Footer

Umno a proyekto a pannakaaramat ti R.A. 7171 fund, impaganetget ti Vice Gov ken Mayor

VIGAN CITY – Nagtaud ti rigat ken ling-et dagiti mannalon ti tabako a birhinia ti adu a pondo a sagsagrapen ti lokal a gobierno iti Ilocos Sur ken dagiti ili ken siudad iti daytoy a probinsia, isu a rumbeng a dagiti tumutop a proyekto ti pakaaramatanna a mangpadur-as ti biag dagiti agtaltalon ken ti sibubukel a probinsia.

Dayta ti nagkaysa a kapanunotan ken tarigagay da Vice Gov. Jeremias Singson, ken Santo Domingo Mayor Amado Tadena kabayatan ti pannakiuman kadakuada ti Ilocos Sur Integrated Press iti nagsina a Kapihan iti Amianan Media Forum.

Impakaammo ni Vice Gov. Singson a ti Provincial Government ket addaan ti kaudian nga alokasion nga agarup P4 Bilion manipud iti R.A. 7171 Fund nga agpaay ti pannakapadur-as ti probinsia nangruna dagiti mannalon. Impalgakna pay a nakurang bassit a maysa a billion a pisos ti naala ti LGU iti Cabugao, ken sarunuem dagiti LGU iti Santa Cruz, Narvacan ken San Juan. Impakaammona pay nga uray dagiti upland municipalities ken dakkelen a pondo dagiti alokasionda iti R.A. 7171 Fund nangruna iti San Emilio.

Inlawlawagna a dimmakkel ti bingay dagiti LGU nga adu dagiti agmulmula iti tabako a birhinia gapu ti pannakaingato ti Sin Tax dagiti sigarilio. Impakammona pay nga uray non-tobacco producing LGU a naka-fixed ti bingayda ket manayonan met. Impalgakna nga addan dagiti LGU kadagiti ili a saan a sigud mamulmulaan iti tabako ti nangpapadasen ti nagpamula tapno ngumato ti bingayda kas ti Santa Catalina ken San Ildefonso. Impaganetgetna nga iti kadakkel dagiti pondo a bingay ti probinsia ken dagiti lokal a gobierno ket no umno ti pannakaaramatda ket awanen iti rason a saan a dumur-as ti kasasaad dagiti mannalon ken ti intero nga Ilocos Sur.

Indarirag ti Vice Governor a nasken a makonsulta dagiti mannalon no ania dagiti kangrunaan a kasapulanda a nasken nga ipaay ti gobierno ta isuda ti ad-adda a makaammo kadagiti banag a makapadur-as ti panagbiagda. Impakaammona nga agtultuloy ti panangipaay ti Provincial Government ti tulong kadagiti mannalon kas kadagiti libre nga alikamen iti agrikultura, bin-i ti irik ken mais, abono ken dadduma pay a kasapulanda.

Iti met met pannakiuman dagiti kameng ti ISIP ken ni Santo Domingo Mayor Tadena, impakaammona a maysa kadagiti kangrunaan a proyekto ti lokal a gobierno a napunduan iti R.A. 7171 Fund ket ti pannakabangon ti nalawa a Farmers Productivity Center sadiay igid ti National Highway iti Brgy. Parada. Impalgakna a mausar daytoy a pakai-display-an ken pagtagilakuan kadagiti sobra a produkto dagiti mannalon tapno nasaysayaat ti presioda, ken agpaay pay a training center dagiti agtaltalon.

Inrakurak ni Mayor Tadena ti kinapateg ti agtultuloy a panagsanay dagiti mannalon kadagiti kabaruanan a wagas ken teknolohia iti panagtalon tapno lumag-an ti trabahoda, ken umadu dagiti apitda. Impalgakna nga awan ti maibilang a One-Town, One Product iti Santo Domingo gapu ta nagduduma dagiti produktoda. Impakaammona pay a dandani aminen a farm-to-marker road iti Santo Domingo ket masementon, ken panggepda ti mangpalawa kadagiti kalsada kadagiti barangay. Planonda pay iti masakbayan ti mangpatakder iti baro a public market gapu ta naileten ti tiendaan gapu iti dumurdur-as nga ekonomia, ken nakaron ti trapiko iti National Highway iti inaldaw nangruna no Lunes ken Huebes a kapigsa ti tienda. Impalgakna pay ti planoda a mangaramid iti tallo a government centers iti ilida iti Daya, Poblasion, ken iti Laud a paset tapno maiwaras ti sentro ti gobierno, ken turongen dagiti tattao.

Impalgakna pay ti pannakagatang ti lima nga ektaria a daga sadiay Brgy. Santo Tomas a maaramid a sanitary land fill para iti waste management a pakaibellengan dagiti umad-adun a basura gapu ti panagdur-as ti ekonomia ti ilida. Impakaammona pay ti pannakapadur-as ti 6 – 7 nga igid ti baybay ti Santo Domingo tapno agbalin a tourist destination. (Eden Alviar)

Comments are closed.