Footer

“We Love You, Sir…” (Maikadua a paset)

Iti maysa a Martes, impakopiak kadakuada ti activity-da. Nupay agtaposen ti school year, di pay simmangpet dagiti libroda nga ited ti DepEd. Apaman a nalpasda, inggunamgunamko iti tunggal grupo ti panangalada kadagiti masapsapul yantangay simple laeng met dagitoy kas koma iti thermometer, diubos, bassit ken dakkel a baso ken napudot a danum. Alaenda iti kabigatanna.

Yes, sir!” kasla kasiguraduan a kinunada.

Topiko pay laeng iti Maikatlo a Grading Period ti activity-da ta awan sa ti inub-ubra ti dati a titserda. Adda pay maysa a module a dina nalpas iti Maikadua a Grading Period. Isu nga imbes a rugiak dagiti topiko iti Maikapat a Grading Period, rinugiak iti sumaruno a topiko a nagleppasan ti dati a maestrada.

Ngem iti kabigatanna nga activity-mi koma, awan man la ti innalada malaksid iti maysa a thermometer. Saanko a nalapdan ti riknak. Agsasarutsot a sermon ti nalak-amda a bigbigat. Ti makadakes, uray addaak iti sanguananda, agpipinnabasolda ketdin no apay a di nagala dagiti napusgan. Idi kuan, awanen ti arindenggan. Agsisinnungbatdan. Kasla awanak iti sanguananda.

Diak napuotan a pinanabtuog ti lamisaan. Nagtalnada bassit.

Kasano a nagngangato ti gradoyo iti Science no kasta gayam ti ugaliyo?” sinaludsodko. Nakitakon dagiti gradoda iti umuna a tallo a grading period. Uray dagiti managlangan ken manag-cutting classes, 80 plus pay laeng ti gradoda.

Awan met inub-ubrana ni ma’am-mi idi, sir!” pagammuan ta insungbat ni Mario, maysa met kadagiti “pasaway” iti klase. Nalaing pay nga agsiggawat iti merienda dagiti kaklasena.

Awan wenno manag-cutting classes-ka laeng?” intukodko.

Agpayso met, sir,” indayamudomna.

Agpayso kadi, class?” inamadko.

Nagkikinnitada laeng. Ngem nasiputak ti limed a panagtitinnung-ed dagiti adda iti honor roll. Adda la ket ngarud nagay-ayam iti panunotko. Ngem saan a naalay-ayan ti pungtotko kadakuada.

Now,” kinunak. “just answer the questions in your activity!” Immangesak iti nauneg. “Kitaentay’ man ita no pagbanagan ti gradoyo. Those students in the honor rolls, this is a warning to you! Please don’t blame me in the future if you will not be qualified anymore in the ranking.” Sa namrayak ti nagtakder iti ridaw a nanglang-aban iti presko nga angin nga agtaud iti baybay iti amianan ti eskuelami.

Agkalmaka bagi, insennaayko.

Ngem rinugianda manen ti nagpapatang. Kasla awan ti sinaok kadakuada. Dagiti laeng adda iti honor roll ti nangdumog kadagiti obrada.

Saanakon a nagun-uni. Baka diak magawidan ti riknak ket makapagsaoak iti di malamlamut ti aso. Dayta ti likliklikak la unay ta baka no ania pay ti panunotenda.

Agkikinnatil dagiti lallaki iti makanawan a dumna iti tawa. Nupay nakakitaak kadakuada, kasla awan laeng. Namrayak ti immanges manen iti nauneg tapno maleplepan ti panagkubuar ti riknak. Pinagakar-akarko lattan ti imatangko iti uneg ti kuarto.

Ngem iti apagkirem, nagsinnultaken da Lando ken Dancel— dagiti aw-awaganda iti bulilit iti klase. Imbes nga anawaen dagiti bullakay, dinuroganda ketdin dagitoy.

Tinarayko a pinagsina dagiti dua a nagludonen iti nagbaetan dagiti tugaw. “Agtalnakayo! Awan ti babainyo!” imbugkawko. Awanen ‘tay lepleplepak a riknak.

