Footer

SINURSURAN: Ti Brigada Eskwela (Umuna a paset)

KAANO ti Brigada Eskwela, sir? nasaludsod kenkuana iti messenger. A nakatiaganna.

Wen, aya, Brigada Eskwela manen. Kayatna a sawen, asidegen nga aglukat ti klase. Saan manen a napupuotan a nalpas ti agdua bulan a bakasion.

Ngem saan a makuna a bakasion para kadakuada. Naynay latta nga addada iti pagadalan a mangakem iti di agressat a rebbengenda. Narigat pay a maisingitda ti pamiliada no palausen ti manarita.

Simmeksek iti panunotna: no Brigada, iti apagkirem, klasen.

Adu a saludsod ti umap-apay iti panunotna. Kasanoda manen nga isagana dagiti klasrumda?

Itoy a kalgaw, manarimaan ti pannakaipatakder ti 10 a baro a kuarto dagiti ubbing. Ken karugrugi la unay ti baro a gymnasium-da. Iti kinailet ti solar ti pagadalan, no palaluan ti agsao, awanen ti itiitan iti uneg ta agdidippiit dagiti pasdek. Asidegda pay iti baybay. Agarup pitopulo metroda laengen iti kadaratan.

Gapu itoy nga aktibidad iti pagadalanda, agkaraiwara dagiti masapul iti construction. Ken dagiti basura a maparparnuay dagitoy. Nagnaedan payen dagiti trabahador dagiti kuarto.

No isu ti matungpal, agpatakder koma dagiti trabahador iti bunkhouse-da. Ngem kurang ti espasio ti pagadalan. Isu a pinabus-oyan ida ti prinsipalda nga agtalinaed pay laeng kadagiti klasrumda.

Ti rigatna, iti panagnaed dagiti trabahador iti pagadalan, iti panangsiripna kadagiti klasrum iti maysa nga aldaw, naimatanganna no kasano kawara dagitoy. Awanen iti urnos dagiti tugaw, lamisaan, divan kada aparador. Uring-uring ti suelo; kasla saan a masagsagadan.

Napanunotna a nasayaat la unay ti kaadda daytoy makunkuna a Brigada Eskwela. No di mariro, maikasangapulo ket lima a tawenna itan daytoy a programa ti Departamento ti Edukasion.

Gapu iti Brigada, malag-ananda a mangisagana iti pagadalan para kadagiti ubbingda. Saan laeng nga iti uneg ti klasrum ti masapul a maisagana. Sibubukel a pagadalan.

Idi damo a mailungalong daytoy a programa, awan sabali a nakaisangratanna no di ti pannakaisagana ti pagadalan iti panagserrek dagiti ubbing. Nadalus, naurnos, makapasalibukag iti imatang. Tapno conducive for learning a kunada.

Ngem idi agtanoy, naduktalan a saan laeng a panagdalus, panag(i)sagana ti Brigada. Adda naun-uneg a banag a minulina iti puso ti tumunggal maysa.

Nabiag ti espiritu ti bayanihan wenno panagtitinnulong. Awan ti imposible a trabaho no adda panagkakayammet. Nalag-an ti ipato a nadagsen.

Iti Brigada, maimatangan dagiti annak no kasano ti panagtitinnulong dagiti nagannak kadakuada. Mabalin nga agserbi kadakuada daytoy a pagsarmingan. Maimula iti panunotda ti rigrigat dagiti nagannakda a nangisagana iti pagadalanda. Mangibunga daytoy iti panangipategda kadagiti ania man a madanonda iti uneg.

Makainut pay ti pagadalan iti Brigada. Imbes a manangdan ti pagadalan iti panagpatarimaanna kadagiti nadadael, saanen ta addada dagiti nagannak a makabael itoy. Ti mabusbos koma, mausar laengen para kadagiti ubbing. Maigatang iti masapsapul iti uneg ti klasrumda. Wenno iti usarenda a mannursuro tapno nasaysayud ti pannakayallawat ti adal kadagiti adalan.

Iti biang dagiti nagannak, makapagam-ammoda a nasayaat kabayatan ti panagtrabahoda. Mapapigsa ti relasionda. Makapaggagayyemda. Maimula iti isipda ti pateg ti tunggal maysa iti yaaddang ti pagadalan.

Itoy a wagas, mabukel ti timpuyog dagiti nagannak a mabalin a makapanunot/makaparnuay iti pagsayaatan ti pagadalan.

Nagbalinen nga obligasion dagiti nagannak ti BE. Kas maysa nga obligasion, masapul ti pannakipasetda para iti maymaysa a gagem. Saanto a pulos agballigi daytoy no awan ti pannakitimpuyogda.

Ngem no apay nga iti kapaliiwanna, adu latta met dagiti di mangikaskaso kadaytoy a programa. Namin-anon a napaneknekanna dayta.

