Footer

DOST training forum a makatulong iti panagdur-as, maangay sadiay Sinait

VIGAN CITY – Mangangay ti Department of Science and Technology Ilocos Sur Office iti nadumaduma a training forum a makatulong iti panagdur-as dagiti umili iti Ilocos Sur kangrunaanna dagiti agindeg iti Umuna a Distrito a mangitantandudo kadagiti medium, small and micro enterprises. Maisayangkat ti training forum sadiay gymnasium ti Sinait National High School, Sinait, Ilocos Sur inton Mayo 9 – 11, 2018.

Daytoy ti kangrunaan nga impakaammo ni DOST Provincial Director Ramon Sumabat kabayatan ti pannakiuman kenkuana dagiti kameng ti Ilocos Sur Integrated Press iti Kapihan iti Amianan Media Forum.

Impakaammo ni Dir. Sumabat a dagiti maisayangkat a training ket pakairamanan ti “Preservative Treatment of Round and Split Bamboo; Engineered Bambo Products; Bamboo Charcoaling; Salt Processing and Iodization; Garlic Value-Adding and Black Garlic; Food Safety for Food Handlers; Regional Standards and Testing Laboratory Services; ken DOST programs and Projects for MSME’s. Impalgakna pay a maangay ti livelihood and technology training iti panagaramid iti arak ken sabon.

Inrakurak ti DOST Provincial Director a dagitoy a panagsanay ket napateg a makatulong kadagiti babassit a komersiante a mangpadur-as ti negosio ti kawayan ken ekonomia, ken kadagiti garlic farmers iti probinsia. Impakaammona pay ti pannakaipaay ti libre a serbisio ti calibration dagiti pagkiluan ken healthcare services. Impakaammona a ti DOST caravan ket pagtinnulongan nga iwayat ti ahensiada ken da 1st District Rep. DV Savellano, Provincial Government of Ilocos Sur nga idauluan ni Gov. Ryan Singson, ken lokal a gobierno ti Sinait iti liderato ni Mayor Glen Guzman.

Impakaammona pay a kalaksidan ti technical assisitance nga ipapaay ti DOST kadagiti medium, small and micro enterprises, ket madadaanda pay a tumulong para iti cost of equipments a kasla pautang nga awan interesna a mabayadanto met laeng ti natulongan. Inyawis pay ni Dir. Sumabat kadagiti agad-adal iti high school ken nagannak iti kaadda dagiti full scholarship grants nga ipapaay ti DOST para ti nadumaduma a kurso, ken panangiyempleoda kadagiti scholars iti ahensiada kalpasan a makaturposda kadagiti kursoda. (Eden Alviar)

Comments are closed.