Footer

Kapitan Tiudi, singkuenta (Maudi a paset)

Naisem ni Ma’am Bingbing a nanglamano kenkuana idi rumuar iti presinto. Iniseman met ni Manong Sabas ti maestra nupay dina ammo ti rason no apay a linamano daytoy.

Inturong ni Manong Sabas ti tugawna iti sirok ti dungon iti asideg ti pagserkan. Kinitana ti relona. Pito minuto laengen sa maikatallo iti malem. Nagpalpaliiw dagiti matana ken nagdengdenggeg idinto nga agwerwerret ti utekna. Dayta laeng ti maobrana no awan ti kasarsaritana – malaksid iti panagbuya iti telebision ken panagbasa iti Bannawag no adda iti balayda. Madamdama, nagsaltek ti imatangna iti dua ti kuartona a pasdek nga aggatad iti walo gasut a ribu a pisos. Napawingiwing.

Limmabas da Unnik ken Abad. Agtaray met dagitoy a para kagawad. Agkatawa koma ni Manong Angkuan ngem sanna inaramid ta asidegen dagitoy. Awan man la ti inbaga dagitoy a platapormada idi miting de abanse. Kuna idi ni Unnik: Laglagipendakto met inton madanon ti panagpipili, kakabsat. Kayatko met ti tumulong iti lugartayo. Kuna met ni Abad: Laglagipenyo daytoy a kabsat ket anakyo, kakabsat. Daytoy ti langa ti mapangnamnamaan. Sa pinasarunuan daytoy daytoy ti kanta. Ti ellek idi ni Manong Sabas. Ngem napunas dayta idi malagipna nga adu dagiti botante a mangayat a mangibotos kadagiti nalaing nga agpakatawa ken agkanta iti kampania.

Napaisem iti bangbangir iti kaadu dagiti para kagawad. Duapulo ket maysada amin. Basta ammonan san ti umisem ken mangibaga iti ‘laglagipendakto’ wenno ‘iramanyonto met ti naganko’ ket inarisgarandan ti nangipila iti kandidaturada. Kasla kabus ti rason no apay a nagkandidatoda – ti honorarium wenno dayaw.

Nalagip ni Manong Sabas ni Indung. Agtaray met daytoy a para kagawad idinto a dinansa pay ammo nga isurat ti naganna. Dina met ammo ti naknakan ni Allon ta malaksid a madi ti galad daytoy ket mammartek pay. Nalabit, natibker ti nakemna ta adu ti kabagianna a botante. Dayta ti maysa a mapalpaliiw ni Manong Angkuan ditoy lugarda. No adu ti kabagian ti kandidato, para kagawad wenno kapitan, siguradon a mangabak. Dayta ti maysa a galad dagiti kalugaranna a di kayat ni Manong Sabas. Maan-ano koma a dida ibotos uray kabagianda no di met rumbeng a mangabak. Tapno ngata as-asidegto ti grasia a dumteng kadakuada no mangabak ti kabagianda?

Kinitana manen ti relona. Liman a minuto ti surokna nga alas tres. Ur-urnosenda ngatan dagiti balota, nakuna ni Manong Sabas iti unegna. Maisagsagana pay ngatan ti blackboard a pagikur-itanda ken ti tally sheet.

Madamdama pay, dimteng ni Zachary, ti baro ni kasinsinna, a binaonna a mangkita ken mangipakaammo no nangrugin ti panagbilang. Nangrugi kanon.

Saan nga immakar. Intuloyna ti nagdenggeg ken nagpaliiw nupay pangadaywen ti ayanna.

Nabayag sa dimteng manen ni Zachary. Nalpas kanon ti panagbilang iti maikadua a presinto ken dua pulo ken maysa la kanon a balota ti di pay nabilang iti umuna a presinto.

