Footer

Bin-i (Maudi a paset)

Awan latta ti tagtagarida. Ngem nasiputak ti apagapaman a panagtungtung-edda.

“Apay a diyo impulong dagiti mannursuro a kasta ti pampamay-anda iti eksam?” intukodko.

Nagtitinnaliawda laeng.

“Kaykayatmi met ngamin, sir,” pagammuan ta kinuna ni Rocky.

“Baka met binutbutengdakayo?”

“Tulongmi dayta kadakayo, ubbing,” binagi ni Lyra Mae, “sangkakunada met, sir. Tapno di kano nababa ti gradomi wenno tapno saankami a mabagsak!”

Napangilangilak. “Ita, saludsodek, class… agpayso kadi a nakatulong dayta?”

Awan ti mayat a sumungbat. Iti reaksionda, kasla agpipinnatudonda nga agsao. Wenno nasarait dagiti ngiwatda?

“Saan!” siak met laeng ti simmungbat iti saludsodko. “Ngem nagbalinkay’ ketdi a sadut. ‘Tay mangnamnama lattan iti manabtuog! Dakes ti epektona dayta iti panagdakkelyo. Sursuruenyo koma, class, ti tumakder iti bukodyo a saka.”

Agkikinnitada lattan agingga a naguni ti buzzer. Ngem imbagada ketdi no asino ti “pinakagarapal” nga agited iti sungbat dagiti paeksamna.

KALKALPASMI nga impasa dagiti grado dagiti ubbingmi. Nakaragragsak dagiti kabaddungalak. Imsiag man ngaminen ti increase ti GSA-da. Siak, saan pay nga immabot iti maysa a puntos. Ken adda latta maysa a negative nga increase-ko. Nasayaat ketdi ta pimmasada latta.

Minitingnakami ni Sir Omar iti dayta a malem. Nagtakder lattan iti sanguanan dagiti lamisaanmi. “Maragsakanak la unay ta awan kadagiti ubbingtayo ti natnag,” inrugina.

“Adda nagnaan ti panagisursuro kadakwada, sir,” imparagipig ni Sir George idinto a pagrinrinidiridenna dagiti dakulapna.

“Mabalin a kasta,” natamnay ketdi a sungbat ti prinsipal. Immanges iti nauneg. “Segun iti impasayo a GSA, nagdadakkelan ti increase dagiti dadduma. Maymaysa laeng ti adda negative nga increase-na!”

“Ney, asinwo, sir?” ni manen Sir George. Ngimmato pay dagiti kidayna. Inwarasna ti panagkitana kadakami. Nagsaltek ti imatangna kaniak. “Awan ngarud ti nasursuro dagiti ubbwing kenkuana, a. Grabweee!!!”

Ngem diak inkaskaso.

“Naan-anay koman ti ragsakko,” intuloy ni Sir Omar, “no saan nga iti natakuatak.”

Naklaat dagiti kakaduak. Nagkikinnitada.

“Ano ‘yun, sir?” sinaludsod ni Ma’am Vicky, ti kataengan kadakami ken arig kaedadna ti prinsipalmi a sumagpaten a singkuentana.

“We are all professionals, dayta ti ammok,” sinaggaysanakami a miningmingan ti prinsipalmi. “Ngem agparparang ita… we are not deserving!”

Immatap ti rupa dagiti kakaduak.

“I received a complaint regarding the way you conduct the exam. That’s why, I immediately investigated. Sad to say, I was able to prove it! I trusted you but…” inngilangil ni sir.

“Ania kadi dayta, sir?” sinaludsod met ni Sir Rolan. AP ti major-na ken uppat a tawennan ditoy CWNHS.

“Naammuak ti kaadda ti mangiparparebiu iti sibubukel a paeksamna. Itedna payen dagiti sungbat!”

Nasiputak la unay ti panagnganga ni Sir George. Limmidem pay ti rupana.

“Limed a nagsaludsodak kadagiti ubbing. Impudnoda ti ammoda. Impakitada pay dagiti nagisuratanda kadagiti sungbat ti kalkalpas nga eksam a naiparebiu kadakuada. Naalaanda pay iti ladawan dagiti sungbat a naisurat iti blackboard. Inkomparak iti impasayo a test papers dagiti ubbing. Ket napaneknekak a pudno ti naidanon kaniak!”

Awan ti nakauni kadakami.

“Diak la impagarup a kasta!” Permi a ngilangil ni Sir Omar. “Ket sika, wen, sika George ti intudoda a nangirugrugi iti kastoy nga aramid! Apay? Gapu ta kayatmo a nangato ti IPCRF-mo?” nagtalimudok ti imatang ni Sir Omar ken ni Sir George.

Ngem indumog laeng ni Sir George.

“I want to talk to all the teachers involved,” intuloy ni sir. “Closed door tayo bukas. You will receive a text from me…” Ulimek. “The meeting is adjourned.”

Kasla naawanan iti beauty kit ni Sir George a nakakittab lattan kadagiti nakapudpudaw a ramayna. Nalagipko idi kasla kadurmennak a nakitana a dagadaga ti imak.

Yakkksss!!! kunak la koma. Ngem nagulimekak lattan. Amangan pay no atapendak a nagikissiim iti prinsipalmi.

Nga isu ti agpayso! A panagkunak, saan a panagsipsip. Ketdi, panangitukit iti dekalidad a bin-i a pagrang-ayan ti tunggal maysa kadakami… kangrunaan dagiti ubbingmi. Kas met laeng iti bin-i nga intukit da nanang ken tatang iti isipko. Nga isu met ti ituktukitko kadagiti naikumit nga ubbing kadakami.

Comments are closed.