Footer

Simbaan iti Sinait, naideklararen nga archdiocesan shrine ni Santo Cristo Milagroso

SINAIT, Ilocos Sur – Opisialen nga indeklarar ni Arsobispo Marlo M. Peralta ti simbaan iti Parokia ni San Nicolas de Tolentino iti Sinait, Ilocos Sur kas archdiocesan shrine ni Santo Cristo Milagroso wenno Apo Lakay iti Arkidiosesis ti Nueva Segovia tapno adda naisangsangayan a pagkararagan dagiti deboto para ti pannakapauneg ken pannakapatibker ti pammati.

Naisayangkat ti opisial a deklarasion ti panagbalin ti simbaan iti Sinait, Ilocos Sur kas santuario ni Santo Cristo Milagroso kabayatan ti Nasantuan a Misa a panangrambak ti piestana idi Mayo 3, 2018.

Inrakurak ni Fr. Soller nga iti dayta a gundaway ti opisial a pannakaideklarar ti simbaan iti Sinait kas archdiocesan shrine ni Santo Cristo Milagroso. Sinalaysayna ti pakasaritaan ti imahe ni Apo Jesucristo a nailansa iti krus ken ladawan ni Birhen Santa Maria a nasarakan iti kabaybayan iti nagbeddengan ti Sinait ken Badoc, kas maibasar iti “Alzamientos de Ilocos” nga insurat idi katengngaan ti maika-18 a siglo ni Fray Pedro del Vivar, Agustino a fraile ken kura paroko iti Batac.

Inrakurak ni Fr. Soller nga idi Tawen 1620, madama idi nga agdakdaklis dagiti mangngalap iti Sinait ken Badoc idi makitada ti maysa a tumtumpaw a kahon; ket ginuyod nga intakdangda iti daga ti kahon babaen ti daklis, ket nasdaawda idi makitada ti linaonna a ladawan ni Apo Jesucristo a nailansa iti krus a kas kadakkel ti tao a moreno a nangisit ti marisna, kaduana ti maysa a bassit a ladawan ni Apo Santa Maria, dua nga angel ken paggangatan ti silaw wenno “mecheros,” ken violin. Kayat dagiti agindeg kadagiti dua nga ili a tagikuaen dagiti ladawan agingga a napagtulaganda a ti krus ni Apo Jesucristo ken violin ket mapan iti Sinait; ken ti ladawan ni Apo Santa Maria ken dua nga angel ket maipan iti kapilia sadiay Visita ti Badoc a madama pay laeng idi a maad-adalan iti pammati dagiti agindeg.

Sinalaysay pay ni Fr. Soller a manipud idi naipanen ti imahe ni Santo Cristo iti santuariona iti Sinait, ket adu dagiti mapan makimisa ken sumuknal. Inestoriana nga idi 1756 ket naipan ti imahe ni Santo Cristo sadiay Vigan tapno agkararag dagiti umili iti pannakapasardeng ti epidemia, ket babaen ti panagdebosion dagiti tattao, adu dagiti napaimbag iti sakitda.

Sinarita pay ni Fr. Soller a maibasar met laeng iti sinurat ni Fray del Vivar, mapapati a dagiti ladawan da Apo Jesucristo ken Apo Santa Maria ket naipayanud iti baybay manipud ti pagilian a Japan, nga idi a panawen ket maidaddadanes dagiti Kristiano, tapno mailisida iti pannakapapatay ken pannakadadael dagiti dua a ladawan. Impalgakna nga agingga iti agdama a panawen ket adu dagiti deboto ken ni Santo Cristo Milagroso a mapmapan iti simbaan iti Sinait iti kada Biernes nangruna iti umuna a Biernes iti binulan, iti Biernes Santo, ken iti piestana iti maikatlo nga aldaw iti Mayo.

Ti pannakataginayon ti piesta ti Tres de Mayo ti mangiparangarang iti naindaklan a panagdebosion dagiti Katoliko iti pannakasapul sadiay Jerusalem iti nasantuan a krus ni Jesus idi 326 kalpasan ti ipapatayna,” kinuna ni Fr. Soller iti panangipasagepsepna a babaen ti pammati, ti imahen ni Apo Jesucristo a nailansa iti krus ti kangrunaan nga imahen a mangipakita ti ayat ti Dios iti sangaparsuan, a pagibasaran ti panagdebosion dagiti deboto ken ni Santo Cristo Milagroso iti maikatlo nga aldaw iti Mayo.

Impadamagna pay maipapan iti ladawan ni Santa Maria La Virgen Milagrosa iti Badoc a kadua ti imahe ni Santo Cristo a naalaw iti kabaybayan, a maaramidto ti pannakabalangatna inton alas nuebe iti bigat ti Mayo 31, 2018 babaen ken ni Cardinal Luis Antonio Tagle, Arsobispo ti Manila, a mangibagi ken ni Papa Francisco, ken bayabayento ni Cardinal Orlando Quevedo ti Arsobispo ti Cotabato a tubo ti Ilocos Norte, ken sigud nga Arsobispo ti Nueva Segovia, ken dadduma pay nga obispo iti Pilipinas. (Eden Alviar)

PHOTO CREDIT: By Kenshinflyer at English Wikipedia, CC BY-SA 3.0, Link

No comments yet.

Leave a Reply