Footer

SINURSURAN: Makikadua, Saan nga Agbalin a Managimbubukod (Umuna a paset)

NO man is an island. Agbibiagtayo iti tulong dagiti adda iti aglawlawtayo.

Kunada ngarud a kurang ti biag, panagbiag no agmaymaysatayo wenno daytay kasla awan am-ammotayo a tao. Wenno kasla awan kasapulantayo iti padatayo a tao.

Idi pinarsua ti Dios ti lubong, ammona a naliday ti agmaymaysa. Manipud iti paragpag ni Adan, binukelna ni Eva a kas katakunaynay ken kadkadua daytoy.

Iti panaglabas ti panawen, naipamatmat no kasano ti kinapateg ti pannakigayyem, ti pannakikadua ken pannakipaset kadagiti aktibidad iti aglawlaw.

Awan mamaay dagiti ania man nga aramid wenno gannuat no saan a pagtitinnulungan, pagbibinnadangan a kasla pudpudno nga agkakabsat.

Aklonentayo, nupay kunatayo a baknangtayo amin a kinabaknang, kasapulantay latta dagiti padatayo a tao. Kawaw ti biag ti agmaymaysa.

Nasamsam-it ti agbiag a gayyemna dagiti adda iti aglawlawna, wenno daytay awan ti kaginginnurana ken kalabanna.

Kinabaknang dagiti gagayyem, kunada man.

Kinabaknang a saan a material. Ngem isu ti kasapulan a mangitallapaw kadatayo.

Ngem kas daytay kunadan, pilien ti gayyem. Daytay ammona ti kayat a sawen ti balikas a gayyem. Kayatna a sawen, nakasagana a tumulong, mangbatak no agparikut ti gayyemna. Saan a daytay gayyemna laeng no kasta nga adda pakairanudanna, wenno adda masapulna kadaytoy.

Kasta dagiti dadduma a politiko, kuna ni Apong Sabas.

Masubok ti pudno a gayyem iti panawen ti krisis. No asino dagiti bumayabay, tumulong nga awan ti ur-urayenna a kasubad, dagita ti napudpudno a gayyem. Rebbengna a tagipatgen.

Iti pannakidangadangtayo iti inaldaw, agduduma a kita ti tao ti masagang, ti makapulapol, ti makatrabaho ken makakinnayammet kadagiti aramiden. Agbalin koma a nasiput, naalibtak a mangarisit iti kinatao dagitoy tapno saanto a maisagmak iti masanguanan.

Pudno unay nga adun dagiti mananggundaway. No agkapuykapuy, alaenda daytoy a kanito a mamaysaandaka.

Ngem no rebbengna met a subadatantayo iti napudno a pannakigayyem wenno pannakikadua ti aramid, garaw, ken gagem dagitoy a masalawtayo, apay ketdin nga ipaidamtayo koma?

Iti inaldaw a maaddaantayo iti uray maysa a napudno a gayyem, ania ketdin a sayaatna. Agur-urnongtayo iti kinabaknang.

Iti kinaimbag a maaramidantayo, kinaimbagto met laeng nga agsubli. Mamin-adu pay a daras!

Ngem sabali daytoy kapadasan ti am-ammotayo. Ilingedtayo iti nagan a Ana Marie.

Eleksion. Nagserbi ni Ana Marie iti maysa kadagiti uppat a barangay iti lauden ti ilida. Sangapulo ket duada amin nga election officers iti Brgy. Labula Norte a nagserbianna. Uppat amin a presinto ti adda dita.

Sag-iinnem met a mannursuro dagiti nagserbi iti Brgy. Nilao iti dayaenda; Brgy. Labula Sur iti laud ken Brgy. Ganavan iti abagatan. Sumatotal, tallopuloda amin.

Naannayas ti nagbalin nga eleksion iti barangay a yan da Ana Marie. Rabii ketdin idi malpasda a nagbilang. Insarunoda dagiti dokumento/reports a masapul nga ipalpasda sakbay nga ibiaheda iti munisipio dagiti ballot boxes.

Kalpasan a nalpasda dagiti masapsapul, nagrubuaten ti grupo da Ana Marie. Apagisuda iti van ti maysa kadagiti board of canvassers ken ti kotse dagiti polis a nangbantay kadakuada.

Ngem saanda a nakapanaw. Inurayda dagiti kakaduada kadagiti tallo a barangay. Masapul a maymaysa ti convoy-da a bayabayen dagiti polis para iti seguridadda amin. Manglikawda ngamin (nasurok a maysa nga oras ti biahe) ta narisgo ti agbangka a mangdaliasat iti sabangan nga agarup kagudua oras laeng ti biahe. Sa maysa, awan ti agballasiw a rabrabii iti baybay.

(ADDA TULOYNA)