Footer

Mannalon, ginandat a ngurunguren ti kainumanna

STA CRUZ, Ilocos Sur — Napan nagipulong iti Sta Cruz MPS idi alas kuatro ti malem ti Mayo 10, 2018 ni Rodolfo Cabasag y Cabato, 62, naasawaan, mannalon ken residente ti Barangay Baluarte,
Salcedo, Ilocos Sur, gapu iti dandani pannakangurungor ti kabsatna a ni Ruben Cabasag y Cabato, nataengan, mannalon ken residente met laeng iti nasao a lugar. Ni Ago
Buoquing, residente ti Barangay Padaoil, Sta. Cruz, Ilocos Sur ti suspek.
Segun iti inisial nga inbestigasion, napan nakiminatay dagiti agkabsat, kaduada ni Godfrey Ulila, sadiay Barangay Padaoil, Sta. Cruz, Ilocos Sur idi rabii ti Mayo 9. Iti tengnga ti rabii agawidda koma, ngem nagbati ti biktima ta nakiinom pay kadagiti dadduma pay a nakiminatay.
Iti istoria ti kaabay ti biktima iti inuman a ni Rolando Dultra y Bongolan, 43, residente ti Barangay Padaoil, alas singko y median iti parbangon idi Mayo 10, 2018 idi umasideg ti suspek iti inuman ket nangngegna ti suspek a nagkuna: “Kayatmo ta ngurunguren ka?” sana inruar ti patadem manipud iti sabikelna ket intudona iti tengnged ti biktima ngem inanawa ni Rolando ti suspek.
Nagtaray a dagus ti suspek a ni Ago Buoquing.
Gapu ta nakita ni Rolando nga adda dara nga agtedted manipud iti tengnged ni Ruben Cabasag, intarayda daytoy iti, iti Salcedo Hospital, Salcedo, Ilocos Sur, iti laksid ti panagkitakitna.
Agtultuloy pay laeng ti inbestigasion. (Tawid News Team)