Footer

Maarmasan dagiti barangay opisial?

Nagani iti nagduduma a reaksion ken kapanunotan ti pampanunoten ni Presidente Rodrigo R. Duterte nga armasan dagiti barangay opisial. Daytoy ket nasaona iti sanguanan dagiti kabarbaro a nabotosan a barangay opisial. Ta makitkitana a rason ket dakkel ti maitulong dagitoy a barangay opisial kontra iti druga ken kriminalidad. Nupay kasta, iti bukodna nga assessment ken evaluation, kunana a pagsaludsodanna pay ti kapanunotan ti PNP ken intelligence community maipapan itoy a banag, no umno ken maiparbeng la unay.

Nupay kasta, nagani latta iti nagdaduma a kapanunotan a saan a maiparbeng ti pampanunoten ti presidente. Ti panangmentenar ti urnos ken kappia iti masakupan ket ad-adda a nasamsamay babaen iti pannakibulig dagiti barangay opisial kadagiti kabarangay, maala dayta babaen iti naannayas a relasion ken pinnulapol nga awan iti naidumduma wenno pabpaboran.

Ken ni BisePresidente Leni Robredo, saan a pabor daytoy. Kas iti rasonna, ti mandato dagiti opisial iti barangay ket mangakem ti ehekutibo nga akem. No maipapan iti urnos ken kappia addan dagiti napusgan a mangakem kadagitoy, a kas ti PNP ken dadduma pay nga institusion, addaanda iti akem iti respektibo a masakupanda. Ti panangmentenar ti urnos ken kappia ket adu a wagas tapno magun-od uray no saan a maarmasan ti barangay chairman ken dagiti kagawad.

Ayunanmi daytoy a kapanunotan a saan a panagarmas. Nupay akem met dagitoy a barangay opisial iti tumulong kadagiti agrebbeng tapno ti linak ken kappia ket maragpat a naannayas. Adu a wagas ken pamuspusan segun iti tumutop ken maiparbeng. Ti makitami a maysa kadagiti kasamayan ket ti nairut a relasion dagiti bumarangay ken dagiti opisial. Ta kas iti napaliiw, kadagiti addaan iti nasged a kooperasion isuda dagiti barangay a dimmur-as, naurnos, nadalus ken awan iti parikut iti linak ken kappia. Ket no adda iti kaso a maipapan iti seguridad ken saanen a kabaelan a solbaren ti konseho ti barangay nga asunto, iteden iti PNP tapno isudan iti umno a mangaksion iti maiparbeng a solusion. Dayta met ti umno ken nabayagen a maar-aramid.

Saanmi nga ayunan a maarmasanda ta amangan no mangibunga pay daytoy iti narikrikut a situasion. Iti barangay a nariribuk, ken kadagiti adu a nagbibinnallubal iti napalabas nga eleksion, no armasan dagiti nangabak natural nga umiggem ti armas dagiti naabak, ket no agsasabatda iti eskinita wenno bit-ang amangan no dakdakes ti mapasamak. Ti armas, nabara unay ket pagbalinenna a natured ken malalaki ti nakaiggem. Maabuson no kua ti bileg kas barangay opisial.

Imbes nga isuda iti agbalin a taklin ken taga-urnos ti linak ken kappia, no maarmasan ida, isuda ketdi iti agbalin a dadaulo iti riribuk. Itoy a punto, saanen nga umayon iti nakasaad iti Local Government Code ken ti barangay justice system.

Ngarud, nasaysayaat siguro no dida maarmasan, ta ngamin ti agdadata a kinapudno, kurang wenno dida ammo iti umno a panagiggem ken panagaramatan iti paltog ta saan pay met a naisuro kadakuada. Daytoy ti makitami a bangen a nasken nga ikonsidera. (TNM/mfbandonil)

Comments are closed.