Footer

“We Love You, Sir…” (Umuna a paset)

“MAKAUMAKAYO!” makapungtotak a bigbigat iti 7-Moonstone a pagadbayserak iti dayta a Fourth Grading period. Kasano a diak agpungtot, nakawarwara ti room-mi a nadanonak. Uray iti corridor. Arig nabuntuon dagiti plastik ken papel nga imbirua dagiti tallo a pagbasuraan a para iti nadumaduma a klase ti rugit. Nakaar-ariwawada pay.

Diak nagun-uni itay simrekak. Inwarasko laeng ti panagkitak iti sibubukel a room-mi. Ngem saanda man laeng a nagkir-in. Tumagarida latta a kasla saandak a nakita. Innalak, iti suronko, ti pagakup ken ti sagad nga iit. Dinalusak ti corridor. Ngem imbes a tumulongda, ad-addan ti arimbangawda.

Sintagari a simrekak iti kuartomi apaman a naakupko ti sinagadak. Linikusko ida kadagiti tugawda. Nginilngilangilak dagiti nagadu a nagbasutanda iti tsitsiria iti sirok ti tugawda. Ngem awan latta ti riknada. Kitkitaendak laeng.

Rinugiak ti nagpidut.

Ngem awan ti common sense-da! Ilisida pay nga ipangato dagiti sakada no pidutek ti wara iti sirok ti tugawda. Suronkon!

Ngem tinimbengko ti riknak. Narigaten ti maudatal iti sanguananda a dina oras.

Tallo lawas pay laeng nga adviser-ak ti 7-Moonstone ditoy Cabaybay West National High School wenno CWNHS. Naka-homebase ngaminen ti dati nga adviser-da. Siak ti nangala iti sangapulo nga oras a Science a napanawanna. Dua a seksion dayta iti Grade 7. Kapilitan a siak payen ti timmakder nga adviser (ta ti Supreme Student Government wenno SSG laeng ti pag-co-adviser-ak), nupay awan ti pormal nga imbaga ti kabarbaro a prinsipalmi nga aglima a bulanna pay laeng.

Saanko koma nga alaen ti mapanawan a Science dagiti grade 7 ta diak a major. Ngem awanen ti mabalin a pakaitedanna kadakami a nabati nga awan adviser-anna. Awan met ngarud ti kasukatna a mangala koma kadagiti napanawanna a subject. Kapilitan a naiwaras kadakami.

Math ti major-ko. Ngem masuronak no dadduma. Awan Math nga isurok. TLE ti Grado 9 ken 10 ken Aralin Panlipunan ti Grado 9 (nupay AP 10 ti nakaibaonak a regional mass training idi summer vacation) ketdi dagiti subjects-ko. Sa itay First Semester ti Senior High School, nagisuroak iti Business Ethics ken Applied Economics.

Isu a madmadi ti riknak nga agisuro no dadduma. No kaano pay a naipanko iti MTAP Finals dagiti ubbingko iti Grade 7 a nag-coach-sak itay napan a tawen, isu ketdin ti pannakaikkat ti Math kaniak. No ania pay ti trineyningko nga AP, di met naited nga isurok idi aglukat ti klase.

Ti AP major a kaduami idi ti imbaon ti dati a prinsipalmi a maki-training para iti AP 10. Ngem nagkedked ta adda kano napateg nga asikasuenna kadayta a summer. Isu a siak ti naibaon. Ti makadakes, idi agsubliakon kalpasan ti training, sabali metten nga AP ti subject-ko. AP 9 metten! Ken awanen ti Math-ko! Insarita kano ti AP major a kaduami iti prinsipal nga AP 10 ti isurona ta dina kabisado ti AP 9 Ekonomiks. Adda ngamin computation-na. Kaim-immuanna ti dati a prinsipalmi isu a napatgan ti kiddawna.

Nasakit ti nakemko idi ngem ania ngarud, comply before you complain a kunada. Isu a diak lattan nagtagtagari. Mayat met idi agtanoy ta limmawa ti ammok kadagiti naited a subject-ko.

Iti umuna a lawasko iti Moonstone, inlawlawagko dagiti pagalagadan. Inaramidko ti kasta ta damodak a pagmaestroan. Nangnangngegkon kadagiti kakaduak no kasano ti kinatangken ti uloda. Inal-alak ngarud ida iti nababa a timek idi agpapatangkami.

Ket nasayaat met dagiti impakpakitada. Nakadalusdan no sumrekak a first period-da. Dinaydayawko dayta nga aramidda. Saanda payen nga agwarawara no saanda a kayat ti sumaruno a titserda. Iti kallabes, irantada a di serkan ti dadduma a titserda.

“Itultuloyyo koma ti kasta nga ugaliyo,” kinunkunak kadakuada. “Iti kasta, di masayang ti pagrigrigatan dagiti nagannak kadakayo.”

“Yes, sir!” sangkakunada met.

Nalakada la gayam a kapatpatang, kinunkunak iti isipko. Adda laeng iti pannakilangen kadakuada. Nasubirbiada ken natangsit ti dati nga adbayserda.

Ngem nagbiddutak gayam. Apagbiit ti kinamanakman nga impakitada.

Kinunak nga ag-floorwax-da yantangay naginiten iti dayta a maikadua a lawasko kadakuada. Ken dalusanda ti nakapuspuskolen ti tekkabna a jalousie. Ngem pulos nga inaramidda. Nadadael payen dagiti dua a dust pan-da ta pinagiinnarnis kano dagiti lallaki. Sa idi kuan, rugianda manen ti saan nga aguniporme. Pinaruarko ida iti klasek kas mayannurot iti pagalagadan ti pagadalan.

Ngem nagsao ketdin iti di malamlamut ti aso ti maysa kadakuada, ni Chardex, a nagkubuaran la unay ti darak. Minesmesannak pay a kasla kumarit. Dissuak la koma ngem nalagipko ti Child Protection Policy. Pinaayabak dagiti nagannakna. Tallo nga aldaw sakbay nga immay ni nanangna. Ngem kabayatan nga awan ti naayabanna a nagannak, diak inawat iti klasek.

Desididoak idi a mangirekomenda iti prinsipalmi a mapapanawen iti pagadalan ta adu payen dagiti nagkakauna a kaso ni Chardex. Panagsigarilio, panagkarit kadagiti kaadalanna ken saan a panaguniporme. Naka-tattoo pay idi bastosennak.

Ngem kasta unay ti pakpakaasi ni Manang Lina a nanang ni Chardex. Ikkak kano koma pay iti maysa a gundaway ti anakna. Nalunag ti riknak aglalo idi agkiddaw iti pammakawan ni Chardex. Pinagaramidko iti promissory note a no ulitenna pay ti agaramid iti maikaniwas, maipataw ti rumbeng a pannusa kenkuana. Pinirmaanda nga agina.

(ADDA TULOYNA)