Footer

BANNER NEWS: Gagem ti gobierno’t Ilocos Sur pannakapunas ti insurhensia ti probinsia

VIGAN CITY – “Mapunas koma a maminpinsan ti insurhensia iti Ilocos Sur tapno agtalinaed ti kappia,” kuna ni Gobernador Ryan Luis Singson idi napan a Hulio 6 dita Kapitolio probinsial no sadino ket napasamak ti pannakapaima ti tig P65,000 manipud iti Department of the Interior and Local Government (DILG), kadagiti tallo a dati a rebelde a naggapu iti Banayoyo ken siudad ti Candon.  Dagitoy ket simmuko idi 2017.

Manipud pay idi 2016 addan natibker a suporta ti gobernador iti kastoy a pannakaited ti tulong kadagiti kakabsat a naminsan a pimmanaw iti sidong ti gobierno.  Addan 30 a simmuko ket kaadduan kadagitoy ti taga sabali a probinsia, kuna ni Maria Victoria Ramos, assistant regional director ti DILG, iti panangdayawna ken ti gobernador iti imatang dagiti hepe ken mangibagi kadagiti ahensia ti gobierno nasional ken probinsial.

“Tagtagainep ko gamin ti natalna a probinsia a sadino ket agkikinammayet nga agtitinnulong amin a lumugar manipud nagduduma a sector,” kuna ni Singson.

Inallukoyna ngarud dagiti tallo no kayatda ti agbasa ta adda sisasagana nga scholarship, ken allowance para kadakuada. No awan masapulanda a trabaho, agsublida laeng iti Kapitolio ta ited ti gobernador ti trabahoda, ken panagsanay a mangpasantak ti kalidad ti ammoda.

Daytoy a kari ni Singson ket kayatna nga ibingay dagiti dati a rebelde kadagiti kakabsat nga adda pay laeng ti sidong dagiti armado a rebelde. Kastoy met laeng ti maited kadakuada.

Ginutugotna pay ida nga idatagda amin a makitada a saan a nasayaat a mapaspasamak iti lugarda tapno dagiti rason ti isusurotda kadagiti armado a rebelde ket mapukaw.

Perpekto daytoy Enhanced-Comprehensive Local Integration Program (E-CLIP) kuna ni Singson ta addan ditoy dagiti amin nga ahensia ti gobierno a madadaan a mangtulong kadagiti kakabsat a simmuko.  Adda ti TESDA, DOLE, DTI, NCIP, PCOO, PhilHealth, DepEd, CHED, DSWD, DOH, PNP ken dadduma pay ta segun ti Administrative Order No. 10, series of 2018 a napetsaan iti Abril 3, 2018, pinirmaan ni Presidente Rodrigo Roa Duterte, napapintas ti CLIP nga inrussuat ti administrasion ni nag-Presidente Benigno Aquino III. (FGL/ICR/PIA1 Ilocos Sur)