Footer

Ti kumakanta, ti CD ken ti Propesora

MABALIN nga ibati daytoy ta ilakoyo, dungngo?”

Naisardeng ni Terio ti mangiplastar kadagiti tagilako a libro iti lamisaan. Maysa a napudaw, naisem, atiddog ti nakoloran iti kayumanggi a buokna, narimat dagiti matana, a babai ti mangyaw-awat iti kopia ti compact disc.

Uray la napakiet ni Terio a naawagan iti dungngo. Iti tantiana, sumagpaten a singkuentana ti babai ngem ammona lattan a naestimar iti bagi daytoy ta kompleto iti kolorete. No awan ngata dagiti impulagidna iti bagina, madlaw la ketdi a dagus ti pudno nga edadna.

Ania daytoy, ma’am?” sidadayaw ni Terio a nagsaludsod uray ammonan a kankanta ti linaon ti CD. Inawatna dagiti agarup duapulo a CD.

Dagitay man kankantak a pinutarko idi addaak idiay Canada,” inyisem ti babai. “Siak gayam ni Imelie Buysap.”

Dakayo gayam daytay makitkitak iti FB no kua, ma’am,” inawat ni Terio ti dakulap ti babai. “Naimbag man ta nakadar-aykayo kadaytoy a taripnong dagiti Ilokano.”

Maysaak ngamin a mangay-ayat met iti lengguahetayo, dungngo,” inyisem ni Imelie. “Saanka koma gayam a masmasdaaw ta naruamak nga awagak iti dungngo dagiti makapulpulapolko… babai man wenno lalaki.”

Nagsayaaten no kasta, dungngo,” naki-game metten ni Terio. “Kantayo amin a linaon ti CD?” Panagriknana, agkarkarayam pay laeng iti bagina ‘tay naparnuay a kuriente itay dakulapenna ni Imelie. Apagsagpatna a kuarenta ket ita man laengen a nakarikna iti sagabasab sipud nagsina ti dalanda iti ay-ayatenna, sangapulo a tawenen ti napalabas.

Wen, dungngo.” Iniseman ni Imelie. “Ilakom man ta ikkankanto iti porsientom.”

Sige, dungngo,” intungtung-ed ni Terio.

Taripnong dagiti Ilokano a mangay-ayat iti lengguaheda ken ti nakayanakanda a disso. Tinawen daytoy a maangay iti uneg ti dua nga aldaw. Ipakita dagiti Ilokano ti nagapuananda a panangtagiben iti kina-Ilokanoda. Adda dagitay nagaramid iti libroda iti dandaniw, nobela, sarita, sarita a para ubbing ken dadduma pay a klase ti literatura. Adda pay dagitay retratista a nangitampok kadagiti napipintas a buya iti Kailokanoan wenno iti nakaisadsadanda a disso. Sabali laeng dagitay dramatista nga inukkonda ti grupoda tapno laeng agpabuyada. Ken dagiti kas ken ni Imelie a nagirekord kadagiti kankantana.

Host ti probinsia da Terio. Isu ti napusgan nga agbantay kadagiti mailako a produkto dagiti padana nga Ilokano.

Nakalikuden ni Imelie ngem no apay a di pay laeng panawan ti gitebgiteb ti barukong ni Terio. Sal-at, ania daytoyen? nasaludsodna iti bagina.

Narugian ti programa. Kalpasanna, naiwaragawag dagiti baro a gapuanan a mabalin a magatang iti lamisaan a yan ni Terio. Sa naisaruno ti panagsarita dagiti napusgan. Istoriaenda dagiti padasda, no kasano a nasumokda ti agkanta, agsurat ken agala iti ladawan. Kasla daytay agleklektiur metten ti agsasao no istoriaenna dagiti ar-aramidenna.

Alas otson iti rabii idi malpas ti programa. Impangngeg pay ni Imelie ti dua kadagiti kantana. Ngem no apay a dina impromot dagiti CD-na apaman a nalpas a nagkanta.

Indalimanek ni Terio dagiti impailakoda kenkuana. Sigagagar a nagturong iti grupo dagiti am-ammona. Nabukel ti lamisaan iti sirsirok dagiti kayo iti sango ti function hall a nagyananda.

Inniliw, ammo daytan ni Terio. Panagkakadio, kunada pay no dadduma ta awan mapan maturog agingga a di agbasingbasing a magna.

Saanna a napupuotan, timmipon iti grupoda ni Imelie. Nakasiort laengen ket nagminar ti napudaw a luppona. Nagkiting pay ti awan manggas a badona. Napatilmon la ket ngarud ni Terio. Adda pay laeng pamuyaanna a talaga, inkatek ti isipna. Amaya!

Ngem dakesen idi mapaanudan ti karabukob ni Imelie. Narasawen ti ngiwatna. Kanta a kanta aglalo idi kompaniaranda iti gitara. Arig maibuyangyang ti kinarakaranna no kasta nga itangadna nga ibirakak ti kantaenna.

Impluwensia ti sabali a pagilian! nakuna ni Terio.

Ngem sabagay, napintas a talaga ti boses ni Imelie. No saanmo pay a nakita, ket ti timekna laeng ti pagibasaram, mabalin nga ibagam nga apaglabesna laeng a duapulo.

KABIGATANNA, nakasarsaranta ni Terio a nangiplastar manen kadagiti tagilakona. Kasla kitkitaenna nga adu kadagiti nakasangoda idi rabii a nataengan metten ti gumatang iti CD ni Imelie. Impromot ngaminen daytoy ti CD-na. Tung-ed a tung-ed dagiti nagumbianna a gumatangda iti CD-na.

Panagmemeriendan idi adda mangbiding iti CD. Nalasin ni Terio daytoy. Ni Ma’am Lita, propesora iti maysa nga unibersidad idiay Manila ken adun a nobelana ti inlibrona.

Napintas man ‘toy CD,” kinuna ni Ma’am Lita. “Madlaw nga original.”

Wen, ma’am,” sigagagar ni Terio a nagkuna. “Orig na orig talaga.”

Akin-CD?”

Daydi nagkanta idi kalman, ma’am. Ni Ma’am Imelie…”

Saanko a nakita ta limmikudak bassit ‘di kalman. Sinarungkarak dagitay kakabagiak dita sentro,” kinuna ni Ma’am Lita. “Sumipngeten idi makasubliak.”

Nakitayo ngarud, a, ma’am, dita sungadan ‘diay babai a nagkankanta iti bunggoy dagiti lallaki?”

Wen, a. Saanak pay a naturog idi makasangpetak. Nagpagnapagnaak a nakisarsarita kadagiti am-ammok. Ket nakitak daydiay babai a kunkunam.”

Isu ti akinkukua dagita CD, ma’am. Nagpintas bosesna!”

Ay,” timmamnay pay ti timek ti propesora, “isu gayam.” Nakita la unay ni Terio ti panagngilangil daytoy.

Wen, ma’am!”

Sige ngarud…” nakaan-annad nga insubli ni Ma’am Lita ti CD. “Next time-to lattan.” Ket timmallikuden.

Nabati a nakamalanga ni Terio.

(Gibusna)

Comments are closed.