Footer

Nasurok a 9,000 dagiti DOST scholars ita a 2018 – Sec. de la Peña

NASUROKEN a 9,000 nga estudiante iti kolehio dagiti nakagun-od ti scholarship grants manipud iti Department of Science and Technology ita nga School Year 2018 – 2019, ken dakkel a tulong dayta kadagiti napanglaw a mangpadur-as ti panagbiagda.

Dayta ti impakaammo ni DOST Secretary Fortunato de la Peña kadagiti kameng ti media kabayatan ti naangay a press conference sadiay Philippine Science High School, Ilocos Region Campus, San Ildefonso, Ilocos Sur, kabayatan ti panagpaayna kas guest speaker iti graduation exercises ti pagadalan idi bigat ti Mayo 30, 2018.

Impakaammo ni Sec. de la Peña nga iti kadagupan dagiti 79 a nagturpos iti PSHS IR campus ita a tawen ket 68 kadakuada ti nakagun-od ti scholarship grants kadagiti nagduduma a kolehio ken unibersidad ti estado iti Pilipinas. Impalgakna nga iti intero a Pilipinas ket nasurok a 9,000 dagiti nakagun-od ti DOST scholarship grants, ken dakkel ti ngimmatuanna iti sigud a 5,000 nga scholars idi 2015. Inlawlawagna nga awan dagiti baro nga schoolars idi 2016 ken 2017 gapu ta awan dagiti nagturpos iti high school gapu iti implementasion ti K+12 program.

“Many scholars of DOST are children of poor families and it will be a big help to them to alleviate their hardships and improve their conditions once they finished their degrees and have good jobs,” kinuna ni Sec. de la Pena.

Impakaammo ti DOST Secretary nga umad-adun dagiti scholars babaen ti promosion ken tulong ti media, ken dumanonen iti 97% kadagiti amin nga ili ken siudad iti Pilipinas ti nakadanonan ti pakaammo maipapan ti DOST scholarship grants a mangipaay ti libre a financial assistance kadagiti napanglaw nga estudiante nga agtarigagay nga agadal kadagiti kurso mainaig iti siensia ken teknolohia. Inlawlawagna a ti DOST ket saanna nga obligaren dagiti scholars nga agserbi iti gobierno no makaturposda iti kursoda, ngem nasken nga agserbida iti uneg ti Pilipinas iti kaadu ti tawen a kapaut ti kursoda.

Pinatalgedan pay ni Sec. de la Peña a dakkel ti masubbot ti gobierno iti panangmantiner ti DOST kadagiti PSHS campuses iti Pilipinas ta adun kadagiti nagturpos dagiti agdama a mangidadaulo ken mangmanmanehar kadagiti institusion mainaig iti siensia ken teknolohia iti Pilipinas. Impakammona a dua kadagiti immuna a nagturpos iti PSHS Ilocos Region Campus dagiti nagturpos iti medisina nga agserserbi iti Doctors to the Barrio Program ti Department of Health a dakkel a katulongan iti pannakasaluad ti salun-at dagiti umili.

Pinasingkedan pay ti DOST Secretary ti pannakasolbar ti problema iti pannakaiwaras ti inpormasion maipapan ti kasasaad ti panawen no tiempo dagiti bagyo ken didigra gapu iti problema ti estasion sadiay Tapao, Sinait, Ilocos Sur ti Philippine Atmospheric, Geophysical and Astronomical Administration a saan a madanon ti komunikasion ti media no dakes ti kasasaad ti panawen. Impalgakna a dakkel a pondo ti maipapaay iti PAGASA iti pannakagatang dagiti moderno nga alikamen ken pasilidadda ket awanen iti rason tapno saanda a maaramid dagiti rebbengen ken trabahodada.

Impakaammo met ni DOST Region I Director Armando Ganal nga agtultuloy ti panangbayabayda kadagiti micro, small and medium enterprises a mangpadur-as kadagiti produktoda babaen ti technical assistance tapno makasalisalda iti nainget a balubal iti merkado. Inlawlawagna a mangipapaay ti DOST ti suporta kadagiti babassit a negosiante tapno mapalag-an ti epekto ti Tax Reform for Acceleration and Inclusion Law a nangpangato ti presio kadagiti kangrunaan a produkto ken serbisio a mangapektar iti komersio.

Inyawis met ni PSHS System Executive Director Lilia Habacon, kadagiti nagannak ken dagiti annakda nga agad-adal iti Grade 6 ti panageksamenda iti entrance examination iti PSHS tapno agbalinda a full scholar nga agadal iti prominente nga eskuela a mangipangpangruna iti siensia ken teknolohia.

Nakikaysa pay iti presscon da PSHS IR Campus Director Ronnalee Orteza, Ilocos Sur Provincial Director Ramon Sumabat, ken DOST official Danilo Lachica.

Dagiti 79 a nagturpos iti PSHS IR Campus ket naggapu kadagiti nagduduma a probinsia iti Ilocos Region, ken dadduma pay a probinsia ken siudad iti Manila. Siraragsakda nga immawat kadagiti sertipiko ti panagturposda kadagiti nangato nga opisial ti DOST ken PSHS. (Eden Alviar)

No comments yet.

Leave a Reply

This site uses Akismet to reduce spam. Learn how your comment data is processed.