Footer

BANNER NEWS: 15,000 nga atleta nagsasalisal Palarong Pambansa iti Ilocos Sur

VIGAN CITY – DIMMANON iti nasurok a 15,000 nga atleta nga estudiante manipud kadagiti 17 a rehion iti intero a Pilipinas dagiti nagsasalisal iti nasurok a 30 nga sports events kabayatan ti naangay a Palarong Pambansa sadiay Bantay, Ilocos Sur, Vigan City ken nagduduma nga ili iti probinsia idi Abril 15 – 21, 2018.

Maibilang a maysa kadagiti kadaegan iti pakasaritaan ti Palarong Pambansa manipud pay idi 1948 ti kaudian a pannakaangay ti torneo iti Ilocos Sur gapu iti nainget a panagsagana ti Department of Education, Provincial Government ken dadduma pay nga ahensia ti gobierno a nangsangaili kadagiti rinibu a delegado ken sangaili iti probinsia kabayatan ti makalawas a nailian a torneo.

Kangrunaan a nasangaili iti opening ceremony iti Palarong Pambansa a naangay iti Quirino Stadium, Bantay ket da Presidente Rodrigo Duterte, Executive Secretary Salvador Medialdea, DepEd Secretary Leonor Briones ken Undersecretary Tonisito Umali, Philippine Sports Commissioner Ramon Fernandez, ken dadduma pay a nangato nga opisial ti National Government. Indauluan ni Governor Ryan Singson ken Vice Gov. Jeremias Singson dagiti agserserbi iti Provincial Government, ken Bantay Mayor Samuel Parilla II dagiti lokal nga opisial a nangpasangbay kadagiti bisita. Kinadua ni Msgr. Gary Noel Formoso, Kura Paroko iti Parokia ni San Agustin iti Bantay, dagiti pastor ken imam iti Ecumenical Prayer.

Narugian ti Palarong Pambansa idi tengnga ti aldaw ti Abril 15 babaen ti panagparada dagiti atleta iti sentro ti Bantay ken Vigan a naigibus iti Quirino Stadium a nakaisayangkatan ti opening ceremony iti alas dos iti malem. Nagsasaruno dagiti delegado iti tunggal rehion a simrek ken nagparada iti oval iti stadium, ken nayam-ammo kadagiti nagbuya babaen kadagiti Master of Ceremonies pakaibilangan ti sigud a tennis champion ken broadcaster Dyan Castillejo.

Nagpaay a flag bearer ti bandera ti Pilipinas dagiti Pilipino nga atleta a nangabak kadagiti international tournaments a da Olympic silver medalists – boxer Mansueto Velasco ken weighlifter Hidilyn Diaz, World bowling champion Paeng Nepomuceno, world billiard champion Efren Bata Reyes, chess grandmaster Eugene Torre, swimmer Eric Buhain, runner Elma Muroz ken maysa nga ROTC cadet ti University of Northern University.

Nalukatan ti opening program babaen ti mensahe ti panangpasangbay ni Mayor Parilla kadagiti delegado. Naaramid met ti turn-over ti Palarong Pambansa banner ken ni Gov. Singson manipud iti pannakabagi ti DepEd ken Local Government Unit ti Antique a nakaangayan ti torneo idi 2017.

Iti panagsarita ni Gov. Singson, impaganetgetna ti kinapateg ti sports, ken kinaritna dagiti atleta nga ipamaysada a gun-oden dagiti arapaapda iti nasayaat a wagas. Pinagyamanna met dagiti coaches ken trainers iti panangbayabayda kadagiti atleta tapno agballigida kadagiti tarigagayda.

Naaramid ti pannakaibayog ti Palarong Pambansa banner babaen kada Vice Gov. Singson, PSC Commisioner Fernandez, Interior and Local Government Undersecretary Marjorie Jalosjos ken dadduma pay nga opisial ti DepEd. Naibayog met dagiti 17 a regional banners babaen kadagiti regional directors. Nagangtan ti Friendship Cauldron babaen ti panangpana ni Luis Gabriel Moreno, Youth Olympic Games Gold Medalist. Indauluan met ti Oath of Sportsmanship and Amanteurism ni Luigi Christian Tolentino, gold medalist iti Region 1 Atletic Association ken agad-adal iti St. Paul College of Ilocos Sur. Naisaruno ti panagsapata dagiti officiating officials.

Iti panagsarita ni Sec. Briones, dinayawna ti panagsagana dagiti taga-Ilocos Sur iti pannakaangay ti Palarong Pambansa. Pinagyamananna met ni Presidente Duterte iti suportana iti DepEd ken iti edukasion, ken ti saanna a pannakimitir iti pannakapili ti sumaruno a pakaangayan ti torneo inton 2019 sadiay Davao City.

Inyam-ammo ni Sec Medialdea ni Presidente Duterte kas guest speaker. Iti mensahe ni Presidente Duterte sakbay ti pormal a panangilukatna ti Palarong Pambansa, dinayawna ti Ilocos Sur iti panagsaganada a pakaangayan ti nailian a torneo iti maikatlon a daras. Impaganetgetna a napateg dayta a gundaway tapno maitandudo ti kultura dagiti Ilokano ken mairakurak ti pakasaritaan ti Ilocos Sur.

Impalagip ti Presidente a ti Palarong Pambansa ket saan laeng a pagtaudan dagiti nalaing nga atleta ti Pilipinas a makisalisal kadagiti torneo iti ganggannaet a pagilian, ngem pagsanayan pay dagiti lider iti masakbayan. Binalakadanna dagiti atleta nga ipategda ti sports ken physical education, ngem nasken a balansienda ti panawenda iti academics ken dadduma pay a paginteresanda iti biag. Pinalagipanna met dagiti nagannak nga ammuen ken suportaranda dagiti annakda iti sports tapno mailisida kadagiti dakes a bisio ken illegal nga aramid. Impasingkedna ti agtultuloy a panangikagumaan ti administrasionna para iti natalged ken nagin-awa a panagbiag.

Naitultuloy dagiti nagduduma a paset ti programa kalpasan ti ipapanaw ti Presidente agraman ti fireworks display. Kalpasan ti opening ceremony, naragsak dagiti atleta a nagsubli kadagiti eskuelaan a nakaitarusanda manipud Sinait agingga sadiay Santa Maria.

Iti sumaruno nga aldaw, naangay dagiti nagduduma nga sports events iti nagsisina a venue iti Quirino stadium ken kadagiti nadumaduma a lugar iti Vigan City ken dadduma pay nga ili. Inyalat ti tumataray a ni Leslie de Lima ti umuna a balitok a medalia iti Palarong Pambansa 2018.

Bayat ti pannakasursurat daytoy a damag, umun-una iti medal tally ti National Capital Region a defending champion a nangdominaren iti 13 tawen ti Palarong Pambansa.  (Eden Alviar)

Comments are closed.