Footer

Pannakaimbestigar ti Solicitor General iti conflict of interest

MAIBILANG ti Solicitor General a kangatuan nga abogado ti gobierno a mangidepdepender ken mangiruprupir kadagiti isyu a legal pakaseknan ti administrasion.

Nalatak ni Solicitor General Jose Calida gapu kadagiti inggannuat ken iruprupirna a tignay ti administrasion ni Presidente Rodrigo Duterte kas iti pannakalabsing ti human rights iti nadara a kampania kontra illegal a droga, ti legalidad ti pannakaipumpon ti bangkay daydi sigud a Presidente Ferdinand Marcos sadiay Libingan ng mga Bayani; ken kaudianna ti panangipilana iti quo warranto petition iti Korte Suprema a nangwaswas ti appointment ni sigud a Chief Justice Maria Lourdes Sereno.

Napatgan ti quo warranto petition ti Solicitor General a nangwaswas iti appointment ti sigud a Chief Justice uray pay nagapilan daytoy iti Korte Suprema. Inreklamo ni Calida ni Sereno gapu iti saan a naan-anay a panagipilana iti Statement of Assets and Liabililities a kasapulan idi nagaplikar a Chief Justice. Nasarakanen dagiti dadduma mapukpukaw a SALN ni Sereno ngem kinednganen dagiti walo a mahistrado, kontra dagiti innem a simmuppiat ti pannakawaswas ni Sereno.

Nakalkaldaang ti pannakaikkat ni Sereno kas Chief Justice a bunga ti quo warranto petition ni Calida gapu iti saan a pannakasarak dagiti kompleto a SALN-na idi aplikante pay a kangatuan a mahistrado ti Korte Suprema.

Ti kangrunaan a panggep ti panagipila iti SALN ti tunggal opisial wenno agserserbi iti gobierno ket tapno ideklararna dagiti assets and liabilities-na, ken network-na iti gobierno tapno maduktalan wenno mapengdan no adda dagiti mailimlimed a kinabaknang ken koneksionna iti gobierno.

Nagkas-ang a pagteng a nabiit pay a napaboran ti quo warranto petition ni Calida kontra ken ni Sereno, ket simngaw met dagiti kontrobersia mainaig iti Solicitor General gapu kadagiti alegasion ti “conflict of interest” ta naduktalan a ti Vigilant Investigative and Security Agency a kukua ti pamiliana ket mapapati a nakaala iti nasurok a P150 Million a kontrata manipud kadagiti nagduduma nga ahensia ti gobierno, pakaibilangan ti Department of Justice a mangisagsagana iti budget wenno pondo ti Office of the Solicitor General.

Mapapati a ti security agency a kukua ti pamilia ni Calida ket nangabak iti 10 a kontrata iti gobierno iti nagtengngaan ti Agosto 2016 agingga iti 2018. Dagiti innem nga ahensia a nangabakan ti Vigilant iti kontrata: National Economic and Development Authority (1 a kontrata), Philippine Amusement and Gaming Corporation or Pagcor (3 a kontrata), National Anti-Poverty Commission (1 a kontrata), National Electrification Administration (1 a kontrata), ken Department of Justice (2 a kontrata), National Parks Development Committee (2 a kontrata). Manipud kadagitoy a kontrata, mapapati a ti Vigilant ket nakaganansia iti P150.815 iti las-ud iti dua a tawen.

Pinaglibakanen ni Calida ti pammabasol kenkuana a “conflict of interest” gapu ta naglusulosen kas Chairman ken Presidente ti Vigilant idi pay Hunio 30, 2016 sakbay a nangrugi a nagakem a Solicitor General idi Hulio 2016 kalpasan a naisaad iti akem ni Presidente Duterte. Inrakurakna nga impakaammon ti Vigilant iti Security and Exchange Commission idi pay Hulio 14, 2016 sakbay a nagakem a Solicitor General.

Nailanad iti pakaammo ti Vigilant iti SEC a ti asawa ti Solicitor General a Milagros Calida ti simmukat a Presidente ken Chairperson, ken ti abogado nga anakda a ni Josef ti nagbalin a Bise Presidente ken Corporate Secretary; ken ti babai nga anakda ni Michelle kas Treasurer.

Ngem segun kadagiti report ti media a naala iti SEC, kukua pay laeng ni Calida ti 60% shares iti agency agingga idi Septiembre 29, 2016, dua a bulan kalpasan ti panagsapatana kas Solicitor General. Maibasar pay iti report, ti Vigilant ket awanan iti sabali a shareholder malaksid kadagiti kameng ti Pamilia Calida kas nailanad iti General Information Sheet iti SEC idi Septiembre 29, 2016: Kukua ni Jose Calida ti 60%; Sag-10% met da Milagros ken dagiti tallo nga annakda a da Josef, Michelle ken Mark.

Naireport pay nga iti kaudian a SALN ni Calida ket saan a nalawag nga inlanadna nga adda pay shares-na iti Vigilant. Naipilan iti Office of the Ombudsman a dagiti kontrata ti Vigilant iti gobierno ket labsingenna ti Republic Act 6713 wenno Code of Conduct and Ethical Standards for Public Official and Employees.

Ipaspasingked ni Calida nga awan ti linabsingna a linteg, ngem adda dagiti eksperto ti mamati a ti kaso ti Calida ket umasping iti kaso ni Davao del Norte 2nd District Representative Antonio Floreindo Jr. Indarumen ti Ombudsman ni Florendo iti panaglabsing iti R.A. 6713.

Kalaksidan kadagiti innem nga ahensia ti gobierno a nakaalaan iti kontrata ti Vigilante, impakaammo pay ni Magdalo Partylist a manipud idi nagbaliw ti administrasion ket nasukatanen iti sigud a security agency a mangipapaay kadagiti security guard iti House of Representatives babaen kadagiti guardia iti agency a kukua ti pamilia ni Calida.

Dinependeranen ti Malacañang ni Calida, segun kada Presidente Duterte ken Presidential Spokesman Harry Roque, awan ti linteg a linabsing ti Solicitor General.

Nangipilan ti resolusion ni Senator Rizza Hontiveros iti Senado para iti imbestigasion iti isyu kontra ken ni Calida. Impasingked metten ni Justice Secretary Menardo Gueverra ti panagimbestigar ti DOJ iti kontrata ti Vigilante iti ahensia.

Saan pay a nakaadayo ti turongen ti isyu ti conflict of interest kontra ken ni Calida, ngem addan dagiti agkidkiddaw iti panaglusulosna. Natibker ti pagtaktakderan ni Calida nga awan ti linabsingna a linteg, ken saan nga aglusulos iti akem. Kas ti pammati ni Calida iti pagtaktakderan idi ni sigud a Tourism Secretary Wanda Teo kabayatan ti pannakairamanna iti P60 Million a kontrobersia iti promotional advertisement ti DOT iti programa ti kabsatna a ni Ben Tulfo a blocktimer iti People’s Television 4, ngem nagangayanna, naglusulos met laeng isuna.

Rebbengna ti nainget nga imbestigasion tapno maduktalan no adda linteg a linabsing ni Calida ket nasken a maikkat iti akem wenno maidarum no nagbiddut wenno nagbasol isuna gapu ta kas kangatuan nga abogado ti gobierno, rebbengna nga agserbi ti Solicitor General a pagulidanan iti panagtungpal iti linteg a kas met laeng ti panagbalin a modelo ti Chief Justice iti Korte Suprema. #

Comments are closed.