken ti Municipal Government ti Tagudin nga idauluan ni Mayor Roque Verzosa Jr. para iti daytoy a naindaklan a naespirituan a pasken tapno mapagtalinaed ti urnos, kappia ken talna iti pagdaliasatan ti imahe ni Apo Jesus Nazareno a manamnama a daywento daytoy dagiti adu a Katoliko iti Ilocandia.

Inaldaw a nagadu dagiti Katoliko a mapmapan agdaydayaw kenkuana iti santuariona sadiay Simbaan. Minilion met a deboto dagiti makipagpaspaset iti tinawen a piestana wenno Translacion sadiay Quiapo a dagiti deboto ket aglilinnetletda tapno laeng makaasideg wenno makaulida iti karosa a nakaipalaonan ti imahe ken maaprosanda ti imahe ni Apo Jesus Nazareno. (Eden Alviar)

No comments yet.

Leave a Reply