Footer

SSS service office maipasdek iti Tagudin, Ilocos Sur

TAGUDIN, Ilocos Sur – Mangilukat iti maysa a service office ti Social Security System (SSS)-Candon City Branch iti ili ti Tagudin tapno mayasideg dagiti programa ken serbisio kadagiti miembrona.

Kinuna ni Catalina Basbas, branch head ti SSS-Candon City, a nangited ti lokal a gobyerno ti Tagudin iti libre a lugar a pangipuestuan ti SSS iti maysa a service office a mangsungbat iti kasapulan dagiti miembrona iti maikadua a distrito ti probinsya.

Kuna pay ni Basbas a maysa a “booming area” ti Tagudin isu a rumbeng laeng a ditoy ti pakaipasdekan ti maysa a service office a mangidanon iti serbisio kadagiti miembrona a kas met la kadagiti dadduma a sangay ti SSS.

Mabalin a maluktanto ti service office iti abay ti NBI satellite office iti Yellow Market iti Barangay Del Pilar.

“Namnamaenmi a mangruginto nga agserbi kadagiti miembro ti service office ti SSS iti maikadua a distrito ti Ilocos Sur inton third quarter daytoy a tawen,” kinuna ni Basbas.

Innayonna pay a nakalukatto ti service office manipud Lunes aginggana Biyernes, alas otso ti bigat aginggana alas singko ti malem babaen iti panangimaton ti SSS-Candon City.

Manipud idi aginggana ita, kasilpo ti SSS ti maysa a mandato: ti mangted iti seguridad iti masakbayan kadagiti miyembro babaen iti pension, loans ken insurance ken dadduma pay a benepisyo. (TNM/April M. Bravo/PIA-1, Ilocos Sur)