Footer

Panangiturong kadagiti agtutubo iti naraniag a masakbayan, karit iti SK IS Federated President

VIGAN CITY ­– Panangiturong kadagiti agtutubo iti Ilocos Sur iti naraniag a masakbayan babaen ti pannakakibinda a manglisi kadagiti dakes a bisio, ken nasapa a panagasawa; ken panangiturposda iti panagadalda ken panagsanayda nga agbalin a responsible nga umili ken sanggir ti kagimongan iti masakbayan.

Dayta ti naindaklan a karit kadagiti amin a Presidente ken kagawad ti Sangguniang Kabataan kadagiti amin a barangay iti amin nga ili ken siudad ti Ilocos Sur nga inyetnag ni SK Ilocos Sur Federated President Janina Joyce Tabios, kabayatan ti pannakiuman kenkuana ti Ilocos Sur Integrated Press iti Kapihan ti Amianan Media Forum iti idadar-ayna iti umuna a gundaway iti session dagiti kameng ti Sangguniang Panglalawigan iti SP Session Hall, Provincial Capitol, Vigan City idi Hulio 3, 2018.

Impakaammo ni Tabios a nabutosan nga SK President ti Brgy. Bongtolan, Vigan City ken SK Federated President ken kameng ti Sangguniang Panglunsod iti siudad, a kangrunaan a planona ket ti panangiyadayo kadagiti agtutubo iti dakes a bisio kas ti illegal a droga, sugal, panagbartek, prostitusion ken pornographia, babaen kadagiti gannuat kas ti sports development, religious and civic activites, ken napasnek a panagadalda.

Impalgakna ti tarigagayna a mangilungalong iti SP para ti nainsaknapan a pannakaangay dagiti nagduduma nga sports activities a pakatakuatan ken pakaasaan dagiti kabaelan dagiti agtutubo. Impakaammona pay ti pannakaipaay dagiti educational assistance a pangtulong kadagiti napanglaw ken makabael nga agtutubo iti panagadalda.

Impeksana pay ti tarigagayna a mangidaulo kadagiti agtutubo a makikaysa kadagiti gannuat para ti pannakasaluad ti aglawlaw ken nakaparsuaan kas ti panagmula iti kayo, panagdalus iti aglawlaw ken iti kabaybayan. Inrakurakna ti plano a mangesponsor kadagiti seminar-workshops, forum ken panagtataripnong para kadagiti agtutubo tapno maipaganetget kadakuada dagiti rumbeng nga aramiden ken nasken a liklikanda a dakes nga aramid kas paset ti pannakatubayda nga agbalin ken agtalinaed a nasayaat a makipagili.

Inaklon ni Tabios a kas agdadamo a lider ket adu pay laeng dagiti nasken a sursuruen ken sanayenna, ket kiniddawna kadagiti padana nga agtutubo ti kooperasionda, ken kadagiti natataeng nga opisial ti panangiwanwan ken panangbayabayda kenkuana ken dagiti padana nga opisial iti SK tapno maakemda a nasayaat dagiti annongenda nga agserbi kadagiti kapatanda kadagiti barangay, ili siudad wenno iti probinsia.

Ti baro nga SK Federated President iti Ilocos Sur ket agtawen iti 22, nabutosan laeng idi Mayo 2018, ken ibagianna dagiti agtutubo kas Ex-Officio Member iti Sangguniang Panlalawigan ti Ilocos Sur. Anak isuna ni Ilocos Sur Provincial Warden Raymond Tabios, ken graduating student iti Bachelor of Science in Criminology iti North Western University, Laoag City. (Eden Alviar)