Footer

Pannakaisubli ti patangan ti kappia iti nagbaetan ti gobierno ken rebelde a komunista

AGBALLIGI koman ti saritaan ti kappia iti nagbaetan ti Government of the Republic of the Philippines (GRP) ken Communist Party of the Philippines – National Democratic Front (CPP NDF) tapno maisardengen dagiti panagraranget iti nagbaetan dagiti tropa ti gobierno ken New People’s Army (NPA) ket magun-oden ti mataginayon a kappia iti Pilipinas.

Dayta ti tartarigagayan dagiti adu a Pilipino kalpasan nga immandar ni Presidente Rodrigo Duterte ken ni Presidential Adviser on the Peace Process Jesus Dureza nga iti maudi a gundaway ket angayenda manen ti peace talk iti nagbaetan ti gobierno ken dagiti rebelde a komunista. Kinanselar ni Duterte ti immunan a peace talk iti administrasionna idi Nobiembre 23, 2017 gapu iti rurodna kadagiti rebelde a komunista iti agtultuloy a panagatakeda kadagiti tropa ti gobierno ken panangambusda kadagiti kameng ti Presidential Security Group sadiay Arakan, Cotabato nga advance party iti ibibisita ti Presidente sadiay Cagayan de Oro, ken panagkolektada ti revolutionary taxes kadagiti pribado a negosio ken tattao.

Manipud idi naisardeng ti peace talk ket rimsua manen dagiti nadara a ranget iti baet dagiti tropa ti gobierno ken dagiti rebelde a komunista. Naitultuloy met ti panagatake ken panagkidnap dagiti kameng ti NPA kadagiti polis ken militar.

Gapu iti agtultuloy a ranget iti baet ti gobierno ken dagiti komunista a mainayon a nadagsen a problema ti administrasion kadagiti agrurutap a pakaseknan ti seguridad dagiti umili, naallukoy ti Presidente a makisaritada manen kadagiti rebelde a komunista tapno magun-oden ti kappia.

Immunan a nakaiskediul a mairugi ti peace talk iti nagbaetan ti GRP ken CPP NDF sadiay Oslo, Norway ita a Hunio 28, 2018, ngem pinaisanud pay laeng ti Presidente ti patangan ti kappia. Impatangkenna nga iti Pilipinas ti pakaangayan ti peace talk ta agpapada a Pilipino dagiti maseknan ket saanen a kasapulan dagiti foreign facilitators, ken agsasaritada sadiay ballasiw-taaw. Impasingked ni Duterte ti seguridad ken saan a pannakaaresto dagiti pannakabagi ti CPP NDF kabayatan ti peace talk.

Impasingkeden ti Malacañang a mabalin dagiti negotiating panelists ti CPP NDF ti mangpili iti lugar a pagnaedanda ken gastosan ida ti gobierno. Ad-adda a makasalimetmet iti gastos ti gobierno iti pannakaangay iti Pilipinas ti peace talk ngem sadiay ballasiw-taaw ta akuenda ti gastos dagiti pannakabagi dagiti dua a partido, ken dagiti kameng ti third party facilititators a ganggannaet. Saan metten a masapul dagiti foreign facilitators iti Pilipinas ta adda panel a natudingan a mangbayabay ti proseso ti patangan ti kappia. Iti las-ud ti 16 a tawen ti Norwegian Government ti nagserbi a facilitator kadagiti napasamak a peace talk iti nagbaetan ti GRP – CPP NDF Panel ta idi Pebrero 2004, ket napagtulaganda nga agakem ti third-party facilitator iti peace talk.

Ti Royal Norwegian Government ket nagserbin a formal facilitator iti nagbaetan ti Colombian government ken ti Revolutionary Armed Forces of Colombia, ken mangbaybayabay pay kadagiti 20 a pagilian ken rehion nga addaak iti riribuk.

Agkitakit ni CPP Founding Chairman ken Chief Political Consultant Jose Maria Sison, a maangay iti Pilipinas iti patangan ti kappia gapu iti seguridad ken masakbayanda no agkibaltang ti peace talk. Kayatna a maangay ti peace talk iti neutral a lugar iti ganggannaet a pagilian.

Agamak ni Sison a dagiti pannakabagi ti CPP NDF no maangay ti peace talk iti Pilipinas ket mabalin a sumangoda iti pangta ken kinaranggas kadagiti saan a mangayat iti kappia ken mangsabotahe iti peace talk, ken mabalin nga agdalanda iti military and police surveillance.

Dayta ket ipakitana ti kinaawan pay laeng iti talek ni Sison ken ni Duterte a sigud nga estudiantena iti kolehio. Impalgakna a talkenda laeng ti administrasion ni Duterte no ti Comprehensive Agreement on Social and Economic Reforms a mangbenepisio kadagiti mannalon, mangmangged, katutubo, babbai ken agtutubo ket pirmaan dagiti agsumbangir a partido.

Narikut ti dalan nga agturong iti kappia. Adun dagiti tubeng sakbay ti pannakayusuat ti peace talk, ket ti kangrunaan a lapped ket ti kinangato ti amor propio ken kinakurang ti panagtalek dagiti mangidaulo kadagiti dua a partido. Dagita ti gapu a napaay dagiti peace talk kadagiti immun-unan nga administrasion.

Aglima a dekadan ti riribuk iti nagbaetan ti gobierno ken dagiti rebelde a komunista, rinibun a biag dagiti naibuis, ken adun a panawen, pondo ken nakapatpateg a sanikua dagiti nadadael gapu kadagiti awan-mamaayna a ranget iti nagbaetan dagiti agpapada a Pilipino.

Adu unayen dagiti nadagsen a problema ti gobierno ken dagiti Pilipino – kinarigat ti biag, adu a krimen, illegal a droga, pangta ti terorismo, panagrebelde dagiti separatista a Muslim, ken ti panangsakup dagiti Chinese iti teritorio ti pagilian iti West Philippine Sea. Panawenen a maisardeng ti gubat iti nagbaetan ti gobierno ken dagiti rebelde a komunista tapno agari ti mataginayon a kappia. #

Comments are closed.