Footer

Retirado a polis, pinaltoganna ti nangidarum kenkuana

VIGAN CITY – Maysa a retirado a polis ti nangpaltog iti nangidarum kenkuana iti kaso a Maltreatment and Grave Threat, idi agarup alas 5 ti malem ti Mayo 29, daytoy a tawen iti Vigan City Public Market.

Nainaganan ti biktima a ni Reynante Balmaceda Manuel, 35, naasawaan, awanan trabaho ken residente ti Brgy Palao, Bangued, Abra. Nabigbig met ti suspek a ni Jose Arce Arce, 53, retirado a miyembro ti PNP, ken agnaed iti Brgy Capangpangan, Vigan City, Ilocos Sur.

Segun iti inisial ng inbestigasion, napan nagpapedicure ni Manuel idiay Myrna Salon a masarakan iti Vigan City Public Market kalpasan ti hearing ti kaso a Maltreatment & Grave Threat nga inpilana kontra ken ni Jose Arce iti Municipal Court in Cities, Vigan City.

Apan sinarak ni Arce ni Manuel ket napasamak ti nabara a patangan a nagtungpal iti panagdinnanog. Naabak ti suspek ket inasutna ti cal. 38 a paltogna sana pinaltogan ni Manuel iti namindua a daras. Naagaw ni Manuel ti paltog ket inpalladawna sa timmaray a naglugan iti motorna. Nasabat dagiti police patroller ket intarayda iti Gabriela Silang Gen. Hospital. Naala ti inbestigador a police on duty ti deklarasion ti biktima a ni Jose Arce ti nangpaltog kenkuana, sakbay a pimmusay idi alas 6:49 ti rabii dayta met la a malem ti Mayo 29, bayat ti panangtaming ti doktor kenkuana.

Narekobre ti SOCO Ilocos Sur PPO ken clustered KIMAT iti crime scene ti maysa a cal. 38 a paltog a nagkarga iti 4 a bala ken 2 a kapsula. Babaen ti hot pursuit operation nga insayangkat ti Vigan City Police Operatives nga indauluan ni PCI Cipriano Gahisan Macaraeg, Jr. ken tulong ti San Fernando City Police, naarestar ti suspek iti emergency room idiay Ilocos Training and Medical Center, San Fernando City, gapu iti napaltogan a kannigid nga abagana, iti agarup alas 12:30 ti rabii ti Mayo 30 daytoy met la a tawen.

Inyawid da PCI Macaraeg ti suspek ket intarusda iti Gabriela Silang Gen Hospital tapno maagasan. Inpanda iti Vigan City Police Station kalpasanna. Napilaanen iti kaso a homicide ken violation of R.A. 10591 ni Arce iti Vigan City Prosecutors’ Office, Vigan City, Ilocos Sur. (Tawid News Team)