Footer

Cobblestone project iti abay ti Plaza Salcedo, Vigan City, agpaut iti 8 a bulan – DPWH District Engineer

VIGAN CITY – AGPAUT iti walo a bulan a maileppas ti proyekto a pannakaaramid iti sewage system and cobblestone project iti abay ti Plaza Salcedo, Vigan City a narugian itay Abril 2018.

Dayta ti inrakurak ni Engr. Reynaldo Organo, District Engineer iti Ilocos Sur First District Engineering Office ti Department of Public Works and Highways, kadagiti kameng ti Ilocos Sur Integrated Press kabayatan ti naangay a Kapihan iti Amianan Media Forum.

Impakaammo ni Engr. Organo a mayal-alisto ti proyekto tapno mapalag-anan ti trapiko iti sentro ti Vigan City, ngem posible nga adda dagiti pasamak a saan a maliklikan kas ti dakes a panawen, ken panagkurang ti supply ti cobblestone manipud iti ili a San Esteban a mabalin a mangtaktak ti proyekto.

Kinanunonganna met ti District Engineer ti singasing a palubosan koma ti City Government ken kontratista ti Boardwalk project iti Govantes River a mausar ti kalsada a temporario a pagparkingan dagiti nalag-an a lugan tapno mawayaan dagiti kalsada iti sentro ti siudad nangruna iti Govantes Dike iti asideg ti Provincial Capitol ken Colegio Business Center. Nagapila pay kadagiti opisial dagiti local government units ti panangipakatda kadagiti paglintegan a mangipawil iti nabayag nga agparking kadagiti igid dagiti National roads ken dadduma pay a kalsada tapno naannayas ti panagtaray ti trapiko.

Impalgak pay ti District Engineer nga adda 87 nga imprastracture projects ti DPWH ti naileppas idi 2017 a pakairamanan dagiti school buildings, farm-to-market roads, pannakabangon dagiti rangtay, road and bridge widening projects iti Manila North Road wenno iti National Highway. Impasingkedna pay ti madaman a pannakaar-aramid ti Bantay-San Ildefonso By-pass road a manamnama a no malpas ket mangpalag-an ti annayas ti trapiko iti sentro ti Bantay.

Impakaammona pay nga adda commitment ti Ilocos Sur Electric Cooperative ken dagiti maseknan a telecommunication company iti pannakayakar dagiti poste ti koriente ken komunikasion nga adda kadagiti paset ti napalawa a National Road tapno saan a makatubeng iti trapiko. Inlawlawagna met a kasapulan ti clearance manipud iti Department of Environment and Natural Resources ti pannakapukan dagiti kayo iti igid dagiti mapalpalawa a paset ti National Road.

Inrakurakna pay nga agdagup iti 42 a daan a pasdek ti pangpubliko a pagadalan dagiti natarimaan ken nakasaganan a mausar iti panaglukat ti School Year 2018 – 2019. Impakaammona a dagiti daan nga school buildings ket natarimaan sakbay ti pannakaangay ti Palarong Pambansa iti Ilocos Sur itay Abril 2018, a kaaduanna ket nausar a nagnaedan wenno billeting area dagiti delegado manipud kadagiti nagduduma a rehion iti Pilipinas a nakipaset iti torneo. Impakaammona a ti pannakatarimaan dagiti school buildings a nausar iti Palarong Pambansa ket pinonduan ti Provincial Government of Ilocos Sur.

Impanakkel pay ni Engr. Organo a naingaton iti 2nd Class Engineering District ti Umuna a Distrito manipud iti 3rd Class Engineering District a nadanonna, ken ti agtultuloy a pannakapadayaw ti FDEO a Best in Maintenance gapu iti nasayaat a pannakamantiner dagiti rangtay ken kalsada a sakup ti National Road. (Eden Alviar)