Footer

SINURSURAN: Makikadua, Saan nga Agbalin a Managimbubukod (Maudi a paset)

Babaen ti text, naammuan da Ana Marie nga agparikut dagiti tallo a barangay. Kurang ti luganda. Kotse laeng met ti sakay dagiti dua a polis a nagbantay kadakuada. Sa iti Ganavan, naibayagda ta addada simngay a parikut. Nagkalassawan dagiti nagserbi a mannursuro ta agdadamo dagiti dadduma.

Inkeddeng dagiti polis a dida agbiahe agingga a saanda a makairemedio iti lugan. Agtengnga ti rabii idin.

Yanna nga adat, awan, awan, ti mairemediomi ditoy, kuna dagiti adda iti tallo a barangay. Nagdisnudo ni Ana Marie a nagsapul iti lugan. Inturturedna ti nangriing kadagiti pagtaengan nga ammona nga adda pribado a luganda. Mabain la koma a mangsinga iti turog ngem pinapuskolna lattan ti rupana. Ngem kadayta mabigatanda pay sakbay nga agbiaheda. Numona ket mariknadan ti bannogda.

Nakasapul ni Ana Marie iti dua a lugan– pribado ken pampasahero a van.

Naragsakan ta immannugot dagiti siningana nga itulod dagitoy dagiti kaduada.

Agtartarayen ti convoy-da idi malagip ni Ana Marie ti pagbayadda kadagiti dua a lugan. Nakisinnukat iti text ken tawag kadagiti adda iti sabsabali a lugan. Suhestion nga equal sharing lattan uray ta kasda la maymays a pamilia.

Immanamong ti grupo da Ana Marie nupay saan nga isuda ti agparikut iti lugan. Iti kasta, makabiahedan. Ken iti nagan ti panagkakadua!

Gapu ta am-ammo ni Ana Marie dagiti drayber, nayat payen dagitoy iti P2, 500 ti roundtrip. Bale lima ribu pisos ngarud ti pagbibingayanda. Bassit a banag maikompara iti awatenda nga honorarium iti panagserbida iti eleksion— ta adda pay maysa ribu a travel allowance-da.

Saan ida a dagus a naasikaso ti COMELEC chairman apaman a nakagtengda iti munisipio. Nairidep daytoy iti bannogna ken panagur-urayna kadagiti agsangpet a ballot box.

Nalawagen idi narebisar dagiti dokumento ti grupo da Ana Marie. Kasta met dagiti tallo pay a barangay a kaduada.

Pangur-urayanda iti pannakaileppasda amin, rinugian ni Ana Marie ti nagsingir iti mabatayan a plete ti tunggal maysa. Inunana ti grupoda iti Labula Norte.

Idi makadanon iti grupo dagiti taga-Ganavan, ditan a rimsua ti saosao. Saan kano a makibingay ni Sir Aries ta iti kano met lugan dagiti polis ti simmakayanna. Ken apay kano a roundtrip ti mabayadan kadagiti lugan? One way la koma kano ta naaldawanda metten ket makaammo koma lattan ti tunggal maysa nga agala ti luganna nga agawid (ta nalaklakan nga amang no agbangkada nga agsubli).

Iti bannog ken puyat ni Ana Marie, sa kasta pay laeng ti nangngegna, saannan a naterred ti riknana. Impanalpaakna a ti la ngaruden grupo da Sir Aries ti naisapulan iti lugan ta nagparikutda, ken isuda payen ti nayur-uray isu a naladawdan a nakapagrubuat, isuda pay laeng ti adda ganasna nga agsaosao.

Ken maysa pay, nakibingay payen da Ana Marie iti arkila dagiti dua a lugan uray saan koman a rumbeng ta adda la ngaruden luganda. Iti isyu ti pannakalawagda, asino ngarud ti mangipagarup a mabigatanda ta iti panagur-uray kadakuada ti chairman, nairidepnan. Alangan a riingenda?

Dita a napaneknekan ni Ana Marie nga uray iti departamento nga ayanda, adu latta met ti di makaaw-awat. Dagitay managimbubukod, saanna nga ammo ti rebbengenna. A kasla awan ti naimbag a nakem a naaramidan kenkuana. Nga isuda la ngaruden ti natulongan iti nagan ti panagkakadua, isuda pay ti adu ti makunana.

DAYTA a kapadasan ni Ana Marie, nalawag ti yan ti parikut.

Ta adda latta ngamin, uray mannursuro, dagiti natangig, saan a mangipirpirit, managimbubukod ken dina ammo a taliawen dagiti kaduana.

Kasano koma ita a pagsarmingan ida dagiti ubbing iti babaenda?

Makikadua, saan koma nga agbalin a managimbubukod. Ta iti masanguanan, baka awanton ti mayat a tumulong kenka iti pakaipitam a situasion.

Nasamsam-it nga adayo ti agbiag no ammotayo ti makikadua! #

No comments yet.

Leave a Reply

This site uses Akismet to reduce spam. Learn how your comment data is processed.