Footer

Palarong Pambansa, pagtaudan dagiti nalaing nga atleta

MAKAPATANORTO ngata ti maang-angay a Palarong Pambansa kadagiti nalaing nga atleta a Pilipino a makisalisal kadagiti internasional a torneo kas iti Olympic Games, Asian Games, Southeast Asian Games ken dadduma pay a pagsasalipan dagiti umaayam iti nagduduma a pagilian?

Dayta ti nagkaykaysa a saludsod dagiti Pilipino a naayat iti sports kabayatan ti panangrugi idi kalman ti makalawas a Palarong Pambansa iti Ilocos Sur a pagsasalipan dagiti atleta nga estudiante iti elementaria ken sekundaria manipud kadagiti 17 a rehion iti Pilipinas.

Naindaklan daytoy a pasken a mangpadur-as ti sports iti pagilian ken iti Ilocos Sur. Kalaksidan dagiti nasurok a 15,000 a delegado nga atleta, coaches ken sports officials ken dagiti opisial ti Department of Education ket dimmar-ay pay dagiti nangato a lider ti gobierno.

Nagsayaat ti panggep ti Palarong Pambansa a pagsasalisalan dagiti atleta kadagiti nasurok a 30 nga events tapno mapadur-as ti sports iti pagilian. Adu a pondo ti mausar itoy a pasken nga ibaklay ti Nasional a Gobierno ken Provincial Government tapno mapadur-as ken maparegta dagiti lokal nga atleta ket igaedda ti agballigi iti tay-ak ti paay-ayam.

Panawen met dagiti sports patrons a mangdiskobre kadagiti atleta nga addaan iti naisangsangayan a talento ken potential a mangpadur-as kadagiti kabaelanda tapno agballigida iti tay-ak ti sports ket mabalin a mangipaayda iti dayaw iti lugar a nagtaudanda. No maaywananda a nasayaat ken maikkanda iti naan-anay a panagsanay ken pannarabay ket matubayda a mangirepresentarto ti Pilipinas kadagiti internasional a torneo ket no mangabakda, naindaklan a dayaw ti maipaayda iti pagilian.

Iti pakasaritaan ti Palarong Pambansa, masansan a ti National Capital Region wenno Metro Manila ti agbalbalin nga over-all champion a maibasar iti kaaduan dagiti abaken a balitok a medalia. Kangrunaan a rason iti kanayon a panagkampeon ti NCR ket sadiay ti ayan dagiti dadakkel ken nalatak a pagadalan iti publiko wenno pribado man, ken nagpupuniponan dagiti adu a nalaing nga atleta. Sadiay NCR ti ayan dagiti atleta a kabaelanda a suportaran ti nagastos a panagsanay dagiti makisalisal kadagiti sporting events.

Kadakkelan a pangta iti over-all champion ket dagiti rehion nga ayan met laeng dagiti dadakkel a siudad, kolehio ken unibersidad kas sadiay Region IV – A, Southern and Western Visayas nga ayan dagiti adu a nalimed ken sumingsingising nga atleta. Adda man dagiti rehion nga adu dagiti nalaing nga atletada ngem kaaduanna ket maarus dagiti umaayamda gapu iti nakurkurang a suporta kadagiti lugarda.

Naindaklan ti tulong dagiti torneo ti paay-ayam kas ti Palarong Pambansa iti pannakapadur-as ti sports program iti Pilipinas. Sakbay a makisalip dagiti atleta iti Palarong Pambansa ket nagdalandan kadagiti pasalip iti rehionda. Ngem kalpasan dagiti adu a tawen a maang-angay daytoy ket nakirang ti apit no ti pagrukodan ket bilang dagiti mangab-abak iti medalia kadagiti internasional a salisal kas ti Olympic Games, Asian Games ken uray iti SEA Games.

Uray no nakapatanoren dagiti nagkauna a Palarong Pambansa kadagiti nalatak nga atleta a nagballigi kadagiti international tournaments kas kada Lydia de Vega – Mercado a nagkampeon iti Asian Games ken nabigbig kas Asian Sprint Queen, ken Elma Muros – Posadas a sigud a kampeon iti long jump iti SEA Games. Agingga ita, saan pay a nangabak ti Pilipinas iti balitok a medalia iti Olympic Games. Bumabbaba ketdi ti ranking ti Pilipinas iti Asian and SEA Games.

Mainayon iti Palarong Pambansa, adu a lokal a paay-ayam ti igangannuat ti gobierno ken pribado a sektor tapno mapadur-as ti kabaelan dagiti atleta a Pilipino. Mangipapaay pay ti gobierno ti insentibo kadagiti mangabak iti medalia kadagiti international competitions tapno maguyugoy dagiti ubbing ken agtutubo a mangpadur-as ti kabaelanda iti sports. Ngem iti sango dagitoy a programa ket nakirang ti apit a medalia kadagiti prestihioso nga international sports competitions.

Nabukel met ti Philippine Sports Commission nga ahensia ti gobierno a mangtratar kadagiti pakaseknan ti sports ti pagilian. Adda pay ti Philippine Olympic Committee, pribado ken non-government organization a pagsalinongan dagiti amin a National Sports Associations iti Pilipinas, ken bigbigen ti International Olympic Committee a mangibagi ti pagilian iti Olympic Games, Asian Games, SEA Games ken dadduma pay a multi-event competitions. Ngem ania ngata ti gapu a saan a makapatanor ti Pilipinas kadagiti nalaing nga atleta a mangibayog ti bandera ti pagilian kadagiti international tournaments?

Mabalin a nakurang pay laeng dagiti sports program ken naan-anay a suporta ti gobierno ken pribado a sektor para kadagiti atleta. Nagadu man dagiti umaayam wenno tournaments, ngem nakirang ti kalidadda. Nasken ti pannakatakuat ken suporta kadagiti ubbing nga atleta nga addaan iti potential kadagiti individual event a mayanatup iti pisikal a kabaelan dagiti Pilipino. Nasken ti nasayaat a pannakaarisit dagiti nalaing nga atleta tapno maaywanan, masanay ken masuportaranda a nasayaat.

Kinalikaguman ti Provincial Government ti Ilocos Sur nga iti probinsiada ti pakaangayan ti Palarong Pambansa tapno mapadur-as ti sports, turismo ken komersio. Napaut a panagsagana ken dakkel a pondo ti maaramat iti daytoy a pasken ket sapay koma ta nabunga ti ipaayna iti probinsia ita ken iti masakbayan ta addanto met taga-Ilocos Sur a mangitag-ay ti bandera ti Region I kadagiti sumaruno a Palarong Pambansa, ken mangibayog ti wagayway ti Pilipinas kadagiti internasional a torneo. (Eden A. Alviar)

No comments yet.

Leave a Reply