Footer

Kapitan Tiudi, singkuenta (Umuna a paset)

AGLIKLIKAW pay laeng iti panunot ni Manong Sabas Mierkoles dagiti nabuyana a damag iti telebision idinto a nakaruaren iti bunggalo a balayda. Kaaduan kadagitoy ti maipanggep iti eleksion. Adda kapitan a pinaltoganda iti maysa nasulinek a lugar, maysa a kandidato a kagawad a tinambangda bayat ti panagawid daytoy, ken agkabsat nga agbalubal para kapitan.

Sabali a talaga ti eleksion itan, nakuna ni Manong Sabas iti nakemna. Maisakripisio uray ti napateg a biag tapno laeng magun-od dagiti dadduma a papili ti tarigagayanda a puesto.

Magagaran ngem nainayad ti panangpuligosna iti agmakatawenen a de-pilid a tugawna iti ikakamangna iti kalsada ti barangay. Insardengna sa timmaliaw iti daya iti apagapaman. Pinuligosna a pinaatras ti akinkanawan a pilid idinto a pasango met ti panangpuligosna iti kanigid a pilid tapno agpuligos pakannawan ti tugawna. Ad-adda a nagpuersa ti kanawan nga imana ta naapektaran ti kanigid a bagina iti pannakaatakena nasurok uppat a bulanen ti napalabas. Dakkel met ketdin ti nagdur-asan ti bagina. Patienna a dakkel ti naitulong ti mamitlo iti makalawas a panangilut ni Ester a kaanankanna a Physical Therapist kadagiti naapektaran a takiag ken sakana.

Itan, nakasangon iti laud nga agturong iti presinto. Pinatayyekna a pasango dagiti pilid ti tugawna. Pagammuan ta napatung-ed. Nagsanamtek. Ti ammona ket nalisianna ti kasla gemgem ti ubing a bato iti masanguanan ti kanawan a pilid. Nakarikna iti bara dagiti puon ti lapayagna. Ammona, kabaelannan ti magna babaen ti tugawna agingga iti nasurok a tallo gasut a metro ti kaadayona a presinto. Nasubokna ngamin itay malem a panagpalpalikawna manen iti paraangan. Ngem, dagitoy met ita kasla naiwarakiwak a dadakkel a bato iti kasla pagsungkaan a kalsada ti mangibayag kenkuana a makadanon. Numona ket agingga laeng iti alas tres ti panagawatda kadagiti agbotos. Alas dos singkon.

Inuyosna ti sangametro a nakayasan ken kasla tangan ti ima a kawayan iti bakrang ti tugawna. Saan a maaw-awan dayta iti tugawna ta adu ti pakasapulanna iti daytoy. Induronna ti bato a naikalso babaen ti iggemna a patit. Nagsanamtek a nangisubli iti nagyanan daytoy. Bimmara ti piditpiditna. No daytoy koma ngamin a dalan ti nangipunduan ni Kapitan Tiudi kadagiti nagdakkelan a pondo ti barangay nga inbagbaga ni tesorera idi Synchronized Barangay Assembly!

Nalagip ni Manong Sabas ni baketna, ni Manang Emiang. Kas kadagiti bato, paritan met daytoy a mapan agbotos. Naimbag ketdi ta insirnaatna ita ti tiempo. Agtudtudo idi naminsan. No saan la a watcher ni Kapitan Tiudi ni baketna ket parparitan koma manen ita daytoy a mapan agbotos.

Napaisem. Itay ngamin bigat a panagal-alisto ni baketna a mapan idiay presinto ket bassit laeng ti kinnan daytoy nupay paggugustona a pammigat ti torta a tarong ken nakilnat nga uggot ti kamotit a maigusugos iti kbl – kamatis, bugguong, lasona. Isu nga adu ti pinangaldaw ni Manong Sabas. Kabaelanna met ketdin ti tumakder a bukbukodna. Makapagluton iti gas stove ngem saanna pay unay kabaelan ti nakatakder a napaut.

“Saan kad’ a natangken ta ulom, lakayko.” Impetteng ni baketna idi kalman.

Makaunget ngem adda asi a naibinggas iti timek daytoy. “Maysa laeng ‘ta botosmo, Lakay. Ad-adda a mabayag a mapasublim ti sigud a kasasaad ti bagim no pilitem ti mapan agbotos.”

“Masapul ti lugartayo ti panagbalbaliw, baket.”

“Kaniak laeng, maasianak kenka. Marigatanka iti ipapanmo iti pagbotosan, lakay.”

“Napateg ti tunggal botos ti amin nga umili, baket. Nakasadag ti kasasaad ti barangay iti botostayo. Sa maysa, nalag-anto kadi ti riknam nga umawat iti aniaman a tulong ti barangay idinto a simple laeng a panagbotos ket dimo inaramid?”

“Dimo kadin ipapilit ta kayatmo, lakay. Iyal-alikakak laeng dayta salun-atmo.”

Saan idin a simmungbat ni Manong Sabas. Inuyosna ti nauneg nga anges iti barukongna. Simmeksek iti panunotna ni Rolando a kasinsinna. Agkasadarda iti tawenda nga uppat a pulo ket walo. Kuna daytoy iti text message-na idi naminsan a di kano agawid ta sayang kano ti sueldona nupay tallo nga ili laeng ti malabsan sa madanon ti pagob-obraanna. A, adda isuna a mangisaksakripisio iti salun-atna para iti lugarda ken iti pagilian idinto nga adda met dagiti masadut a mapan agbotos nupay masangoda koma. Inton nangabak daytay kandidato a ti la bolsana ti busbussogenna, sumanaodanton: awanen, mari, pagsungkaananen ti higante daytoy kalsada! Isu a dida sukatan dagiti pundi a bombilia dagiti streetlight tapno saan makita dagiti iruarda a kayo iti rabii.

Piman pay ti Pilipino, insanamtek ni Manong Sabas. Natuladna ti pagsasao ti maysa a kumparina.

(ADDA TULOYNA)

Comments are closed.