Footer

“We Love You, Sir…” (Maudi a paset)

ADDA serrekmi kadayta a Sabado kas kuna ti prinsipalmi. Impostena dayta iti chatroom-mi idi agsapa ti Biernes a kaawanna pay laeng. Palpasenmi kano dagiti props ken praktisen a naimbag dagiti ubbing para iti mass demo-da. Kababain kano kadagiti nagannak nga umay agbuya.

Ngem imbagak iti seksionko a dida sumsumrek. Mapanak ngamin agpadoktor. Agpayso dayta. Tallo aldawen a kasla trangtrangkasoennak. Agseggaseggar ti bukotko.

Mabalinda latta met ti agtutulag a mapan tapno leppasenda ti agpraktis ken mangplano iti props-da. Ngem narigat a mapanda nga awanak. Basolko la ketdi no adda mapasamakda. Isu a nasaysayaaten a dida sumrek. Ken maysa, iti suli ti panunotko, saan latta a maunas ti kinatangken ti uloda.

LUNES. Naammuak a saankamin nga agklase. Ipamaysami kano lattan ti agpraktis ken mangileppas kadagiti props. Inton Mierkules ngaminen ti Founding Anniversary ti pagadalanmi.

Diak pay napudotan ti tugawko iti office idi asitgannak ni Ma’am Beth. “Ibagak man, Sir P, ti inubra dagiti ubbingmo idi Biernes,” kinunana. “Saankon a naidanon idi ta nakalikudkan. Kalkalpas idi ti last period-ko kadakuada.”

“Ania daydiay, ma’am?” inamadko.

“Nagrarambol ti grupo dagiti lallaki a taga-Dilao ken Durte. Nagrigatda a naanawa. Pinaayabak dagiti nagannakda. No adda umay ita, sikanto laengen ti makisarita kadakuada. Saan a sumrek ita ni sir,” ti prinsipal ti kayatna a sawen. “Mapanak met maki-LSB meeting.”

Napasanamtekak. Bigbigat, rekord manen dagiti ubbingko ti naipasabat. Awan latta ti pamalbaliwanda.

Isagsaganak pay laeng ti bagik a rummuar iti office-mi idi kellaat nga immadu ti ubbing iti tawa a dumnaan ti lamisaanko. Dagiti ubbingko! Ngem nganngani babbaida amin. Awan dagiti sulpeng a lallaki!

“Apay?” naingatok a dagus ti timekko ta nalagipko ti impulong ni Ma’am Beth.

Ngem awan ti nagsao a dagus kadakuada. Agpipinnatudonda.

“Tulongannakamin, a, sir,” ni Angie a presidenteda ti nagsao. “Saanmi a kaya a dakdakami laeng nga agpraktis ken agsagana. Nagtutuleng pay dagiti lallaki. Saanda nga ikaskaso ti agpraktis.”

“Please, sir,” insaruno dagiti dadduma.

“Di met nalaingkayo? Isu a saandakon a kasapulan,” impatangkenko. “Saandakto met laeng a dengdenggen.”

Nagal-aludoyda a pimmanaw.

“Alla, Sir P,” timek ni Ma’am Linda, “inka metten, a, kitaen dagiti annakmo,” kinunana. “Kaasida met.”

Saanko a sinungbatan. Sika ti mapanen, ma’am, no kayatmo, kunak la koma! Ngem linapdak ti bagik. Nalpas a nasaok a makaammodan iti Foundation. Saan a siak ti pasukuenda!

Kabigatanna, awan latta ti prinsipalmi. Kanigid-kanawan ti panagpapraktis dagiti padak nga adbayser. Ken panangileppas kadagiti props-da. Nagaramidak ketdi iti Form 6 ta planok ti aglangan iti dua nga aldaw. Ibatik ken ni Sir Dexter inton malem. Ipasana iti opisina ti prinsipalmi no saanak a makastrek ‘ton bigat. Pagpampanunotak pay ngamin no patuloyek ti panagpakitak kadagiti matak. Maul-ulawak ngaminen aglalo no kasta a nalawag ti masanguanak. Normal met ngarud ti darak.

Iti dayta a nagmalem, pulos a diak immammingaw iti room-mi. Masapul a takderak ti nasaok.

KALPASAN ti misa iti kabigatanna, narugian a dagus ti mass demo. Simrekak met laeng ta pinampanunotko ti kina-sound system operator-ko.

Maudi ti seksionko nga agpabuya. Number 8 ti naalak idi agbibinnunotkami nga adviser iti no kasano ti panagsasaganad dagiti ag-mass demo. Dua a seksion laeng ngamin ti kada year level iti Junior High School.

Immuna ti 9-Carnelian a nagpabuya. Permi a pinalpalakpakan ida dagiti agbuybuya kalpasanna. Kasta met nga awan ti makunak kadagiti simmaruno.

Batang dagiti ubbingko. Imbagak iti bagik a diak buyaen ida. Dumogak lattan ti sound system. Ammok lattan a makatkatawaanda ta saanda a nakapraktis a naimbag. Gunggonada! Uray pay ag-reflect dayta kaniak kas baro nga adviser-da.

Ngem sutil ni Ma’am Joe Ann nga emcee. Immaynak ginuyod a pinatakder iti tugawko idi nakitanak a nakadumog nga agpatpatokar. Inturongnak iti mismo a playground.

Ania pay, kapilitan a nagbuyaak.

Naimatangak ti ilalawag ti rupa dagiti adalak iti pannakakitada kaniak. Nakariknaak la ngarud iti pannaka-guilty. Parang nabuhayan sila ng loob, kas kuna dagiti Anggalog. Pimmaragsitda a nagkulkulagtit. Ney, ket mayat met ti pabuyada uray padak dagiti dadduma a kannigid a dua ti sakada nga agsala.

Inkamakamko nga inalaan ida iti ladawan.

Iti ngudo ti pabuyada, pinatakderda ti nakapakleb iti daga a panel board. Nagdadakkel dagiti naipinta iti lupot a diseniona: HAPPY PATUPAT FESTIVAL, CWNHS! Iti baba: WE ARE SORRY, SIR P… WE LOVE YOU!!!

Ne, ay, ta umaydakon darupen idi ageksitda. Naladawen tapno kumayakayak. Pinalawlawandakon nga inar-arakup.

Saankon a nalapdan ti bagik. Agarubos ta agarubos lattan dagiti matak.

Nangeddengak: kiddawekto iti prinsipalmi a siakto ti agadbayser kadakuada iti sumaruno nga school year. #

Comments are closed.