 

Kadagiti Brigada nga insaysayangkaten ti pagadalanda, idi damo, adu ti agparang iti umuna nga aldaw daytoy. Napayamanda ta kadagita a panawen ti kaadu ti maubra.

Kas pagyamanda, ikarkarigatan ti pagadalanda, uray bassit laeng daytoy ket bassit ti pondona iti binulan, nga imbaklay ti merienda dagiti naki-Brigada.

Ngem iti panagbayagna nga agisursuro, dagitoy man ti nadlawanna:

Umuna: bumasbassit ti maki-Brigada iti umuna nga aldaw ti makalawas a programa. Maysa laeng ti sumekseksek iti panunotna: kaadu ti trabaho. Mabalin a kayat a lisian dayta dagiti dadduma. Naimbag kadagiti maudi nga aldaw ta bassitto laengen.

Maikadua: nupay naibaga a masapul nga agmalmalem ti Brigada, kaaduanna a gudua aldawda laeng. Rasonda nga adu pay ti trabaho kadagiti balbalayda. Ken baginto kanon dagiti naudi dagiti saanda a naileppas.

Maikatlo: adu latta ti maladaw uray naipakaammo ti oras a panangrugi. Nadlawna pay ketdi nga iranranta dagiti dadduma ti agpaladaw tapno apagisunto no merienda ti pannakilaok, pannakirapokda iti ummong. Ken bassitto laengen nga oras nga agtrabahoda. Isuda pay ti umun-una nga agdamag ti yan ti pag-attendace-san.

Maikapat: addada met latta dagiti physically present laeng. Imaimada a dumteng. No awan mabagida a sagad ken dust pan ti pagadalan, pamrayanda ti agpag-ot kadagiti ruot. Ngem ad-adda a husto a kunaenna nga agimpapag-ot dagiti dadduma. Agaabay, agsisinnangoda nga agpag-ot. Nakamikmikida met. Arigna kudkuddotenda, pidpidilenda laeng dagiti bulong ti ruot. Kasano, ti maysa nga imada, nakaiggem laeng iti selpon idinto a di agtalna ti panagtsitsismisda.

Ken maikalima: adda sagubanit a pambaritis (managpambar) dagiti dadduma. Ipangngepangngegda a kasda la trangrangkasoen. Saanda kano koma nga umay. Ngem mabainda la kano. Ngem nangngeganna iti naminsan a rasonda la gayam dayta tapno saanda nga ipamaysa ti agtrabaho.

Kadagiti naagapad a kapaliiwanna, no masintir wenno madlawan dagiti ubbing daytoy nga aramid dagiti nagannakda, saan nga adayo a tuladenda.

Imbes ngarud nga agballigi ti programa a mangmuli kadagiti ubbing, saan ta mabalin a pagsakduanda pay iti linoloko nga aramid kas makitkitada kadagiti nagannakda.

Kenkuana, saan koma ngarud a barengbarengen dagiti nagannak daytoy a programa. Napateg ti napaypayso a pannakikaykaysada. Nakababain met laeng no saan a makaay-ayo ti pagadalan a pagtalinaedan dagiti ubbing kabayatan a tuntun-oyenda dagiti arapaapda.

Maminsan laeng ti Brigada iti makatawen. Saan koma a pagrason dagiti nagannak nga adu ti asikasuenda kadagiti balbalayda isu a nasken nga aglanganda wenno agawidda a nasapa. Manen, maysa nga obligasion, kas nagannak, ti maki-Brigada.

Akmen a sipupuso. Ited ti sibubukel a bagi kadayta nga aldaw.

Asino koma pay ti agtitinnulong a mangpapintas iti maysa a pagadalan no di dagiti mannursuro, opisial ken dagiti nagannak a kas stakeholders?

No agdinamag nga awan ti pannakitinnulong dagiti nagannak iti maysa a pagadalan, asino ti umuna a maibabain? Ti dayaw ti pagadalan, dayaw met dagiti nagannak. Ti pakaibabainanna, pakaibabainan met dagiti nagannak.

Maikkat koma, idawdawatna a kanayon, ngaruden ti pampanunot dagiti dadduma a nagannak a ti laeng koneksionda iti pagadalan ket ti agbasbasa nga anakda dita. Awanen. Agpabpabasada laeng.

Tunggal maysa, panunotenna koma a makipagtagikua iti pagadalan. Ngarud, masapul nga ipategna daytoy. Taripatuen, saan a dadaelen.

Ket ti Brigada, maysa laeng nga addang a pangipakitaan no kasano nga ipakita ti panangipateg iti pagadalan.

Sapay la koma ta itoy a Brigada, ipamatmat met laeng dagiti nagannak ti napaypayso a suportada.

Dayta ti idawdawatna!

(Gibusna)

Comments are closed.