Footer

Pannakamantia ti imahe ti Department of Tourism

AKEM ti Department of Tourism a mangikampania ti kinapintas dagiti nagduduma a lugar iti Pilipinas, ken kinasayaat ti galad ken kababalin dagiti Pilipino tapno maallukoy dagiti gangganaet iti sangalubongan a bumisita iti pagilian.

Ngem namantiaan ti reputasion ti ahensia gapu iti mapapati nga anomalia iti advertisement ti DOT iti kompania a blocktimer ti People’s Television 4 a Bitag Media Unlimited a nakaigapuan iti panaglusulos a DOT Secretary ni Wanda Tulfo-Teo.

No talaga a napudno ti krusada ti administrasion ni Presidente Rodrigo Duterte, rumbeng laeng nga uray awanen iti DOT ni Teo gapu kadagiti adu nga umili a nangkidkiddaw ti panaglusulosna, ken uray no maisublinton ti P60 Million nga imbayad ti gobierno, rumbeng a maituloy ti pannakaisayangkat ti imbestigasion, ket no adda merito wenno “probable cause” ti kaso, rumbeng a mapilaan iti mayanatup a kaso dagiti amin nga adda pannakainaigna iti anomalia.

Nasken daytoy tapno mapaneknekan nga awan ti “sacred cow” iti agdama nga administrasion, ken saan laeng nga agpatingga kadagiti nababa ti saadna nga agserserbi iti gobierno wenno dagiti kontra-partidoda dagiti kaskasuan ti Ombudsman ken maidardarum iti Sandiganbayan.

Nagramut ti kontrobersia iti bilin ti Commission on Audit iti PTV 4 a mangidatagda kadagiti kasapulan a dokumento a mangsuporta ti panagbayad ti DOT iti kompania a BMUI.

Maibasar iti 2017 COA Audit Report iti People’s Television Network, Incorporated, awan ti Memorandum of Agreement wenno Certificate of Performance a supporting documents iti panagbayad ti DOT iti P60 Million para kadagiti advertisement wenno patalastas ti ahensia iti programa a Kilos Pronto a naipabuya iti PTV 4.

Ni Ben Tulfo, kabsat ni sigud a DOT Secretary Teo, ti chief executive officer ti PTV-4 blocktimer a BMUI a mangipabpabuya ti Kilos Pronto. Kaduana a host ti kabsatna a ni Erwin Tulfo ken Alex Santos.

Segun pay iti COA, ti disbursement record ti PTNI idi 2017 ket ipakitana ti kaadda dagiti tallo a tseke a naibayad iti BMUI nga agdagup iti P60,009,560.00. Immuna a naiparuar ti tseke nga agbalor iti P22,089,560 idi Mayo 11, 2017; maikadua ti agbalor iti P18.96 Million idi Nobiembre 8, 2017; ken maudi ti aggatad iti P18.96 Million idi Disiembre 15, 2017.

Ti pannakabayad dagiti disbursement ti gobierno nga awan dagiti nasken a dokumento ket mailabsing iti Presidential Decree No. 1455, series of 1978 wenno ti Government Auditing Code, ken COA Circular No. 2012-001.

Bimmara ti isyu ti DOT advertisement gapu iti alegasion iti “conflict of interest” agsipudta agkabsat da sigud a DOT Secretary Wanda Teo ken Ben Tulfo a CEO ti BMUI a mangipabpabuya ti Kilos Pronto a nakaipatalastasan ti tourism advertisement.

Pinaglibakan ni Teo nga addaan isuna iti “conflict of interest” iti pannakaipabuya ti tourism advertisement iti Kilos Pronto ta ti kontrata ket iti nagbaetan ti DOT ken PTV 4, ken nagdalan iti bidding a rinepaso ti legal team. Impakaammona a kalpasan laeng ti pannakapirma ti kontrata iti nagbaetan ti DOT ken PTV 4 a maipabuya ti advertisement iti programa ti kabsatna gapu ta nangato ti rating-na. Inlawlawagna a saanna nga ammo idi un-unana nga iti programa ti kabsatna ti pakaipabuyaan ti tourism advertisement gapu kadagiti adu a responsibilidad ken pakakumikomanna iti trabahona.

Inlawlawag ni Teo nga adda pay dagiti tourism advertisement a naipabuya kadagiti dadduma pay a pribado a television networks ken media organizations kas ti a nagbayadan ti DOT idi dakkel a kantidad, ngem ad-adu dagiti naipalabas iti PTV 4 kas mayataday iti direktiba ni Presidente Duterte kadagiti ahensia ti gobierno a mangsuporta iti government television network.

Impetteng ni Ben Tulfo nga awan ti irregularidad iti kontrata ti pannakaipabuya ti DOT advertisement iti Kilos Pronto ta nagdalan dayta iti umno a proseso. Impalgakna pay iti Facebook account-na ti atapenna a ti kabarbaro a DOT Undersecretary a sigud nga adda iti Social Security System ti nangi-leak iti COA report maipapan iti pannakaipabuya ti advertisement. Iparparipiripna ni Tourism Usec. Jose Gabriel La Viña ta nabiit pay a napadisi iti SSS gapu iti mapapati a panagabusarna iti pondo, ken nadutokan laeng a DOT Undersecreatry idi Abril 24, 2018, sumagmamano nga aldaw sakbay a pimmutok ti kontrobersia.

Naglibakan ni La Viña nga awan ti kinapudnona dagiti alegasion kenkuana ken awan ti ambisionna nga agbalin a Tourism Secretary. Uray ni Teo ket dinependeranna met ni La Viña nga awan ti pannakainaigna iti leakage ti COA Report.

Nadaras ti panagdur-as dagiti pasamak maipapan ti mapapati a maanomalia a tourism advertisement ta kalpasan laeng iti agarup dua a lawas ket naglusolusen iti posisionna ni Teo, ken impasingkeden ni Tulfo ti panangisubli ti kompaniana ti P60 Million nga imbayad ti DOT. Napasamak dayta gapu iti nabara a reaksion dagiti umili a nangkidkiddaw ti panaglusolos ni Teo, kabayatan ti pannakaisayangkat ti imbestigasion.

Daksanggasat ti napasamak a kontrobersia iti DOT ta kas ahensia ti gobierno a mangmanmanehar ti turismo ket iyanninawna saan laeng a dagiti napintas a lugar ken pasken iti Pilipinas iti sangalubongan tapno maallukoy dagiti turista a bumisita wenno agnegosio iti pagilian, ngem nasken pay nga agbalin a pagulidanan nga ahensia iti napudno a panagserbi ken awanan iti mapaspasamak a kurapsion.

Dinutokanen ni Presidente Duterte kas baro a DOT Secretary ni Bernadette Romulo-Puyat, sigud nga undersecretary iti Department of Agriculture ken anak ni sigud a Foreign Affairs Secretary ken sigud a Senator Alberto Romulo. Manamnama nga iti panagakem ni Puyat ket mapasubli ti namantiaan nga imahe ti ahensia. (Eden A. Alviar)

Comments are closed.