Footer

Panangrugi ti School Year 2018 – 2019

AGLUKAT ita nga aldaw ti School Year 2018 – 2019. Sisasagana kadin dagiti eskuela-publiko, mangisursuro, estudiante ken nagannak iti panangrugi ti klase?

Inrakurak ni Education Secretary Leonor Briones a nakasaganan dagiti school buildings ken dadduma a pasilidad iti panaglukat ti klase iti Kindergarten – Grade 12 iti pagilian kalpasan ti pannakaisayangkat ti Brigada Eskwela iti napalabas a lawas.

Kabayatan ti innem nga aldaw a Brigada Eskwela, naipakita manen ti panagtitimpuyog dagiti agpapaay iti DepEd, nagannak ken dagiti adda iti komunidad. Panagkaykaysa ken panagtitinnulong iti pannakasimpa ken pannakadalus dagiti pasdek ken siled pagadalan, ken panagtitinnulong kadagiti magastos a kasapulan iti panangisagana kadagiti eskuela tapno nagin-awanton dagiti estudiante no sumrekda kadagiti eskuelaan.

Nagkas-ang laeng ta dagiti nagannak dagiti estudiante nga adu kadakuada dagiti narigat ti panagbiagna ti agkokontribusion tapno laeng makagatangda kadagiti kasapulan a mangpapintas kadagiti siled ken pasdek pagadalan a sakup ti DepEd kabayatan a nagadu nga ahensia ti gobierno dagiti saanda nga ammo ti pangipapaayanda dagiti pondoda. Adda dagiti nagannak nga agbibingay iti igatangda iti pinta tapno mapinturaan dagiti nangirngir a pasdek. Adda dagiti kameng ti Parents, Teachers and Community Association dagiti pang-publiko a pagadalan nga agkokontribusion tapno makagatangda iti lansa, semento, kayo ken galba tapno masimpa dagiti pagadalan, kabayatan a nagadu dagiti proyekto dagiti ahensia ti gobierno nga awan mamaayna, kas kadagiti white elephant projects, ken dagiti nabiit pay a nabangon nga imprastraktura a saan pay a naabrot ngem sigud a masukatanda.

Mairaman ti pannakapadur-as ti edukasion a prioridad ti administrasion ni Presidente Rodrigo Duterte nga ik-ikkan dakkel a a pondo tapno mapadur-as ti kalidad ti adal iti Pilipinas. Dayta pay ti gapu a naadaptar ti Kindergarten to Grade 12 Program tapno makapada ti Pilipinas iti international standard ti kalidad ti edukasion. Dakkel a pondo ti mayal-alokar iti DepEd a maus-usar para iti sueldo dagiti mangisursuro, pannakabangon ken pannakamantiner dagiti pasdek ken pasilidad, ken pannakagatang ken pannakasaluad dagiti alikamen ken kasapulan iti pagadalan. Ngem apay a maipabaklay pay laeng kadagiti nagannak ken mangisursuro dagiti dadduma a paggastosan dagiti pagadalan kas ti sueldo dagiti para dalus wenno utility worker, pagbayad ti koriente, ken igatang kadagiti gripo, bentilador ken dadduma pay nga alikamen.

Mapaliiw nga adu latta dagiti pangpubliko nga eskuela iti nagduduma a paset ti pagilian dagiti agsagsagaba iti problema iti kinadaan dagiti pasdek, kinakirang dagiti pasilidad, tugaw, ken dadduma pay a kasapulan iti eskuela. Adu pay laeng a public schools kadagiti nauneg a barangay dagiti agkurang ti mangisursuro ken awanan kadagiti natalged nga school buildings.

Adu dagiti eskuela kadagiti nasulinek a lugar ti agkurkurang dagiti siled-pagadalan ken kinaawan ti koriente tapno dagiti mangisursuro ket makaaramatda kadagiti moderno nga audio-visual aid, ken dagiti estudiante ket mapadasanda ti kabaruanan a teknolohia, ti panagaramat ti computer ken nagduduma a gadget tapno maadalanda iti kabaruanan a siensia ken teknolohia.

Ita a panaglukat ti klase ita a tawen, masubok manen ti anus ken dedikasion dagiti mangisursuro kas maikadua a nagannak dagiti adalanda tapno matubayda nga agbalin a namnama ken pagsanggiran iti masakbayan. Narigat a propesion ti panangisuro kadagiti ubbing ken agtutubo ta kasapulan daytoy ti adu nga anus iti panangiwanwan kadagiti dagmel ken nasukir nga adalan nangruna kadagiti agpapaay kadagiti public schools. Nagasgasat ketdi dagiti mangisursuro kadagiti pangpubliko a pagadalan ngem dagiti mangisursuro kadagiti pribado nga eskuela ta nangatngato nga amang ti sueldoda. Ngem saan laeng a nangato a sueldo ti pagubbogan ti ragsak dagiti mangisursuro; kangrunaanna no makitada nga agballigi wenno agbalin a nasayaat dagiti adalanda.

Iti iseserrek wenno panagsubli dagiti estudiante kadagiti pagadalan ket dakkel nga akem ken karit kadakuada ta narigat ti agadal. Kasapulan daytoy iti anus, sakripisio ken disiplina. Nasken ti panagadalda tapno maisagana ti naraniag a masakbayanda, ken ti masakbayan ti pamiliada ken ti pagilian. Nagasat dagiti ubbing ken agtutubo nga adda gundawayda nga agbasa ta adu dagiti kapatadanda dagiti saan a makastrek iti pagadalan uray napalaus ti tarigagayda ngem saanda a makapagbasa gapu iti nakaro a rigat ken dadduma pay a tubeng iti panagadalda.

Naindaklan a sakripisio dagiti nagannak ti panangisakadda kadagiti annakda tapno masagutanda iti nasaysayaat a masakbayan nangruna itan ta rumigrigat ti panagbiag. Awan samiren dagiti nagannak a rigat tapno maipaayanda iti adal dagiti annakda ta dayta ti kapatgan a maipatawidda a saanto a pulos a mapukaw iti tungpal biagda.

Iti pannakagun-od ti edukasion, nasken ti panagtitimpuyog ti gobierno ken dagiti amin a maseknan iti pribado a sektor tapno makaadal ken matubay dagiti ubbing ken agtutubo a namnama iti masakbayan ken sumaruno a henerasion. (Eden Alviar)