Footer

Barangay Tanod, bimmagsol

STA CRUZ, Ilocos Sur – Maysa a pammagsol idiay Brgy Turod, Sta. Cruz, Ilocos Sur ti intawag ni Punong Barangay Marcelo C Jacosalem iti PNP idi agarup 11:00 ti rabii, Hunyo 3 daytoy a tawen.
Nainaganan ti biktima a ni Edison Apolonio y Javillonar, 27, naasawaan, self-employed ken residente iti Brgy Turod. Nainaganan ti suspek a ni Dominador Pacleb, nataengan, Barangay Tanod ken residente met laeng iti nasao a lugar.
Segun iti report, nagsinnungbat ti suspek ken ti kayong ti biktima sakbay iti pammagsol. Adda iggem a buneng ni Pacleb bayat iti panagsinnungbatda iti kayong ni Apolonio isu nga imbagana ken Pacleb nga ibabana ti bunengna. Imbaba met ti suspek ti buneng ngem sinaruno daytoy ti panaggabo dagiti dua (suspek ken biktima). Adda gayam nakadulim a patadem ti suspek ket inaramatna daytoy a pinangbagsol iti biktima iti naminlima a daras.
Naitaray ti biktima iti Candon City Hospital. Naglibas met ti suspek ket saan pay a nasarakan. (Tawid News Team)

Comments are closed.