Footer

Panagbalin a government center ti San Ildefonso, nairakurak

SAN ILDEFONSO, Ilocos Sur – Mainayon iti pannakabangon iti San Ildefonso, Ilocos Sur ti maipampanakkel nga Ilocos Region Campus ti Philippine Science High School, Land Transportation Office, ken National Irrigation Administration, manannama pay ti pannakayakarton ti opisina ti Philippine Statistics Authority tapno maparegta ken mapadur-as ti ekonomia ti ili.

Dayta ti inrakurak ni San Ildefonso Mayor Atty. Mark Purisima kabayatan ti pannakiuman kenkuana dagiti kameng ti Ilocos Sur Integrated Press bayat ti Kapihan iti Amianan Media Forum iti Municipal Hall.

Impakaammo ni Mayor Purisima a dayaw ti ilida iti pannakabangon ti PSHS Ilocos Region Campus iti Brgy. Poblacion East uray limitado laeng ti ingreso a maipaayna iti ilida. Inaklonna a dakkel a tulong iti mapastrek iti ilida ti pannakayakar ti LTO Vigan District Office iti San Ildefonso ta kalaksidan iti ingreso, mismo pay a ti Rural Health Office ti pangalaan ti medical certificate dagiti agaplikar ti lisensia wenno permit nga agmaneho.

Inlawlawagna a libre ti lote ken pasdek nga impaay ti Municipal Government a pagyanan ti LTO. Madama metten ti panangpabangonda iti pasdek a maipaupanto kadagiti kompania iti insurance a mangidiaydiaya iti seguro ken serbisio para iti pannakaparehistro ti lugan nga iti agdama ket naibalayda laeng kadagiti kalapaw wenno temporary offices.

Impalgakna a manamnaman ti yaakar ti PSA office iti San Ildefonso a saan a natuloy iti naglabas gapu iti problema ti dokumento iti daga a pakabangonan ti pasdek. Impakammona pay ti planoda a maipausar dagiti adu ken nalawa a pasilidad ti NIA nga ayan ti opisina ti Banaoang Pump Irrigation Project gapu ta bassit laeng dagiti agtatrabaho iti nalawa a compound ken nakasaysayang ti sanikua ti gobierno no saan a naan-anay ti pannakaaramatna.

Impakaammona pay a madadaan ti Municipal Government a mangpasangbay kadagiti government offices nga addaan iti adu a transaksion tapno mabenepisiaran met ti ilida ken dagiti umili. Impalgakna a manamnama a maileppas dagiti construction projects iti Municipal Hall ken iti aglawlawna sakbay nga agtapos ti tawen. Inlawlawagna a nabuntog ti pannakaileppas dagitoy a proyekto gapu ti limitado a pondo, ngem manamnaman iti isasangpet ti dakkel a budget allocation dagiti proyekto. Impakaammona pay ti planoda a mangpadur-as ti turismo babaen ti pannakagatangen ti nalawa a pribado a daga iti abay ti Karayan Bantaoay a mapagbalinto a River Cruise Area. Impakaammona pay ti panggepda a mangbangon iti historical attraction maipanggep ti 1807 Basi Revolt tapno mapadur-as pay ti turismo. Impalgakna pay ti planoda a mangparegta ti industria ti basi ken suka kas One Town One Product.

Iti mainaig a damag iti PSHS Ilocos Region Campus iti met laeng San Ildefonso, inrakurak ni Campus Director Ronnalee Orteza kabayatan met laeng iti Kapihan iti Amianan Media Forum nga agdagup iti 79 dagiti candidates for graduation ti umuna a batch ti Senior High School, ket 10 kadagitoy ti taga-Ilocos Sur. Impakaammona a maangayto inton Mayo 30, 2018 ti graduation ceremony ket mismo a naimbitaran a sangaili dagiti nangato nga opisial ti Department of Science and Technology.

Impakaammo pay ti Campus Director ti agtultuloy a pannakabangon dagiti pasdek, laboratory ken dadduma pay a pasilidad tapno agbalin ti PSHS a competitive kadagiti amin a pagadalan. Impalgakna ti plano a pannakabangon ti planetarium iti campus ground a maysanto kadagiti atraksion iti PSHS.

Inyawis ti Campus Director kadagiti agbasbasa iti elementaria nangruna kadagiti sumrek iti Grade 5 – 6 ti panagsaganada para iti Entrance Examination ti PSHS tapno no maipasada ket agbalinda a full scholar iti panagbasada agingga iti Grade 12 ket dakkel a benepisio ken pribelehio dagiti magun-odda kas ti libre a matrikula, stipend, ken nagduduma nga allowances. Impasingkedna pay kadagiti nagannak ti natalged ken nasayaat a pannakatubay ken panagadal dagiti annakda nga agnaed ken agadal iti PSHS Ilocos Region Campus. (Eden Alviar)

Comments are closed.