Footer

Saan a pannakaipada dagiti tourist spots iti Ilocos iti Boracay island, karit kadagiti opisial ken negosiante

VIGAN CITY – SAAN a pannakaipada ti Vigan City ken dadduma pay a nalatak a tourist destinations iti Ilocos Region iti isla a Boracay a napaserraan iti innem a bulan gapu iti napalalo ti pannakaabusar ken pannakarugitna tapno masaluadan ti kinangayed dagiti lugar nga ar-araken dagiti adu a turista iti Kailokuan.

Dayta ti nagkaykaysa a kapanunotan ti organizer ken dagiti agdama a mutia ti Miss Tourism Philippines beauty pageant kabayatan ti pannakiuman kadakuada dagiti kameng ti Ilocos Sur Integrated Press iti naangay a Kapihan iti Amianan Media Forum.

Bimmisita dagiti mutia ti Miss Tourism Philippines iti Ilocos Sur para ti promosion ti turismo ti probinisia ken ti pageant. Kinadua ida ni Ms. Amy Sunio Abarquez, pageant organizer – coordinator a nagpasiar kadagiti nalatak a tourist destinations iti Ilocos Sur pakairamanan ti Calle Crisologo iti Vigan City.

Inlawlawag da Ms. Abarquez ken dagiti mutia ti Miss Tourism Philippines a naidumduma dagiti tourism destinations iti Ilocos Sur ta saan laeng nga agpatingga kadagiti napintas a beaches ken resorts, ngem kangrunaanna dagiti kadaanan ken napnuan-pakasaritaan a pasdek, balay ken lugar a mangiyanninaw ti nabaknang a kultura ken namaris a pakasaritaan ti probinsia.

Impaganetget ni Ms. Abarquez a maysa a negosiante ken resort owner, a ti Vigan City kas nabigbig a World Heritage Site ti United Nations Educational, Scientific and Cultural Organization, ken maysa kadagiti New Seven Wonder Cities of the World, ket addaan kadagiti kadaanan ken nasaluadan a lugar a mangipalagip iti naglabas. Sinalaysayda ti paliiwda a kaadu dagiti tattao nga inaldaw a bumisita iti siudad a makaapektar iti aglawlaw. Impaganetgetda a dakkel ti dakes nga epektona daytoy iti environment nangruna dagiti umad-adu a basura ken rugit dagiti tattao.

Nailawlawag nga iti pannakabigbig ti Vigan City kas maysa kadagiti New Seven Wonder Cities of the World ket kellaat a timmayok ti bilang dagiti turismo nga inaldaw nga agpaspasiar iti siudad, ken nangpaadu kadagiti commercial establishments nangruna kadagiti hotel, inns ken transient houses.

Naipalagip a ti napasamak sadiay isla ti Boracay ket mabalin a mapasamak kadagiti nalatak a tourist destinations iti Ilocos Sur, isu a kasapulan a dagiti opisial ti gobierno ket mangipakatda ti nainget a paglintegan tapno masaluadan dagitoy a tourist spots iti pannakaabusar. Kiniddawda met kadagiti negosiante a saanda koma a mabulsek iti aglaplapusanan a ganansia ket isakripisioda ti pannakaaabusar dagiti tourist destinations.

Kinaritda met dagiti pribado a tattao ken agindeg iti Ilocos Region ti pannakikaysada iti pannakaintandudo ti turismo ken saan a pannakaabusar dagiti lugar nga ar-araken dagiti turista tapno mataginayon ti kinapintas dagiti lugar nga ar-araken dagiti turista ken agtultuloy met ti pannakairanud ti gobierno ken dagiti agindeg iti bunga ti naprogreso a turismo. (Eden Alviar)

Comments are closed.