Footer

Naabak a barangay kagawad, nagbekkel

ALILEM, Ilocos Sur – Mapapati a gapu iti pannakaabakna ti eleksion ti gapu no apay a nagbekkel ti maysa a mannalon idi parbangon ti Mayo 27 daytoy a tawen.

Iti report a naidanon iti Alilem PS idi agarup alas 5 ti parbangon idi Mayo 27 daytoy a tawen, nasarakan dagiti barangay tanod ni Jerry Olarte y Bugtong, 51, naasawaan, mannalon, agnaed iti Brgy. Dalawa, daytoy nga ili, a nakabitin iti sanga ti kawkawati a masarakan iti kataltalonan ti barangayda, nga awanen biagna.

Iti salaysay ni Ligaya Olarte Olarte, asawa ni Jerry, nakariingda nga agassawa iti pasado alas 2 ti rabii. Nagtimpla ni Ligaya iti gatas nga inumen ni lakayna gapu ta di makaturog daytoy. Nagsubli met a naturog ni Ligaya. Idi makariing ni Ligaya iti agarup alas 4, awan ni lakayna iti katreda. Nagpatulong kadagiti barangay tanod a mangsapul ken lakayna.

Kuna ni Ligaya a naabak ti asawana a timmaray para kagawad iti lepleppas a barangay eleksion. Awan kano met ti kinaringringgor ni lakayna. Iti napalpalabas nga aldaw kuna kano ti asawana a madmadi ti rikna ken awan gaganasanna a mangan isu a napanda nagpacheck-up iti ospital. Awan kano met naduktalan ti doktor a sakit ti asawana.

Dinawat ti Alilem PS a maawtopsia ti bangkay ni Jerry ngem saanen nga impalubos ti pamiliana isu a post mortem examination ti bangkay laeng ti insayangkat ti Alilem Rural Health Unit. (Tawid News Team)

Comments are closed.