Footer

Barangay Kagawad, napaltogan, aglaklako empanada nairaman

BANTAY, Ilocos Sur – Maysa a barangay kagawad ti napaltogan, a nakairamanan ti aglaklako iti empanada, idi malem ti Mayo 27 daytoy a tawen iti igid ti National Highway a sakup ti Brgy. Cabaroan, daytoy nga ili.

Napaltogan ti adu a paset ti bagi ni Kag. Wilson Leones y Bosque, 49, naasawaan, ken residente iti Brgy. Banaoang, daytoy nga ili, iti igid ti national highway a sakup ti Brgy. Cabaroan, Bantay.

Nagsardeng ti kagawad a naglugan iti maroon Hyundai Starex, Plate No. WGH494, iti igid ti highway tapno gumatang iti empanada a lako ni Edna Peralta y Ponciano. Agbayad koman idi pinaltogan dagiti lalaki a nakahelmet ken nakalugan iti Mio a motorsiklo. Nakadiaket iti asul ti pimmaltog ket t- shirt a nangisit met ti aruat ti drayber. Nairaman a napaltogan iti abaga ni Peralta, ti aglaklako iti empanada.

Intaray dagiti nagresponde a kameng ti MDRRMC da Leones ken Peralta iti Metro Vigan Cooperative Hospital ngem declared a dead-on-arrival ni Leones gapu iti gunshot wounds a sinagrapna. Madama a maag-agasan ti gunshot wounds ni Peralta.

Nangisayangkat dagiti police stations iti dragnet operations. Iti crime scene, nakarekobre ti SOCO ken nagtipon a kameng ti KIMAT team iti 9 a kapsula ti cal. 45, 6 a bala, 1 a cal. 22 UNCETA Y COMPANIA S.A. nga addaan serial # 134116 ken maysa a magazine a nagkarga iti lima a live ammo para Cal. 45. (Tawid News Team)

Comments are closed.