Footer

Mannalon, pinaltogan ti kayongna

Maysa a pammaltog ti naireport a napasamak idi alas onse ti rabii, Mayo 11, 2018, sadiay Brgy. Talogtog, Candon City, Ilocos Sur. Maysa nga agnagan Samuel Gamata y Mendoza, 42, naasawaan, tricycle driver, ken residente ti Darapidap, Candon City, ket pinaltogan ti kayongna a ni Jovencio Toquero y Gabuat, 62, naasawaan, mannalon ken residente ti Brgy. Talogtog Candon City, Ilocos Sur.

Segun iti statement ti suspek, kasangsangpetna manipud inuman iti balay ti gayemna a kandidato iti barangay elections idi 10:45 ti rabii ti Mayo 11 idi mapansinna ti biktima nga adda nga agsaksakiwar iti ruar ti pagtaenganna. Rimmuar ti suspek tapno damagen no anya ti ar-aramiden ti biktima, ngem saan daytoy simungbat no di ket dagus a pimmanaw. Kalpasan ti sumagmamano a minuto, nagsubli kano ti biktima a kasla adda birbirokenna iti paraanganda. Binagaan ti suspek ti biktima a pumanaw a dagus met nga inaramidna.

Idi makapanaw ti biktima, nagtugaw ti suspek iti terrace ti balayda, ket ditoy a nakitana ti biktima a nagsubli nga addan iggemna a bolo. Dagus nga innala ti suspek ti 12-gauge shotgun-na ket pinaputokanna ti biktima iti maminsan. Nagsagrap iti multiple gunshot wounds ti biktima iti barukongna a dagus nga intaray dagiti nagresponde a kameng ti Candon CPS sadiay Saint Martin de Porres Hospital, ngem naideklara a natay iti 12:05 ti agsapa ti Mayo 12, 2018.

Inarestar dagiti nagresponde a kameng ti CPS ti suspek ken narekobre ti maysa unit AKKAR 12-gauge shotgun addaan lisensya SN 7556132 ken dua a bala iti uneg ti chamber. Narekobre pay iti crime scene ti maysa a bala, maysa a nausar a shell tib ala para 12-gauge shotgun ken maysa a bolo nga agatiddug iti 19 inches mairaman pagiggaman.

Naipan ti suspek iti Candon City Hospital para eksaminasion kalpsanna naipan iti Candon CPS karaman ti shotgun a nausar para iti dokumentasion ken umno a disposision. (Tawid News Magazine)