Footer

Kapitan Tiudi, singkuenta (Maikatlo a paset)

Mabatogandan ti pagadalan idi immasideg ni Manang Simang nga asawa ni Manong Jobert. “Manong, para iti panagdur-as ken panagbalbaliw ti lugartayo.” Inyawat daytoy ti polietos ni Manong Jobert.

Inawat ni Manong Sabas. Pinerrengna ni Manang Simang. Naginnisemda.

Kas kalag-an ti papel ti mariknana iti barukongna iti pangmirana iti naisurat iti polietos.

“Ditoyak pay laeng, balasangko,” kinuna ni Manong Sabas idi makastrekda iti eskuela ken Analyn. Malagipna, indonar idi ni Manong Jobert ti kuarta a pinagpaaramid ti eskuela iti daytoy a linong. Adu pay ti naitulongna iti daytoy nga eskuela ken iti barangayda idi adda pay laeng idiay abroad. Maysa ditan ti dap-ayan idiay purokda. Maysa idi ni Manong Sabas a nagobra iti daytoy a linong. Kayat idi ti prinsipal a maikitikit iti tabla ti nagan ni Manong Jobert kas nangidonar sa mailansa iti masungad ngem nagkedked daytoy.

Intuloyna a pinuligos ti pilid ti tugawna. Naiturong ti panagkita dagiti kalugaranna kenkuana. Saanna maibagasan ti kapanunotan dagitoy. Ngem, panagriknana, kasla ay-ayen dagitoy. Kas man laeng awan ti karbengan nga agbotos ti maysa a baldado a kas kenkuana. Ngem, binay-anna dagitoy.

Pinuligosna a pinasango ti pilid ti tugawna. Inturongna iti ridaw ti umuna a presinto. “Ammomon ti numero ken presinto a pagbotosam, Manong?” dinamag ni Manong Bunnit.

“Ammok ngem diak masigurado no an’a ‘diay numerok, ading.” Tinangad ni Manong Sabas. Madama daytoy a manguk-ukag iti naipaskil iti rikep ti ridaw a listaan dagiti rehistrado a botante.

“Naganmo itayen a kuskusto, manong?”

“Sebastian. Sebastian Mierkoles.”

“Mierkoles.” Inulit ni Manong Bunnit idinto nga uk-ukagenna ti listaan. “Nii, Adda met pay la nagan daydi angkel. Fernando Mierkoles!”

“Ha! Adda koma pay lang?” Kasla saan a mamati ni Manong Sabas. Ket no lima tawenen nga awan daydi Ama Fernando nga amana. Awan met kanagnaganna ditoy lugarda.

Nagparang dagiti minansaan ti mama a ngipen ni Manong Bunnit. “Adda nga agpayso naganmo ditoy, manong.”

Immasideg da Manang Bussang ken Manang Gimma a sangsangpet.

“Awan sa met naganyo, manong?” inyangaw a dinamag ni Manang Bussang. “Adda kapadan, a, diay buridekko.”

“Adda. Uray daydi tatang adda pay la naganna.”

“Ha ha. Nakaawat met ngata isuna iti singkuenta a pisos?” nagparang dagiti kinoloran ti mama a ngipen ni Manang Bussang. “Adu kano ti nagkaradap idi rabii ket.”

Tinangadna ni Manang Bussang. Nagustuanna ti panangipigsa daytoy iti inbagana. Nagkaradap kunada kadagiti kandidato a nagited ti kuarta. Napataliaw dagiti adda iti asidegda.

Pinuligos ni Manong Sabas dagiti pilid ti tugawna. Inatibay ni Manang Gimma.

“Opps, siakon, manang,” kinuna ni Ma’am Bingbing ken ni Manang Gimma. Nainayad ti panangiturongna nga inserrek ni Manong Sabas. Apagisu a malpas dagiti sangapulo a madama itay nga agbotos.  Inukagna ti folder iti lamisaan. Inyawatna ken Manong Sabas kalpasan a mabirokan daytoy ti naganna. Insarunona nga inyawat ti stamp pad. Inyawatan ni Ma’am Bingbing iti bolpen kalapasan a madeppelan ni Manong Sabas iti nairanta a pangideppelan daytoy iti tangan ti kanawanna. “Kasla pirma ti abogado, a, manong.” Inyangaw nga inyisem ti naubing a maestra.

“Ad’toy ti balotam, manong.” Inyawat ni Ma’am Rosing ti balota. “Iyasidegmo lattan ta tugawmo dita abay ti desk, manong, tapno adda paglandagam.”

Inturong ni Manong Sabas ti de-pilid a tugaw iti likud. Naglandag iti akinlikud a desk. Pinalabsanna ti aglawlawna pambaranna a makainana sakbay nga agikur-it kadagiti kandidatona. Iti tawa iti laud, adda dua a babbalasang a nakatakder. Adda iggem dagitoy a kuaderno ken bolpen. Iti met ungto ti blackboard, iti banda ti laud met laeng, iti abay ti plywood a diding a nakaipigketan kadagiti dadduma a gapuanan dagiti ubbing, nakatakder met dita ni Manang Emiang ken Manang Soling a watcher ni Manong Jobert. Kasla kumilaw dagiti mata ni Manang Emiang. Apagapaman a naggunaygunay dagiti bibigna. Ammo ni Manong Sabas, makaunget daytoy. Ngem, awanen ti mabalinan ni baketna. Addan ditoy presinto nga agbotos. Ipalawagnanto lattan ti gapu no apay a pinilitna ti immay nagbotos – kas iti rasonna idi no apay a napalalo ti reggetna a makabotos.

Napasnek ti panagsurat ti balasang iti sangona. Iti sangona a makanawan, as-asistiran ni Manang Puring ti inana nga agtawen ngata iti walo pulo. Inarasaasan ni Manang Puring ti inana sa nagsurat daytoy idi nagtung-ed ti baket. Adda panagraem a narikna ni Manong Sabas iti baket. Kas met kenkuana, inkarigatan met daytoy ti napan ditoy presinto tapno laeng maipatungpalna ti pagrebbenganna kas umili. Ken, nalabit, kas met kenkuana a kayatna met a mabaliwan ti kasasaad ti lugarda.

Immanges iti nauneg ni Manong Sabas. Sapay koma ta dagiti met laeng kayat nga ibotos ti baket ti isurat ti anakna iti balota.

Inlukat ni Manong Sabas ti folder. Nainayad ti panangisuratna iti nagan ti kandidato iti batog ti umuna a kagawad sa insardengna ti nagsurat. Inrantana dayta tapno matikaw dagiti mangsipsut iti panaggunay ti bolpen nga iggemna no adda man. Immisem. Ti ammo dagiti mangkitkita kaniana ket iti para kapitan ti nagsuratanna.

Kimmita iti sango. Apagisu nga agtugaw ti asawa ni Kagawad Ayyu. Nasiputan ni Manong Sabas a namindua la a nagsurat daytoy sa timmakderen.

Intuloy a sinuratan ni Manong Sabas ti batog ti kapitan sa insuratna dagiti innem a nabati a para kagawadna. Kalpasanna, napanna inyawat ken Ma’am Rosing ti balotana. Siniputanna ti panangiserrek ti maestra iti ballot box.

(ADDA TULOYNA)

Comments are closed.