Footer

Bin-i (Maikatlo a paset)

“MASAYA akizzz!” inggaratigit ni Sir George iti dayta a malem a nagrana ti bakantemi. Addakami iti office a kaduami a nabati da Ma’am Lianne ken Ma’am Jonaliza.

“Apay, sir?’ intaliaw ni Ma’am Lianne a nakapuesto ti lamisaanna iti sanguanan ni Sir George.

“Nagngangato ti naala dagiti ubbingkwo iti eksamda, bakla!” imparagipig pay ni Sir George.

“Napiaka pay, sir,” immisugsog ni Ma’am Jonaliza. “Ngem dagitay ubbingko, ngannganin agrikep ti klase, adu pay laeng ti nganngani di makabasa a Grade 7.” English ti subject-na kadakuada.

“Ay, wen, ma’am, pagyamyamanak iti dakkwel ta nangangato dagiti ag-under kaniak iti Beauty Care iti Grade 9 ken 10. Ilaklak-amda dagiti addwa iti Grade 7 ken 8.”

“Ania ti sikretom, aya, sir?” sinaludsod ni Ma’am Lianne.

“Adda dayta iti panagisuro, beshie,” nanglangit ni Sir George. “Di kadwi, sir?” pagammuan ta inkitana kaniak.

Nagtung-edak laeng. Aglalo ket nalagipko ti nagbaba manen nga eksam dagiti iggemko nga ubbing iti TLE 9 ken 10. Pagyamyamanak ketdi ta makitak nga adda namalbaliwan ti ugalida no kasta nga ag-garden-kami. Saandan a naimis nga aggamulo iti daga. Saandan a kas idi damo nga arig dida kayat ti madagaan. Wenno mapagbalon kadagiti masapulmi nga agdalus.

Nadisnudoda payen nga agsibug kadagiti nadumaduma a mulami a nateng. Uray no saanmi a klase, agsibugda, aglalo no imulagat ni Apo Init, kalpasan ti maudi a klase iti malem. Uray saanko idan a baonen.

Sabagay, sangkakunak kadakuada nga awanto a pulos ti mamaay dagiti intukitmi a bin-i no dida ammo nga ipateg dagitoy. Nakunada ngamin nga idi Grade 7 ken Grade 8-da, agga-garden-da met maminsan iti makalawas. Ngem pulos a dida napagbunga wenno naramanan dagiti immulada.

Saan kano ngamin nga inwanwan ida ni Sir George. Kasla kano maar-ariek a makakita iti daga. Bambannikesanna latta idan nga agdaldalus ken agmulmula. Agpepeysbuk ketdi a mangbambantay kadakuada. Kalpasanna, awanen. Saandan a mapan kitaen no nagbiag dagiti immulada. PTB wenno Para Tungpal Bilin a makuna. Kaykayatnan ti aggian iti uneg ti klase nga agpakpakopia.

Pagyamyamanakon dagita a nadlawak kadagiti ubbingko. Bay-amon no nababa ti maal-alada kadagiti eksam. Sa maysa, millenials dagitoy nga ubbing. Sabalida. Mabalin a masursuroda amin nga adda iti libro babaen ti internet, social media ken pannakilangenda iti aglawlaw. Isu a no maminsan, kasla awanen ti papel ti titser kadakuada. Mangbayabay laengen, kasta. Isu a napintasen nga accomplishment ti pannakaimatangko nga in-inut nga ipategda ti panagmulamula kas aplikasion ti subject-mi.

BIERNES. Makumikom dagiti ubbingmi nga agpa-sign kadagiti clearance-da. Eksamda inton Huebes ken Biernes iti sumaruno a lawas. Saan laeng a mapupuotan, agrikepto manen ti klase.

Isu a dagiti kakaduak, busy-da payen nga agar-aramid iti ipaeksamda. Deadline dagiti maipasa nga eksam ‘ton Lunes ta itsekto pay ni Sir Omar sakbay a maipa-xerox. Narugiakon ti nagaramid. Ngem adda pay leppasek a topiko iti AP 9 ken TLE 10 a subject-ko. Sabagay, kayak dayta. Adda pay tallo nga aldaw inton umay a lawas. Nalpasko ketdin dagiti topikok iti TLE 9.

