Footer

Comelec Officer: Adda dagiti barangay nga awanan iti kandidato iti SK Election iti Ilocos Sur

VIGAN CITY ­– KAS kadagiti nagduduma a barangay iti adu a paset ti Pilipinas, adda dagiti barangay iti Vigan City ken Ilocos Sur nga awanan wenno agkurang iti kandidato a para Chairperson ken kagawad ti Sanguniang Kabataan inton Mayo 14, 2018.

Dayta ti kinompirmaran ni Atty. Leonila Fortuna, Vigan City Commission on Elections Officer, a nangibagi ken ni Atty. Rhodora Arrocena, Ilocos Sur Comelec Provincial Officer, kabayatan ti naangay a Dap-ayan Ilocos Sur Media Forum sadiay Sangguniang Panlalawigan Hall, Provincial Capitol, Vigan City idi Mayo 3, 2018.

Kinompirmar ti Comelec Officer nga adda maysa a barangay iti Vigan City nga awan ti kandidato a para SK Chairperson ken adda dagiti barangay ti agkurang dagiti agkandidato a para kagawad, kas met laeng kadagiti dadduma pay nga ili ken siudad iti Ilocos Sur ken kadagiti nagduduma a lugar iti Pilipinas.

Inlawlawagna nga iti kaawan dagiti mabutosan nga SK Official, ket addanton iti Department of Interior and Local Government a mangilungalong ti pannakaisayangkat ti special election para kadagiti bakante a posision ti SK. Impakammona pay a nakasaganan ti Comelec iti pannakaisayangkat ti nadalus nga eleksion uray pay mano-mano wenno manual ti pannakabilang dagiti botos. Impalgakna a dagiti balota a nayimprenta para idi koma Oktobre 2017 a Barangay and SK Elections ket mausar iti daytoy nga eleksion tapno saanda a masayang.

Inaklonna a maysa kadagiti gapu ti kinakurang dagiti agkandidato iti SK Election ket ti paglintegan a mangipawil kadagiti agngayangay nga adda kapamilia wenno asideg a kabagianna a nabutosan nga opisial ti gobierno, ken adu kadagiti agtutubo ket madamada nga agbasbasa iti sabali ken adayo a lugar.

Nagballaag pay ti Comelec Officer nga iti agdama ket maisaysayangkat ti Election Gun Ban babaen ti Philippine National Police ket dagiti matiliw nga aglabsing ket mapilaan iti nadagsen a kaso. Nagpalagip pay kadagiti illegal nga aktibidad iti panawen ti kampania a nangrugi idi Mayo 4 agingga inton Mayo 12. Nagapila iti publiko nangruna kadagiti kandidato ken dagiti pasurotda a pagtalinaedanda koma a naurnos ken nakappia ti masungad nga eleksion babaen ti panangsurotda kadagiti pagallagadan.

Iti dayta met laeng a media forum, nasangaili pay da Benjamin Pacris, Presidente ti Gunglo dagiti Ilokano a Mannurat iti Ilocos Sur, ken Danilo Bautista, GIS Director, agpada a premiado a mannurat. Nagsaritada maipanggep kadagiti plano ti gungloda mainaig iti pannakarambak ti Cultural Heritage Month. Impalgakda ti plano ti GIS a mangsangaili iti Ilocos Sur ti maika-51 nga annual convention ti Gumil Filipinas inton 2019; ti pannakailibro dagiti premiado a sarita a sinurat dagiti taga-Ilocos Sur; ken panangiwayatda iti seminar-workshop para kadagiti kameng ti media iti panagsurat ken pagaramat ti otograpia ti Iluko. Impalgakda pay ti agtultuloy a panangiwayatda ti Iluko writing seminar-workshop para kadagiti agtutubo ken estudiante tapno mataginayon ti nakayanakan a pagsasao dagiti Ilokano. (Eden Alviar)

Comments are closed.