Ngem aginningarda latta.

Apay nga agapakayo?” inamadko. Nagtakderak iti nagbaetanda.

Mapanna ay-ayamen a pitikpitiken dagiti lapayagko, sir,” makaluluasit ni Dancel a nagpulong.

Agpayso kadi, ha, Lando?”

Nagmadi met ti ikikitana kaniak, sir,” immisugsog ni Lando. “Kasla kumarkarit!”

Saan, sir!” insalingbat a dagus ni Dancel. “Dumdumogak itay ti activity idi kinalbitna dagiti lapayagko. Idi kuan, pitikpitikennan, sir…”

“’Lapa!” inyingar ni Lando ket dinanogna manen ni Dancel. Naimbag ta nasiputak ket naallawatko ti gemgemna.

Saanka nga agtalna, Lando?” minulagatak nga inipig.

Agsalsalawasaw met ngamin ni Dancel, sir…” nakarit latta ti timekna. Diak nasiputan nga inkugtarna ti makanawan a sakana ket napagam-udanna ti tumeng ni Dancel.

Saanak manen a nakapagteppel. Limed a tiniritirko bassit ti inallawatko a gemgemna itay. Napaanikki. “Ania, dika pay la agtalna?” immesmesko kenkuana. “Nabastoska unayen, a! Addaak la ngaruden ditoy ngem kastaka pay laeng!” Sa kampay idi, diak inranta a nabaddekan ti sakana.

Ngem kinusilapannak ketdi ni Lando. Siakon ti kasla karitenna.

Ania, adda reklamom?” imbugkawko. “Ayabam dagiti nagannakmo ‘ton bigat ta agpapatangtayo. Masapul a maammuanda ti kinabastosmo!”

Nagtalna ni Lando idinto nga agsasaibbek ni Dancel iti tugawna.

Nagpasangoak. Sermonen ti napan iti nabatbati nga orasko kadakuada.

Ib-ibusenyo a talaga ti pasensiak! Makaammokayon iti Foundation! Saandak a mauray a tumulong, mangigiya kadakayo iti ipabuyayo. No awan ti maipresentayo a mass demo, gradoyo iti MAPEH ti maapektaran!”

Awan man laeng ti namalbaliwan ti reaksionda. Diak man la maanninawan ti panaglidayda koma. Kaykayatdan sa pay ti nasaok.

Imbatinakayo ti adviser-yo a saan man laeng a naurnos dagiti dokumentoyo idinto a lineppasna ti Third Grading ditoy. Ubraek amin manipud iti First Grading a record-yo. Mangrugiak iti zero ta awan ti soft copy nga imbatina. Nalabit, gapu ta agpapan kadagitoy, awan pay ti narugianna! Sa ita, kasta ti kinalokoyo? Dikayo koma agyaman ta adda nayat nga adviser-yo! Sabagay, mabalin a kunaek a saan a siak ti adviser-yo. Awan ti imbagbaga ni prinsipal. Kinapudnona, awan idi maaramid ti baro nga schedule!” Immangesak manen iti nauneg. “Mabalin la unay idi a diak awaten ti subject-yo ta saanko a major. Ken kanayon lattan a kasta a diak a major ti isurok!” Nakadumogdan idi ipalawlawko ti panagkitak. “Ngem gapu ta maasianak kadakayo, saanak a nagrekreklamo idi ikalbit dagiti kaduak a siak ti mangiggem kadakayo. Ngem yanna ti riknayo? Naglawag ti patangantayo idi damok kadakayo! Ngem ipapaawengyo met! Inaldaw laengen a pagsakitankayo iti ulo!”

Nalpas ti oras a dida nakatimek. “Zero kayong lahat sa activity,” kinunak sakbay a rimmuarak iti siledmi.

Arig addaak pay laeng iti wangawangan ti ridaw idi agpapaggaak dagiti lallaki.

Yahoooooo!!! Zero! Zero! Zero lahat!!!” sada pay la kinuna.

Ngem tapno saanen nga ad-adda a madadael ti aldawko, nagturongakon iti maikadua a klasek.

(ADDA TULOYNA)

Comments are closed.