“Agrebiutayon, sir?” sinaludsod ni Dinan idi sumrekak iti kuartoda.

“Masapul kadi pay nga i-review-kayo?” sinaludsodko idi makaplastarak iti sangoda.

“Wen, a, sir, tapno ngumatokami kas kalkalikagumam.”

“Basaenyo lattan dagiti notebook-yo. Saanak met nga agpapaeksam iti saantayo a nalpas. Nadlawyo met ngatan daytan kadagiti immuna a grading period?”

“Please, sir,” impakaasi ni Lyra Mae.

“Idi siak ti hayskul, awan la ti kasta, class. Dua lawas pay sakbay ti eksam, saankamin nga agtalna. Notebook-mi la ti sangkaiggem ken basbasaenmi. Dakayo ketdi, diak pay makita nga agrebiukayo. Nakarel-relax-kayo. Selpon, a, isu ti sangkaiggemyo.”

“Saan ngaminen a masapul pay nga agrigatkami nga agrebiu, sir,” ni manen Dinan. Permi a pakuyegyegna iti tugawna.

“Ania ti kayatmo a sawen?” Naipalagip ti isyu a kayatko koma idi a lawlawagan ngem naliplipatak metten.

“Manipud pay Grade 7-kami, sir,” intakderen ni Dinan, “nasanaykamin a maparparebiu. Masungbatan dagiti saludsod. No ‘A’ ti sungbatna, kastanto met laengen iti kinaagpaysuanan. Di man la mabaliktad dagiti pagpilian. Pagangayanna, sir, ikabesami lattan dagiti sungbat.” Permi a panagkatawana. “Uray pay dagiti Identification, True or False, wenno Enumeration!”

Napamulagatak kadayta a nangngegak. Saanak a nakasao a dagus.

“Ngem sika, sir,” intakder lattan ni Dexter, “agpaysu a nagrebiutay’ iti naglabas. Ngem saan met a dagiti sinaludsodmo ti rimmuar idi nageksamkami. Nabaliwan met!”

“Kas nakunakon,” naalak met laeng ti nagsao, “no review, masapul a ma-refresh laeng iti utekyo dagiti nalpastayon. Masaludsod dagitoy ngem saanna a kayat a sawen nga isu ti eksakto a rummuar iti eksam. Ania laengen ti serserbi ti eksam no maisubo kadakayo?” Napasennaayak iti nauneg. Sinaggaysak ida a miningmingan. “Ala, man? Naragsakkayo kadi a nangato ti naalana no diyo nagrigrigatan. Ken awan man laeng ti nabati iti utekyo kalpasanna?”

Dida nakauni. Kurimed ti panagkikinnitada.

“Kas nakunakon, class,” intuloyko, “ad-adda koma, a ti ugaliyo ti matubay ditoy pagadalan. Ti sirib a yal-allatiwmi kadakayo a nagtaud kadagiti libro, mabalin a masakdoyo a bukbukod iti internet wenno social media. Anything under the sun, addan iti internet. Ngem ti pannakatubayyo a kas tao, class, awan! Kitaenyo laengen, napalaus ti ragsakyo idi damotayo nga apiten ti bunga dagiti intukittayo a bin-i idiay garden. Maay-ayatankayo a nagkali iti kammotit, nagburas kadagiti utong ken tarong ken naguggot iti bilunak nga inyawidyo. Malagipko a kunayo a saan a kasta ti ragsakyo no dumawdawatkayo iti uggot ti kammotit wenno bulong ti marunggay kadagiti kaarrubayo.”

Nagkikinnitada. “Kayatko a sawen, class, ti maysa a banag, nasamsam-it a gun-oden ti bungana no nagrigatanyo daytoy. Kasta met ti eksam.”

(ADDA TULOYNA)

Comments are closed.