Footer

BAG A NAGKARGA ITI PALTOG, NAIPAIMA ITI POLIS

QUIRINO, Ilocos Sur – Insurender ti maysa a negosiante ti maysa a bag a nagkarga iti maysa a paltog iti Quirino MPS idi Mayo 7 iti oras ti alas dose y media ti aldaw.
Nagreport idi Mayo 7, 2018, 12:30 iti malem, ni Rufino Tangliben y Maspilan, 52, awanan asawa, negosiante ken residente ti Brgy. Poblacion, Quirino, Ilocos Sur, iti Quirino MPS nga adda bag a naglaon iti maysa a paltog a nabati iti sango ti puestona. Kuna ni Tangliben a nakitana ti bag idi pay laeng bigat ti Abril 30, 2018. Gapu ta mano nga aldawnan idiay ti bag, apanna kinita ket idi lukatanna, nakitana nga adda paltog a kargana isu nga apanna inreport iti MPS.
Naduktalan dagiti nagresponde a pannakabagi ti linteg idi napanda iti lugar a nakakitaan ni Tangliben iti nasao a bag. Nakitada ti maysa a homemade buckshot (handgun) nga awanan marka ti linaon ti bag.
Idi napagsaludsodan ni Tangliben no asino ti nakabati iti bag, imbagana a dina ammo. Naipaiman iti Quirino MPS ti bag ken ti kargana a paltog para iti umno a disposision. (Tawid News Team)

Comments are closed.