Footer

Panagsukat ti Liderato iti Senado

ADU dagiti nasdaaw iti kellaat a panagsukat ti liderato iti Senado ta nakasanayanen iti naglabas a panawen nangruna idi sakbay ti deklarasion ti Martial Law a dagiti nagakem a Senate President ket dagiti mabigbig nga statesmen nga addaan iti naidumduma a saririt, kabaelan ken integridad.

Nagakemen kas baro a Senate President ni Senator Vicente “Tito” Sotto III kalpasan a naglusulos a Presidente ni Senator Aquilino “Koko” Pimentel III gapu ta nakapapirma dagiti senador a kameng ti Supermajority iti resolusion a nangkiddaw iti pannakaideklarar a bakante ti posision a Presidente iti Senado a sigud nga inigganan ni Pimentel idi nagakem ni Presidente Rodrigo Duterte idi 2016.

Sinuportaran dagiti 14 a kameng ti Supermajority iti Senado ni Sotto iti rason a saanda a napnek iti liderato ni Pimentel. Binabalawda ni Pimentel a napaay a nangdepender iti Senado kadagiti kritisismo a makadadael iti institution nangruna iti alegasion ni House Speaker Pantaleon Alvarez a naginad dagiti senador a mangaprobar kadagiti gakat a mangsuporta kadagiti programa ken gannuat ti agdama nga administrasion.

Induron dagiti senador a kameng ti Supermajority ni Sotto nga agbalin a Senate President iti namnamada a natibtibker isuna a mangidepender ti Senado kadagiti kritisismo ken mangpadaras ti proseso dagiti prioridad a gakat wenno priority bills a mangsuporta kadagiti plano ken programa ti administrasion.

Adda dagiti mamati nga adda naun-uneg ken nalimed a rason ti pannakapadisi iti posision ni Pimentel. Agpayso ngata a maysa a rason ket ti panangkontrana iti wagas a pannakapadisi ni sigud a Chief Justice Ma. Lourdes Sereno babaen ti quo warranto petition ta kayatna a mayuli koma iti Senado ti Impeachment Complaint ket isuda a senador ti mangikeddeng iti pagbanagan ni Sereno.

Mangnamnama ti kaaduan dagiti 23 a senador nga iti liderato ni Sotto a miembro ti partido a Nationalist People’s Coalition (NPC) ket agbalin ti Senado nga ad-adda nga agwaywayas iti impluensia ti Malacañang ta ni Pimentel ket isu ti Presidente ti Partido ng Demokratikong Pilipino – Lakas ng Bayan (PDP Laban) a partido ni Presidente Rodrigo Duterte.

Saan a patien dagiti dadduma a kongresista iti oposision nga iti panagsukat ti liderato iti Senado ket agbalinen daytoy a nawaya iti impluensia iti Malacañang ta mapaliiwda ti nakaro a panagpadakkel iti papel iti Palasio dagiti senador a kaaliado iti Supermajority. Mamatida nga uray no Presidente ti PDP Laban ni Pimentel, ken agpadada a taga-Mindanao ken ni Duterte, ket natantanang dagiti pangngeddengna kadagiti napateg nga isyu a pakaseknan dagiti adu nga umili.

Sinukatan met ni Senador Juan Miguel Zubiri ni Sotto kas Majority Floor Leader. Nagtalinaed met a Senate President Pro Tempore ni Senator Ralf Recto. Idauluan metten ni Pimentel ti komite a sigud a nag-chairman-an ni Zubiri – ti Comittee on Trade, Commerce and Entrepreneurship.

Nagkari ni Sotto nga iti lideratona ket agbalin ti Senado nga “independent-collaborator” iti administrasion. Impasingkedna ti panangsuporta ti Senado ti pannakapadaras ti pannakaipasa dagiti prioridad a gakat para ti pagsaayatan ti sapasap.

