Footer

SINURSURAN: Ti “Isliping Teody Ken Dadduma Pay a Sarita”

CONGRATS, atanud!!! Agpaalakan, sir!

Agsasaganad a pangablaaw ti naawatko apaman a naiposte iti Facebook ti draft ti akkub ti mabukbukel a librok.

Ragsak ti immapay kaniak. Iti udina, addanton bukodko a libro.

Malagipko nga idi damok ti agessem nga agsuratsurat (hayskulak idi), malaksid iti arapaapko a makaipablaak koma (ta nangrugiak a nagdandaniw kadagiti estasion ti radio ditoy Tanap) kadagiti magasin, kangrunaan a dinarepdepko ti makaipablaak iti libro nga agbalinto met a pakalaglagipan kadagiti sumaruno a henerasion.

Ken kunadan sa pay itay a mabalindakan nga ibala iti kanion no addaankan iti anak, naimula a kayo ken nairuar a libro!

Isu a no kasta nga adda rummuar a libro dagiti pagtamdak a mannurat, ad-adda a bumangon ti reggetko a makaipablaak met.

Ngem naatap ti gundaway. Saan a kas karina ti makaipablaak iti uray bassit laeng a sinurat.

Ania ngarud ti urnongek nga ilibro no sumagsaggaysa met ti maipablaak iti makatawen?

Diak met kayat ti agsurat lattan iti kaykayatko ket paipablaakko a kas libro. Anianto laengen ti makuna dagiti makabasa?

Intuloyko latta ngarud ti timmabuno kadagiti kombension dagiti mannurat nga Ilokano iti tunggal bulan ti Abril. Ditoy, naasa ti talugading nga insagut ti Namarsua. Nupay adu latta ti pannakarediek iti publikasion, umad-adu ketdin ti rummuar a sinuratko iti tunggal tawen.

Gapu ta ibilangko a napateg a gameng dagitoy, inur-urnongko tapno addanto mausar iti masakbayan. Inan-anusak nga impenpen uray pay dagiti sinurat idi panawen nga uso pay laeng ti makinilia.

Idi nakaurnongakon iti naan-anay a sinurat a mangbukel iti maysa a libro, saan pay laeng a nagmata dayta nga arapaap. Saan ngamin a kasta ti kalakana ti agipablaak iti libro. Dakkel a kantidad ti masapul.

Banag nga awan ti pangalaan. Awan pay ngamin idi ti regular a panggedan. Sa maysa, dumakdakkel ti binangonko a bukod a pamilia.

Ngem saan a daytoy ti nangupay iti arapaapko a makailibro a bukbukod.

Agingga a nariing ti makunkuna a tagnawa kadagiti kabaddungalan a mannurat. Mangiruarkami iti libro ngem panidnan bayadannan.

Dagus nga innalak daytoy a gundaway. Basbassit la nga amang ti bayadan. Daydiay laeng ta adukami nga autor ti libro.

Nupay kasta, nagpaiduma a ragsak ti ginubuayna iti kaunggan. Adda met laengen nailibro a gapuanak iti Ilokano.

Ngamin, immuna a naipablaak iti libro dagiti daniwko a Filipino. Daytoy ti nakaurnongan dagiti gapuanan dagiti 100 a mannaniw ti HomeLife magazine. In Time Passing, There Are Things ti paulo ti libro. Kaduak nga autor ditoy ni Manong Jimmy M. Agpalo, Jr. a dati a kolumnista ditoy Tawid.

Iti pannakairaman dagiti sinuratko kadagiti nadumaduma a libro nga Ilokano, ad-adda laeng a nariing ti essemko a makaipablaak iti bukodko a libro.

Gapu ta saan nga umanay ti matgedan iti binulan para iti pamilia, saanak latta a dagus a nakaurnong para iti arapaapko a libro. Umad-adu latta ti kasapulan iti uneg ti pagtaengan.

Kaanonto ngata, aya, a mayurnongak? nasaludsodko payen iti bagik.

Agingga nga adda kellaat a naggilap nga ideya. Dagiti maaw-awatko iti Tawid, mabalin nga urnongen!