Nagpatulong iti baro a nagturong iti presinto a nagbotosanna. Nangegna ti kinuna ni Ma’am Rosing a siam la kanon a balota ti di pay nabilang. Saan a makastrek. Palpaliiwenna lattan dagiti agbuybuya iti ruar ti kuarto. Adda pagna a pagna, adda punas a punas iti rupana. Sabali pay dagiti mangkudkudkod iti di met nagatel a teltelda. Nalabit kabagian daytoy ti maysa a kandidato a nangkuarta. Addada met nakaul-ulimek ken isem nga isem nga agikurkur-it iti iggemna a papel. Adda met agkatkatawa a pasaray aglagto. Pasaray adda agkikinnamatan nga ubbing.

“Kapitan. . . Tiudi Ubanan!” napasarunuan iti katawa iti uneg ken ruar ti presinto.

Napaisem ni Manong Sabas.

“Kagawad. . . Allon Bartek. . . Indung Singkuenta. . . Ayyu Singkuenta! . . . Unnik Wan Empe!” Ni Ma’am Rosing. Nagkakatawa manen dagiti agbuybuya.

Nagwingiwing ni Manong Sabas. Appounay metten dagitoy a botante, kinuna ti nakemna. Agbotosda la ngaruden paglolokuanda pay laeng!

“Kapitan. . . Tiudi Singkuenta!”

Nagsubli manen ti isem ni Manong Sabas. Uray no paglolokuanda a tiponan ti nagan dagiti inbotos dagiti tattao ket adda met pagsayaatanna no maminsan. Kusto ti inbaga ni Manang Bussang a nagkaradapda idi rabii!

“Maikadua a maudi a balota, kakabsat.” Nangeg manen ni Manong Sabas ti timek ni Ma’am Rosing. “Kapitan. . . “

“No ni Kapitan Tiudi dayta ket tabla nokuan!” adda nagkuna. Nabilang ngaminen ti bangir a presinto ket nalabit inaynayon daytoy iti listaanna ti naisurat iti blackboard idi dumteng.

“Tiudi Matias!”

“Tabla! Nagganasen a laban!” inlagto ni Charlie.

Pimmaspas ti bitek ti barukong ni Manong Sabas. Nalagipna ti inkur-itna.

“Maudi a balota… “naggiiriag dagiti agbuybuya.

“Kapitan…. “nagsardeng ti timek ni Ma’am Rosing. Kimmaro ti dalagudog ti barukong ni Manong Sabas. Nakitana a nagtalna dagiti agbuybuya. “Jobert Marin!”

Binulosan ni Manong Sabas ti nauneg nga anges. Adda bang-ar a nariknana iti barukongna. Pengpengdanna ti marikanana a panagarimasa dagiti suli dagiti matana ngem dina nabaelan. Nagdumog sa kinautna ti paniona iti akinsango a bolsa ti pantalonna. Inyabbongna nga indennes iti rupana. Nagtablada koma no dina koma inkarigatan ti immay nagbotos. Ket adda tiansa ni kapitan Tiudi a mangabak babaen ti coin toss. Mabalin met nga agsikig ti piso wenno singko ngem mapasamak laeng daytoy maminsan iti kada innem a ribu a manangipallangatok iti baria.

Apagbiit sa inyangadna ti rupana. Pinalabsanna dagiti adda iti lawlawna. Kumitkita ti kaaduan kaniana. Saanen a kas itay ti maadawna kadagiti matada. Saanda nga agsasao ngem makita ni Manong Sabas dagiti ngipenda. Nadlawna, agtubbog manen dagiti matana. Nakarikna iti pannakkel.

Insublina ti panagkitana iti presinto. Rumrumuar dita ni baketna nga umasideg kaniana. Madlawna, kas met laeng iti naimatanganna iti ruar ti nakitana iti rupa ni baketna. Timbog manen dagiti matana ta kasla nakatakder iti panagriknana. Madlawna pay, napukaw a namimpinsan ti bannogna itay agturong ditoy presinto. #

Comments are closed.