Pinatalgedan met ni Pimentel ti napasnek a pannakikaysana kadagiti gannuat ti Senado ken ti agtultuloy a pannakatimpuyogna iti Supermajority iti laksid ti pannakapadisina kas Senate President.   Impaganetgetna iti publiko nga awan ti nasakit a nakemna iti pannakapukawna iti sigud a posisionna, ken isuna pay ti mismo a nanginominar ken ni Sotto a sumukat kenkuana. Ngem pudno ngata dayta a karirikna ken kananakem ni Pimentel wenno pammarang laeng a nakaugalianen dagiti politiko?

Pagaammo ti publiko ti gura ni Pimentel idi immipus ken ni Zubiri a naika-12 kadagiti nabutosan a senador idi 2007 Elections. Prinotestaan idi ni Pimentel iti Senate Electoral Tribunal ni Zubiri a benepisario ti Dagdag-Bawas election fraud. Uray idi naglusolusen ni Zubiri iti Senado idi 2011 ket saanna a napakawan ta patienna a narabsut iti karbenganna a nabutosan a senador. Sakbay ti 2016 Elections, nakagura ni Pimentel iti ninongna ken nabayagen a kapartiduanda iti amana iti PDP Laban a ni Vice President Jejomar Binay gapu iti panangalana ken ni Zubiri a kandidato ti partidoda. Nagangayanna, naglusulos ni Binay iti PDP Laban, ket binangonna ti United Nationalists Alliance.

Saanen a nakaskasdaaw dagiti kellaat a rigodon wenno panagsisinnukat iti posision iti Senado ta dagiti akemda ket bunga ti desision dagiti kaaduan gapu kadagiti adu a katulagan ken kompormiso. Adu laeng dagiti naklaat iti baro a Senate President ken Majority Floor Leader gapu kadagiti kontrobersial nga isyu a nakainaiganda iti naglabas a panawen.

Naglaka la ketdin a makalipat dagiti senador a kameng ti Supermajority ta saandan a malagip ti kontrobersial a nakairamramanan dagiti dua a nangato a lider iti Senado. Saanda laengen a nakapili ti liderda nga awan-pulos ti mantia ti integridadna tapno mapasubli ti panagraem dagiti umili iti Senado.

Mabigbig ni Sotto a maysa kadagiti kabayaganen nga agdama a senador ti pagilian ket saan a mailibak nga adun dagiti inlugalongna a gakat a nagbalin a linteg. Ngem nalawag pay laeng iti lagip dagiti dadduma a Pilipino ti kontrobersial nga isyu a nangdayyeg iti Senado ta idi 1997, nagbalin idi ni Sotto a sentro ti kontrobersia iti pannakainaigna iti masuspetsa a drug lord a ni Alfredo Tiongco. Inimbestigaran dayta a pasamak ti Senado ken Department of Justice a natakuatan ti koneksion da Tiongco ken Sotto ken dagiti naka-assigned kenkuana a police aides. Iti dayta a panawen, idauluan idi ni Sotto ti Committee on Illegal Drugs, ken maibilang isuna kadagiti agkandidato iti nangatngato a posision iti 1998 Presidential Elections, ngem saanna nga intuloy ti panggepna  gapu iti kontrobersia.

Nadanonen ni Sotto ti maikatlo a kangatuan a pagsaadan iti pagilian. Mabalin maseggedan manen ti nadepdep idi a tarigagayna a nangatngato a posision iti gobierno iti masakbayan a panawen. Manamnama a maysanto isuna kadagiti mapagpilpilian a mangidaulo iti pagilian.

Napateg ti integridad ken moralidad iti panagserbi iti gobierno uray no matagtagibaban daytoy ta adun dagiti maisasaad iti nangato a posision nga adda mantia ti reputasionna.  Saan koma a maitanem iti lagip dagiti umili ti napalabas dagiti opisial tapno adda pagbasaran iti pannakaisaadda iti nangatngato a turay. (Eden Alviar)

Comments are closed.