Kasta ngarud ti inaramidko. Saanko a kinuti ti honororiumko ditoy TNM itay napan a tawen. Sa innayonko ti naawatko iti umuna a quarter kadaytoy a tawen.

Ne, ket addan umanay!

Kinumpirmak a dagus ken ni Apo Ariel S. Tabag, editor ti daniw iti Bannawag, a matuloy ti panagilibrok. Isu ti makaammo, kas tulongna kadakami, a mangipagna ti ISBN-na, mangdisenio iti akkub, mangi-layout ken aminen. Ti laeng ubraen, ipatulod kenkuana ti manuskrito.

Dakkel a pagyamyamanak ken ni Atanud Ariel daytoy a banag.

Isu nga iti udina, agmatan ti arapaapko a makailibro. Rummuaren itoy a bulan ti Isliping Teody ken Dadduma Pay a Sarita.

Linaon ti libro ti sangapulo ket lima a sarita nga immunan a naipablaak iti Bannawag ken ditoy TNM.

Iladawan dagiti sarita dagiti makapaisem, makapakatawa, makapaellek a paspasamak iti biag. Napilik a tema daytoy ti libro ta mamatiak a makapalag-an iti rikna kadagiti mangbasa.

Aglalo ket panawen ita ti panagdardaras! Dagiti makapa-stress a bambanag! Maitutop laeng nga adda bassit pangiliwliwagan kadagiti babantot iti biag.

Maitampok iti libro ti sarita nga Isliping Teody. Nagun-od idi daytoy ti Maikatlo a Gunggona iti salip ti sarita a makapakatawa.

Maipalagip a namunganay ti istoria ti Isliping Teody iti imbinsabinsa ni Manong Jimmy iti librona nga Iti Duyog Ti Singasing. Trinatarna dagiti panglakagan tapno makasurat ni mannurat iti makapakatawa a sarita. Saan kano a basta makapakatawa iti panagkuna ket makapakatawan. Pagarigan, naikaglis wenno naidaramudom ‘diay tao, kinatawaam pay. Saan kano a makapakatawa dagita nga eksena. Ken no pinagbalinmo a nakakatkatawa ti depekto ti maysa a tao, saan kano a nakakatkatawa dayta—ta addada masaktan. Ti panagisem, panagkatawa, nasken a natural nga agubbog iti agbasbasa. Saan a mapilpilit.

Iti libro, nangted iti ideya ni Manong Jimmy iti mabalin a suraten a nakakatkatawa. Isu daytoy ti Isliping Teody a naipadron iti nalatak nga istoria nga Sleeping Beauty.

Palubosanka, dear reader, a mangsurat itoy a balabala, kasta ti kinuna ni Manong Jimmy iti librona.

Apagisu kadagidi a panawen nga adda pasalip iti humorous story. Ania pay, pinadaskon a sinurot ti balabala nga inted ni Manong Jimmy. Insalipko a dagus. Saan nga ammo ni Manong Jimmy dayta.

Ket anian a ragsakko idi mapili a maysa kadagiti nangabak a sarita. Isu pay laeng ti panangipakaammok ken ni Manong Jimmy.

Ad-adda ti ragsakko, ading, kinunana, no makatulongak kadagiti padak nga agsursurat wenno kadagiti agbasbasa. Congratulations!

Anian a kinapakumbaba ni Manong Jimmy!

ITA, kas pangsubadko ken ni Manong Jimmy kadagiti naitultulongna iti panagsuratko, maminsan pay nga itampokko ti intedna a balabala. Isu a daytoy ti napilik a paulo ti libro a mayalnag kadaytoy masungad a kombension dagiti mannurat nga Ilokano—ti GUMIL (Gunglo Dagiti Mannurat nga Ilokano) @ 50. Maangay daytoy iti Moonlite Resort iti ili ti Sta. Ana, Cagayan itoy nga Abril 20-22.

Awisenka ngarud nga umayto koma dumar-ay, kailian.

Kadagiti met interesado a maaddaan iti kopia ti nasao a libro, mabalindak a kontaken iti FB. Wenno i-email iti [email protected].

Ta sangsangkamaysatayo a mangnanam kadagiti padpadas iti Isliping Teody ken Dadduma Pay a Sarita!

No comments yet.

Leave a Reply