Footer

Ibotos dagiti kandidato a mangitakder ti kinapudno, hustisia ken dignidad, awis ti PPCRV

VIGAN CITY – IBOTOS dagiti kandidato nga addaan iti naan-anay nga integridad ken kabaelan nga agserbi a mangitakder ti kinapudno, hustisia ken dignidad.

Dayta ti apila ti Parish Pastoral Council for Responsible Voting kadagiti amin a botante iti intero a Pilipinas nga agbotos iti Barangay and Sanguniang kabataan Elections inton bigat, Mayo 14, 2018.

Nayallawat ti apila iti PPCRV iti liderato ni Rene Sarmiento, Chairman kadagiti amin a chapter iti Pilipinas pakairamanan ti Arkidiosesis ti Nueva Segovia, ti Social Action Commission nga idauluan ni Rev. Fr. Danilo Martinez, Director, tapno mairakurak kadagiti botante ti pagtaktakderan ti Simbaan Katolika iti eleksion dagiti opisial ti barangay ken SK.

Immunan a nangipaulog dagiti Katoliko nga obispo iti kararag dagiti makimisa para iti Barangay and SK Elections tapno maaddaan dagiti botante iti naan-anay a kinasirib a mangitandudo kadagiti kandidato nga addaan iti naan-anay nga integridad ken kabaelan nga agserbi nga agtrabaho para iti kinapudno, hustisia ken pannakaital-o ti dignidad ti tao. Kiniddawda pay ti pannakapaadda ti panawen dagiti botante a mangamiris ken mangibotos kadagiti kandidato a makabael a mangited ti timek dagiti napanglaw, awanan-gaway, naabandonaran ken dagiti maidaddadanes a tattao.

Iti Ilocos Sur, nakikaysa ti PPCRV kas observer iti pannakaisangpet ken pannakaiwaras dagiti maaramat iti eleksion kadagiti nagduduma a siudad ken ili. Naipatuloden kadagiti parokia dagiti Election Observer’s Manual nga usaren dagiti PPCRV volunteers a makikaysa iti pannakaangay ti Barangay and SK Elections tapno agbalin daytoy a natalna ken nadalus ket maisaad iti akem dagiti kandidato a pilien dagiti kaaduan a botante.

Mabigbig ti PPCRV kas accredited citizen’s election watchdog ti Commission on Elections a kabinnulig ti gobierno para ti pannakaangay ti clean, honest, accurate, meaningful and peaceful elections iti Pilipinas. (Eden Alviar)

Comments are closed.